Vonandi fannstu það sem þú varst að leita að

Fjölkameru þáttur tekinn upp í beinni og nemendur á fullri ferð í upptökum

Það er þessi tími ársins. Nemendur sem hafa verið með okkur síðustu 2 ár eru að taka stökkið út í hinn stóra kvikmyndaheim og hafa sýnt útskriftarmyndir sem eru þeirra eigin höfundaverk, í Bíó Paradís þessa vikuna. Þetta eru 4 deildir sem nemendurnir útskrifast frá; Leikstjórn/Framleiðsla, Skapandi tækni, Handrit/Leikstjórn og að lokum leiklist. Að venju er vel mætt á útskriftarsýningar en þetta eru oft verk sem skilja eftir sig svita, blóð og tár enda mikill metnaður að baki.

Nú styttist í stóru stundina en kl. 13.00 útskrifum við þetta hæfileikaríka fólk sem mun án efa hafa áhrif á kvikmyndalandslagið hérlendis sem og erlendis.

Á einni viku hefur Björk látið frá sér tvö myndbönd við lög sín af nýjustu plötu sinni Vulnicura. Lögin eru Black lake og Stonemilker og eru bæði myndböndin tekin á Íslandi.

Við í Kvikmyndaskóla Íslands erum stolt af aðkomu kennara skólans, Jonathan Devaney, sem var ljósameistari í báðum tökum en í öðru þeirra naut hann aðstoðar nýútskrifaðs nemanda skólans, Jóns Marinós.

Rétt er að benda áhugasömum að nota Chrome vafrann fyrir 360 gráðu videoið við lagið Stonemilker.

Devaney, kennari KVÍ vann að myndböndum Bjarkar

Undanfarinn tíu ár hefur Bíó Paradís skipað sérstakan sess fyrir nemendur og starfsfólk Kvikmyndaskóla Íslands. Á hverjum föstudegi flykkjast nemendur skólans í kvikmyndasögu, og horfa vandlega valdar kvikmyndaperlur sem hafa umbylt sögu kvikmyndanna.


Nemendur skólans hafa fengið aðstöðu til að horfa á þessar kvikmyndir í allra bestu gæðum í bíósal. Þessi kennsla er vitaskuld grundvallaratriði í menntun íslenskra kvikmyndagerðarmanna.

Í lok hverrar annar er svo uppskeruhátíð skólans haldin í Bíó Paradís. Yfir heila viku frumsýna nemendur svo afrakstur liðinnar annar á sama tjaldi og þau horfðu á myndir meistaranna. Að lokinni frumsýningarviku, útskrifast nemendur úr skólanum við hátíðlega athöfn og auðvitað í bíósal. 


Við skorum á ríki og borg að finna viðunandi lausn á málinu og bjarga Bíó Paradís.

Þetta menningarheimili kvikmyndanna er einfaldlega of mikilvægt til að hverfa úr þjóðlífinu.

Myndband frá Color Run gert af nemendum KVÍ

Fransk-alsírski leikstjórinn Rachid Bouchareb sem var gestaleiksjóri á Stockfish Kvikmyndahátíðinni á dögunum heimsótti  Kvikmyndaskóla Íslands á meðan á dvöl hans á Íslandi stóð.

Mynd hans “Road to Istanbul” var sýnd á Stockfish kvikmyndahátíðinni en hún kom glóðvolg beint frá heimsfrumsýningu á Berlínarhátíðinni.   Myndir Bouchareb hafa vakið heimsathygli en þær fjalla gjarnan um árekstra menningarheima, í þessu tilfelli austurs og vesturs, og flókin samskipti þeirra.

Segir Sigrún Gylfadóttir verkefnastsjóri hjá Leiklistardeild Kvikmyndaskóla Íslands. Hún bætir við að að Bouchareb hafi  þrisvar verið tilnefndur til Óskarsverlauna fyrir bestu erlendu myndina sem fulltrúi  Alsír.

Leikstjórinn spjallaði við nemendur KVÍ um feril sinn vítt og breitt og svaraði spurningum nemenda og þótti  örlátur í svörum sínum. Þegar þegar hann var spurður um hvað hann gæti ráðlagt ungum upprennandi kvikmyndagerðarmönnum svaraði hann að bragði:

Ef það er eitthvað sem ég gæti ráðlagt ykkur þá er það fyrst og fremst að fylgja hjarta ykkar og finna hvað brennur á ykkur og þið hafið mestu ástríðu fyrir, og látið það vera drifkraftinn í listinni.

