Vonandi fannstu það sem þú varst að leita að

Þessa haustdaga er sannarlega fjörugt skólalíf innan veggja Kvikmyndaskóla Íslands.
Nemendur úr þremur deildum KVÍ vinna nú hörðum höndum við upptökur á pilot-verkefninu Brúðuleikur í Iðnó og við Garðarholtskirkju. Handritið er skrifað af Atla Friðbergssyni og leikhópnum eftir hugmynd Hlínar Agnarsdóttur. Atli leikstýrir einnig en hann er útskriftarnemi í Leikstjórn og framleiðslu.
Leikhópurinn samanstendur af leiklistarnemendum á 3.önn en þau hafa fengið til liðs við sig stórleikarann Arnar Jónsson. Leiðbeinandi þeirra er Þorsteinn Gunnar Bjarnason. Nemendur á 2. önn í Skapandi tækni sjá um leikmynd og búninga undir stjórn Lindu Stefánsdóttur sem og hljóð og nemendur á 3.önn í sömu deild sjá um kvikmyndatöku undir stjórn Jonathan Devaney. Nemendur á 1.önn í Leikstjórn og framleiðslu sjá um skipulag á tökum, tímaplön og næringu. Það verða síðan 3.annar nemendur í Skapandi tækni sem munu sjá um klippingu og eftirávinnslu.
Við litum við í gær þar sem tökur stóðu yfir í Iðnó.

Brúðuleikur verður til í Iðnó – Pilot-verkefni í smíðum hjá nemendum

Leitað er að jákvæðum og metnaðarfullum einstaklingi með menntun og/eða starfsreynslu á sviði kvik­myndagerðar. Um er að ræða hálft starf.
Kvikmyndaskóli Íslands – KVÍ hóf starfsemi sína árið 1992 og hefur því starfað í rúm tuttugu ár. Skólinn er eini starf­andi fagskólinn a sviði kvikmyndagerðar á Íslandi og er meðlimur í Cilect, alþjóðasamtökum kvik­myndaskóla. Skólinn leitar að deildarforsetum eftirtalinna deilda:


Hafsteinn Hafsteinsson, útskrifaður frá Leiklist hjá Kvikmyndaskólanum, hefur nýverið lokið við að leika í nýrri mynd í fullri lengd um Axlar-Björn, sem talinn er vera eini fjöldamorðingi Íslands. Við fengum Hafstein í smá spjall

Við byrjuðum á því að forvitnast um hvaða kvikmynd Hafsteinn hafi heillast af fyrst

Það var “Grease”. Ég kunni lögin utanbókar og þykjustunni rólaði mér í stofustólnum heima á meðan ég söng lagið “Sandy” aftur og aftur. Féll náttúrulega killiflatur fyrir Oliviu. Systir mín átti plötuna og ég hafði ekki alltaf aðgang að henni. Ég bað því foreldra mína, sem voru á leiðinni til Spánar, að kaupa spóluna. Þau gerðu það. Svo setti ég spóluna í kassettutækið glaður í bragði og ýtti á play. Þá kom í ljós að tónlistin var döbbuð, spænskir söngvarar sungu yfir öll lögin.

Nám við leik var alltaf í spilunum hjá Hafsteini

Ég elska kvikmyndir og hef alltaf haft áhuga á leiklist og dansi. Ég dansa mikið og hef t.d. sýnt Bollywood dans undir stjórn Yesmine Olsson í Hörpunni og fleiri stöðum, og svo lærði ég sem barn samkvæmisdansa og er mikill Lindy hoppari. Mig langar mest af öllu að leika í dans- og söngmynd. Ég byrjaði á því að leika í auglýsingum um tvítugt og í ljós kom í tökum að oftast voru litlar athugasemdir gerðar við minn leik svo ég fór fljótlega að trúa því að ég gæti gert góða hluti sem leikari. Svo fór ég að leika í stuttmyndum og fékk þokkalega dóma fyrir mína frammistöðu. Að lokum ákvað ég að láta það eftir mér að læra leiklist þrátt fyrir að ég væri ágætlega farsæll í minni vinnu sem sáttamiðlari og sálfræðiráðgjafi.Það var áskorun að fara nánast hvern einasta dag út fyrir þægindarammann en þetta var frábært nám, erfitt en skemmtilegt. Það var mjög mikilvægt fyrir mig að fá að þroska og þróa mína hæfileika í vernduðu umhverfi.

Því miður tók ekki mikið við eftir námið, auglýsingar og leikur í stuttmyndum og nokkur lítilsháttar hlutverk í myndum í fullri lengd. Ég ákvað því að ég yrði að taka hlutina í mínar eigin hendur því enginn annar lætur víst manns eigin drauma rætast. Ég hef því verið með í þróun og framleiðslu kvikmyndaverkefni þar sem ég leik aðalhlutverkið, leikstýri og skrifa. Þetta eru gamanþættir sem vonandi verða sýndir í sjónvarpinu eftir eitt til tvö ár en ég hef nú þegar fengið glimmrandi undirtektir frá þungavigtarmönnum í bransanum.