Hinn heimsþekkti leikstjóri Rachid Bouchareb heimsótti Kvikmyndaskólann

Um síðustu helgi var hátíð kvikmyndagerðarfólks haldin á Hótel Nordica, Eddan 2017 og var þar að vanda mikið um dýrðir. Fólkið í bransanum sem tengist Kvikmyndaskóla Íslands kom ekki tómhent frá hátíðinni en ber þar helst að nefna hinn raunverulega siguvegara hennar, kvikmyndina Hjartastein.

Fjölmargir útskrifaðir nemendur úr KVÍ komu að gerð myndarinnar sem vann til 9 verðlauna á Edduhátíðinni.  Vigfús Þormar Gunnarsson var fyrsti aðstorðarleikstjóri og Kristín Lea Sigríðardóttir sá um casting og leikþjálfun en bæði eru þau útskrifaðir leikarar úr Kvikmyndaskólanum. Edda Mackenzie úr Leikstjórn/framleiðslu  var framleiðslustjóri, Jón Már Gunnarsson úr Skapandi tækni, starfaði að myndbrellum og Guðjón Hrafn Guðmundsson, einnig úr Skapandi tækni var 2. aðstoðartökumaður.  Jón Þór Jónsson var „key grip“ en útskrifuðu leikararnir Ari Birgir Ágústsson, sá um leikmuni og Rebekka Atla Ragnarsdóttir  var runner. Arnar Benjamín Kristjánsson sem er útskrifaður nemandi úr Leikstjórn/framleiðslu var location scout og Annetta Ragnarsdóttir sem er útskrifuð úr skólanum úr Handritum/leikstjórn vann við framleiðslu og að lokum aðstoðaði Saga Guðjónsdóttir við veitingar.

Guðmundur Arnar Guðmundsson sem vann verðlaun fyrir bæði leikstjórn og handrit ársins, auk þess að eiga veg og vanda að kvikmynd ársins, Hjartasteini, hefur undanfarin ár verið í mikilvægu hlutverki sem kennari við Kvikmyndaskóla Íslands. Auk hans starfaði við myndana deildarforseti Skapandi tækni, Jörundur Rafn Arnarson sem var brellumeistari hennar.

Af öðrum sigurvegurum Kvikmyndaskólans á Edduhátíðinni skal næst nefna þáttinn Ligeglad, sem Arnór Pálmi Arnarsson, útskrifaður úr Leikstjórn/framleiðslu vorið 2009 leikstýrði, en þátturinn vann titilinn Besta leikið sjónvarpsefni ársins 2017. Einnig vann þátturinn Með okkar augum verðaunin Menningarþáttur ársins en tökumaður og klippari þáttarins er Gunnar B. Gudbjörnsson  (Gussi) sem útskrifaðist úr Kvikmyndaskólanum haustið 2008.

Kvikmyndaskólainn sendir öllum tilnefndum sem og verðlaunahöfunum hamingjuóskir með frábæran árangur á Eddunni 2017.

Berglind Halla Elíasdóttir  var í útskriftarhópi leiklistanema  í vetur en við fengum hana til að segja okkur aðeins frá sinni sýn á námið í Kvikmyndaskóla Íslands.

Námið fannst mér krefjandi, gefandi og virkilega þroskandi. Ég komst að mörgu um sjálfa mig og margt fékk ég staðfest. Mér þótti ótrúlega gaman að komast loks í nám þar sem ég fann að “hér á ég heima”.

Það kom mér á óvart að fá að spreyta mig eins mikið og ég gerði í sjálfri kvikmyndagerðinni, þrátt fyrir að hafa lesið um það á síðu skólans, og ég kom sjálfri mér á óvart þar. Það að treysta á hugmyndir sýnar og sjá þær verða að einhverju er alveg ótrúlega fullnægjandi og þar að auki lærir maður svo mikið af því.

Þessi tvö ár í Kvikmyndaskólanum gáfu mér dýpri skilning og þekkingu á svo mörgum sviðum og þar að auki eignaðist ég alveg ótrúlega marga og góða vini.

Berglind  tók inntökupróf í  leiklistardeild LHÍ  í vor og komst þar inn í frekara nám.

Ég var ein af þeim 10 sem fékk pláss við deildina í haust þannig það er bara spýta í lófana, fara yfir glósurnar og umsagnir kennara og læra meira. Ég hlakka mjög mikið til. Það væri svo ósköp ljúft að uppfylla draum 5 ára Berglindar og standa á Stóra sviði Þjóðleikhússins einn daginn.

Berglind kveðs vera afskaplega metnaðarfull.

Ég syng mikið og náði einmitt að styrkja mig allvel á því sviði þessi 2 ár í skólanum. Ég er opin og á auðvelt með að vera í samskiptum við fólk. Þar að auki  teikna ég mikið og hef verið að selja myndir svona hingað og þangað. Ágætis aukapeningur það.

Og Berlind endar á því að segja að ekkert  hjálp  sér jafn mikið og tónlist.

En svo er svo erfitt að nefna bara eitthvað eitt. Ástin, listin og matur. Segjum það.

Að treysta á hugmyndir sínar og sjá þær verða að einhverju

Anna Hafþórsdóttir hefur komið að mörgum ólíkum  verkefnum frá því hún útskrifaðist úr leiklistardeild  Kvikmyndaskóla Íslands vorið 2011.

Hjá Önnu er framundan frumsýning  á nýrri mynd, og fengum við hana til að segja frá verkefnunum sem hún hefur fengist við og hvernig henni hefur nýst námið í Kvikmyndaskólanum.

Ég nýti mér þá tækni sem ég lærði í skólanum í öllu sem ég tek mér fyrir hendur á sviði leiklistar. Ég lærði alls konar hluti og tók með mér það sem nýttist mér og þróa það áfram. Maður fær að prófa margt í náminu og það er persónubundið hvað það er sem nýtist hverjum og einum. Svo er margt sem ég fattaði löngu seinna.

Anna segir að enn sé hún að uppgötva hluti úr náminu á nýjan leik.

Þess vegna hefur mér þótt gott að geyma námsefnið og glósurnar og kíkja á það öðru hvoru. Svo fékk ég að leika í slatta af stuttmyndum á meðan á skólagöngunni stóð og það er gott að sjá sjálfa sig og læra af því.

Önnu er eins og mörgum öðrum útskrifuðum  nemendum skólans hugleikið hvernig það hefur reynst gott að leiklistarnámið í KVÍ einskorðast ekki við leiklistina heldur fá nemendur að læra handverkið í öðrum þáttum kvikmyndagerðar.

Ég hef sérstaklega nýtt mér það vel að hafa fengið að læra aðeins á cameru og að klippa. Þegar maður kemur út í kaldan raunveruleikann og enginn leikstjóri hringir þá verður maður að gera eitthvað sjálfur. Þá er gott að geta alla vega stillt fókus, ýtt á rec og klippt eitthvað saman. Þannig urði til dæmis Tinna og Tóta til. Svo var ég að leikstýra í fyrsta skiptið um daginn, þannig að það er mikilvægt að hafa fengið smjörþefinn af öðrum hliðum kvikmyndagerðar í náminu.

Anna fékk sitt fyrsta aðalhlutverk í kvikmynd haustið 2014, í Webcam.

Sama tökulið og gerði þá mynd ákvað svo að gera aðra ári seinna og ég fékk líka aðalhlutverkið í henni. Hún heitir Snjór og Salóme og kemur út í haust. Báðar þessar myndir eru gerðar fyrir mjög lítinn pening og flestir í tökuliðinu eru að stíga sín fyrstu skref í kvikmyndagerð. Leikstjórinn og handritshöfundurinn Sigurður Anton Friðþjófsson er ungur og upprennandi í sínu fagi og ég er ótrúlega glöð og þákklát að hafa fengið þessi stóru tækifæri. Ég og Bylgja (Babýlons) , sem var með mér í bekk í Kvikmyndaskólanum, bjuggum til fitness-dívurnar Tinnu og Tótu og fórum að gera sketsaþætti og settum á youtube.

Framleiðslufyrirtækið Stórveldið komst á snoðir um þætti Önnu og Bylgju og hrifust af vinnu þeirra.

Við gerðum átta þætti með þeim undir leikstjórn Kristófers Dignus og þeir voru sýndir á sjónvarpsstöðinni Bravó. Við höfum síðan verið ráðnar til að gera sketsa fyrir brúðkaup og þess háttar. Fyrir utan þetta hef ég eitthvað verið að leika í þáttum og auglýsingum og fór með aukahlutverk í Vonarstræti.

Anna bætti við sig BS gráðu í tölvunarfræði að loknu náminu í Kvikmyndaskóla Íslands og hefur einnig starfað við það síðustu ár.

Ég hef verið að vinna sem forritari hjá yndislegu fyrirtæki sem heitir Nextcode. Ég hef reyndar komist að því núna að ég hef ekki tíma til að gera allt í heiminum og ákvað því að hætta þar og einbeita mér meira að kvikmyndagerð, skrifum og leiklist. Ég mun vinna út júní hjá Nextcode. Er líklegast að fara að leika í mynd í ágúst sem ég veit ekkert hvað ég má tala mikið um og svo var ég að komast inn í meistaranám í ritlist við HÍ. Þannig að það eru virkilega spennandi tímar framundan. Planið er sem sagt að fara að skrifa meira, bæði fyrir bíó og annað. Svo mun ég að sjálfsögðu halda áfram að reyna að koma mér á framfæri í leiklistinni.

Anna Hafþórsdóttir einbeitir sér nú að kvikmyndagerð, skrifum og leiklist

Það voru fagnaðarfundir þegar kollegarnir, skólastjórarnir og leikstjórarnir, Gísli Snær Erlingsson frá (LCA) í Singapore og Hilmar Oddsson frá KVÍ hittust á vinnuráðstefnu Cilect í München í vikunni.

Þema ráðstefnunnar var “Working with actors” og þar skiptust kvikmyndaskólafólk, alls staðar að úr heiminum, á skoðunum á því mikilvæga atriði hvernig best væri að haga kennslu í leikstjórn, með sérstakri áherslu á samstarfið við leikara. Ráðstefnan var haldin í Hochschule für Fernsehen und Film, en það er einmitt skólinn þar sem okkar maður lærði sitt fag, fyrir allnokkru síðan.

Fagnaðarfundir í München – Rektor Kvikmyndaskólans á ráðstefnu Cilect

Útskriftarviku Kvikmyndaskólans er lokið og fremst í okkar huga er þakklæti. Frá okkur fer fyrirmyndar kvikmyndargerðar fólk sem á eftir að gera mark sitt á framtíðina og munum við fylgjast með af áhuga og spennu. Hér eru nokkrar myndir frá vikunni og óskum við ykkur öllum innilega til hamingju með bjarta framtíð !

Árshátíð Kínema, nemendafélags Kvikmyndaskólans, var haldin um helgina og skemmtu sér alli konunglega, eins og sjá má

Árshátíð Kínema, myndir frá fagnaðinum

Bolli Már Bjarnason útskrifaðist frá Leiklist hjá Kvikmyndaskólanum og hefur verið að gera góða hluti síðan. Við náðum tali af honum og fengum hann til að rifja aðeins upp tíma sinn hjá skólanum og forvitnuðumst um hvað hann er að gera núna

Ég var einmitt um daginn að skoða mynd af mér frá fyrsta deginum mínum í Kvikmyndaskólanum. Þarna var ég að vinna með denim on denim og svarta húfu. Vissi lítið út í hvað ég var að fara, hélt bara að ég vildi verða leikari. Ég átta mig á því núna þegar ég hugsa til baka hversu fáranlega lélegur ég er að muna eftir hlutum úr fortíðinni, fæ bara ákveðna tilfinningu þegar ég minnist áranna í skólanum. En hún er hlý og góð sem hlýtur að segja margt og ég finn alltaf fyrir þakklæti þegar ég hugsa um þennan tíma og þetta skref sem ég tók. KVÍ er svona dæmi sem er rekið áfram af fallegum hugsjónum og þrjósku, elementum sem flytja fjöll og gefa strák eins og mér verkfæri til að vinna með í lífinu. Þetta fylgir mér enn og mun gera alla tíð.

Til að lýsa því sem ég geri í dag þá væri best að segja: „Hitt og þetta, aðallega þetta“.

Ég er að vinna á Pipar\TBWA sem er algjörlega frábær auglýsingastofa og þar bý ég til auglýsingar í slagtogi við fáránlega frábært fólk sem kemur úr öllum áttum. Námið nýtist mér einmitt mjög mikið hérna, ég bý til myndbönd, skrifa fullt af texta og tek mér svo auðvitað líka stöðu fyrir framan kameruna. Allt þetta eru vissulega hlutir sem skólinn þjálfaði mig í en mögulega er mikilvægasta staðreyndin sú að í KVÍ lærði maður að vinna í hóp sem hafði ekkert nema hugmynd í höndunum og þurfti svo að nýta eiginleika allra í hópnum til þess að búa til gott stöff. Það er nákvæmlega það sem ég geri líka hér. Hugmyndin þarf bara að vera nógu solid til að bera allt skrautið.

Svo koma af og til skemmtileg leikaraverkefni inn á borð til mín og ég stefni klárlega á að fjölga þeim. Ágústa Margrét kennari bauð mér einu sinni að hjálpa mér með showreel og auðvitað er gersamlega glórulaust að ég sé ekki búinn að keyra það í gang. Stendur tilboðið enn Ágústa? Svo luma ég á mjög skemmtilegu efni sem ég hef verið að vinna í með piltum úr Kvikmyndaskólanum. Það kemur að því að það fái að líta dagsins ljós.

Eins og þeir sem þekkja mig vita að ég er algjör fótboltagómur og að liðið mitt Þróttur Reykjavík á risastórt hólf í mínu hjarta. Þess vegna sit ég í stjórn knattspyrnudeildar Þróttar. Góður sigur í Laugardalnum (sem er hjarta Reykjavíkur) á góðum sumardegi bindur lífið saman. Og talandi um að binda saman lífið þá kynntist ég kærustunni minni í skólanum, henni Berglindi Höllu Elíasdóttur. Hún er í dag á lokaárinu í LHÍ (leikarabraut) ásamt því að vera með mér, sem er í rauninni full vinna. En án alls djóks þá er hún alveg fáranlega frábær og rugl góð leikkona.

Nóg að gera hjá Bolla og verður spennandi að fylgjast með

Eins og Eggert Þorleifsson sagði í hinni goðsagnakenndu mynd Dalalíf: „Líf og fjör.“

Bolli Már Bjarnason, útskrifaður frá Leiklist

Nemendur á fyrstu önn Kvikmyndaskóla Íslands luku við sitt fyrsta námskeið;  TÆK 107, þar sem allar deildir skólans læra undirstöðu kvikmyndagerðar og ljúka því hvert og eitt með 1 mínútna stuttmynd.

Nemendur á 2.önn Leikstjórnar og Framleiðslu fóru í listasögu með Lee Lorenzo Lynch ásamt öðrum nemendum á 2.önn, þau sátu námskeið í Leikstjórn undir leiðsögn Börks Gunnarssonar (Þetta Reddast) með nemendum Handrita og Leikstjórnar, og hófu námskeið í handritsgerð með Hrafnkeli Stefánssyni (Borgríki, Kurteist Fólk) þar sem þau meðal annars skrifa handrit að stuttmynd sem þau framleiða í lok annar. Nemendur á 4.önn fóru á handritsnámskeið undir leiðsögn Huldars Breiðfjörðs (Pabbahelgar, Undir Trénu) ásamt 4.önn Handrita og Leikstjórnar þar sem þau vinna handrit að útskriftarverkefni sínu ásamt því að hefja leikstjórnarkúrs með Hilmari Oddsyni (Kaldaljós, Tár úr Steini) þar sem unnið var áfram með lokaverkefnið þeirra.  Ásamt því sat 4.önn námskeið í stofnun framleiðslu fyrirtækja og umsókna, og samtíma kvikmyndasögu.

Nemendur á 2.önn Skapandi Tækni, fóru í listasögu með Lee Lorenzo Lynch ásamt öðrum nemendum á 2.önn og klippikúrs undir leiðsögn Davíðs Alexander Corno (Kona fer í stríð). Nemendur 3.annar sátu kvikmyndatöku námskeið með Birni Ófeigssyni (Gnarr, Latibær) þar sem þau undirbúa að taka upp sína eigin heimildarmynd og sátu handritanámskeið með Hrafnkeli Stefánssyni (Kurteist Fólk, Borgríki). Nemendur 4.annar fóru í framleiðslu námskeið með 4.önn Handrit/Leikstjórn undir leiðsögn Arnar Benjamíns (A Reykjavik Porno, Þorsti) og undirbjuggu lokaverkefni sitt með leiðbeinanda sínum Ólaf De Fleur (Borgríki, Malevolent). Ásamt því sat 4.önn námskeið í stofnun framleiðslu fyrirtækja og umsókna, og samtíma kvikmyndasögu.

Nemendur á 2.önn Handrita og Leikstjórnar fóru í listasögu með Lee Lorenzo Lynch ásamt öðrum nemendum á 2.önn, sátu námskeið í handritsskrifum fyrir sjónvarpsþætti, þar sem þau munu skrifa “pilot” að sínum eigin þætti undir leiðsögn Daggar Mósesdóttur (Höfundur Óþekktur, Me & Bobby Fischer), námskeið í Leikstjórn undir leiðsögn Börks Gunnarssonar (Þetta Reddast) ásamt nemendum Leikstjórnar og Framleiðslu. Nemendur á 4.önn sátu námskeið í framleiðslu undir leiðsögn Arnar Benjamíns (A Reykjavik Porno, Þorsti), ásamt því að hefja leikstjórnarkúrs með Hilmari Oddsyni (Kaldaljós, Tár úr Steini ) Einnig sat 4.önn námskeið í stofnun framleiðslu fyrirtækja og umsókna, og samtíma kvikmyndasögu. 

Nemendur á 2.önn Leiklistar sátu námskeið í leiktækni með Rúnari Guðbrandssyni (Svartur á Leik) og námskeið í raddþjálfun með Þóreyju Sigþórsdóttur (Agnes, Kaldaljós). Nemendur á 3.önn sátu námskeið í Leiklistarsögu með Rúnari Guðbrandssyni (Svartur á leik) og unnu með leiktækni undir leiðsögn Hannes Óla Ágústssonar (Málmhaus). Nemendur 4.annar sátu námskeið í handritsgerð með Kolbrún Önnu Björnsdóttur (Svartir Englar) , upprifjunar námskeið í raddvinnu með Þórey Sigþórsdóttur (Agnes, Kaldaljós) og svo námskeið í gerð dansmyndbands undir leiðsögn Kolbrún Önnu Björnsdóttur(Svartir Englar) og Rut Hermansdóttur. Einnig fóru þau í námskeið í gerð showreel og æfingar fyrir áheyrnarprufur. Ásamt því sat 4.önn námskeið í stofnun framleiðslu fyrirtækja og umsókna, og samtíma kvikmyndasögu. Ásamt öllu þessu settu þau á svið söngleik í Iðnó með miklum glæsibrag, sem hafði frestast önninni áður. Alltaf nóg að gera hjá okkur.

Leikritið var sýnt tvisvar sinnum fyrir fullu húsi í júní og þótti tilvalið að bæta við sýningum, en meðal þátttakenda má finna marga fyrrum nema Kvikmyndaskólans.

“Upplausn/Fyrirmyndarsjálf” bætir við auka sýningum 28., 29. og 30. júlí

Edvin Martinsson Á Kósini stundaði nám um skeið við Kvikmyndaskóla Íslands en varð að hverfa frá því vegna alvarlegra veikinda. Edvin lést í síðustu viku og fengum við Hrafnkel Stefánsson, deildarforseta Handrit/Leikstjórn til að segja stuttlega frá kynnum sínum á honum.

Því miður voru kynni mín af Edvin stutt þessa einu önn sem hann varði hjá okkur í skólanum, en það sem ég fékk að kynnast var metnaðarfullur kvikmyndagerðarmaður uppfullur af skemmtilegum hugmyndum. Andlát hans er án efa missir fyrir íslenska kvikmyndagerð.

Á meðan á náminu í KVÍ stóð gerði Edvin mínútumyndina Ritstífla og fylgir hlekkur að henni hér með þessum fáeinu orðum til minningar um hann.

Í kjölfar andláts Edvins stendur yfir söfnun fyrir fjölskyldu hans. Reikningsnúmer söfnunarinnar er 0152 – 05 – 260815 og kennitala eiganda 060984-3449

Niðurstöður leitar

Fjölkameru þáttur tekinn upp í beinni og nemendur á fullri ferð í upptökum

Mikið um að vera í paradísinni

Devaney, kennari KVÍ vann að myndböndum Bjarkar

Björgum Bíó Paradís

Myndband frá Color Run gert af nemendum KVÍ

Hinn heimsþekkti leikstjóri Rachid Bouchareb heimsótti Kvikmyndaskólann

Kvikmyndaskólinn og Eddan 2017

Að treysta á hugmyndir sínar og sjá þær verða að einhverju

Bergman í Bíó Paradís

Anna Hafþórsdóttir einbeitir sér nú að kvikmyndagerð, skrifum og leiklist

Fagnaðarfundir í München – Rektor Kvikmyndaskólans á ráðstefnu Cilect

Útskriftarviku er lokið

Árshátíð Kínema, myndir frá fagnaðinum

Bolli Már Bjarnason, útskrifaður frá Leiklist

Söngleikur og fjöldi námskeiða

“Upplausn/Fyrirmyndarsjálf” bætir við auka sýningum 28., 29. og 30. júlí

Edvin Martinsson Á Kósini látinn

Útskriftarbæklingur Vor 2020

Flýtileiðir