Hafsteinn hefur nú tekist á við að leika einn alræmdasta íslending fyrr og síðar

Ég hef stundum leyft mér að vona að mér yrði kannski einhvern tíman boðið að leika drykkfelldan og þunglyndan miðaldra mann í Þingholtunum. En hafandi sagt að enginn láti minn draum rætast þá vil ég segja að loksins bauð mér hæfileikaríkur leikstjóri og handritshöfundur, Davíð Charles Friðbertsson,  að leika aðalhlutverk í mjög merkilegri kvikmynd, mynd sem meira segja mínir villtustu draumar þorðu ekki að dreyma að ég myndi leika í. Mitt fyrsta aðalhlutverk í kvikmynd í fullri lengd er hvorki meira né minna en períóda og því búningamynd sem gerist á 16 öld. Ég leik Axlarbjörn en hann er eftir því sem best er vitað fyrsti og eini fjöldamorðingi Íslandssögunnar. Um er að ræða morð- og ástarsögu með afar dimmum húmor. Myndin var tekinn upp af verulega færum kvikmyndatökumanni sem hefur skotið 14 myndir í fullri lengd. Öll umgjörðin var einstaklega fagmannleg og krúið stórkostlegt. Myndin er núna í eftirvinnslu og verður frumsýnd fljótlega eftir áramót.

Við bíðum spennt og látum okkur ekki vanta á sýningar á nýju ári, enda miklir hæfileikar hér á ferð

Axlar-Björn, eini fjöldamorðingi Íslands, gengur aftur

Pétur Arnórsson vinnur sem brellumeistari í Kanada


Í sumar hefur verið unnið að endurskipulagningu á kennsluskipulagi Kvikmyndaskólans með það fyrir augum að skerpa á sérgreinakennslunni og bæta þjónustuna. Í stað deildarforsetakerfisins sem verið hefur við lýði síðastliðin 10 ár, þar sem einn forseti er yfir hverri deild, hefur verið tekið upp fagstjórakerfi þar sem einn fagstjóri er yfir hverri sérgrein innan deildar. Þannig verða 2 til 3 fagstjórar í hverri deild, sem hafa það hlutverk að samhæfa námskeið, umsjón með vali kennara og leiðbeinenda og tryggja að lokahæfniviðmið hverrar sérgreinar skili sér til nemenda.

Yfir fagstjórum er síðan námstjóri sem ber ábyrgð á stundarskrárgerð og samhæfingu fagstjórnar, kennsluáætlana og hefur umsjón með innri vef. Fyrirmyndina að þessu kerfi má finna í mörgum betri kvikmyndaskólum í Evrópu. Þetta mun ekki breyta því að áfram verður unnið með fjölbreytta flóru kennara í öllum faggreinum.

Unnið hefur verið að ráðningu fagstjóra undanfarnar vikur og mun því verða lokið í byrjun næstu viku. Búið er að ganga frá ráðningu í flestar stöður og við fögnum því að tekist hefur að fá frábært og reynslumikið fólk í stöðurnar. Hér skal talið upp það sem þegar hefur verið gengið frá ;

Hilmar Oddsson, fráfarandi rektor verður fagstjóri “Leikstjórnar”
Hlín Jóhannesdóttir, fyrrum deildarstjóri 2014-2016 í Leikstjórn/Framleiðslu verður fagstjóri “Framleiðslu”
Kjartan Kjartansson verður fagstjóri “Hljóðs”
Jakob Halldórsson verður fagstjóri “Klippingar”
Kristján U. Kristjánsson verður fagstjóri “Myndbreytinga”
Ottó Geir Borg verður fagstjóri “Tegundir handrita”
Gunnar B. Gunnarsson verður fagstjóri “Handrita í fullri lengd”
Þórey Sigþórsdóttir verður fagstjóri “Leiks og raddar”

Allt er þetta fólk í fremstu röð á sínu sviði með mikla reynslu í kennslu bæði hjá Kvikmyndaskólanum og víðar og spennandi að fá það til starfa. Eftir helgina verður tilkynnt um 3 fagstjóra til viðbótar og nýja rektorinn.

Það er sannfæring okkar að þetta nýja kerfi mun bæta þjónustuna og gæði skólastarfsins.

Nýtt fagstjórakerfi tekið upp hjá Kvikmyndaskólanum og frábært fólk komið til starfa

Emil Alfreð Emilsson, sem er útskrifaður frá Handrit og Leikstjórn hjá Kvikmyndaskólanum, hlaut nýverið verðlaun fyrir besta handritið fyrir útskriftarmynd sína “Þrír menn” .
Kvikmyndahátíðin Festival Cinemaiubit er alþjóðleg nemenda hátíð, vottuð af CILECT, alþjóðlegum samtökum kvikmyndaskóla og er ekki annað hægt að segja en að Emil sé vel að verðlaununum kominn.

Við náðum tali af Emil of fengum að forvitnast eilítið um ferlið frá byrjun náms

Það var aldrei spurning hvaða braut yrði fyrir valinu. Handrit og Leikstjórn eru þær tvær hliðar sem að hafa ávallt heillað mig hvað mest. Gæðin í kennslu, þá tala auðvitað út frá minni braut, voru frábær, maður fær að sitja tíma í tvö ár með öllu því færasta fólki sem að Ísland hefur alið af sér. Ég meina það. Og fyrir mér er mikilvægasta lexían ekkert sérstakt trix í sjálfu sér. Allir þessir frábæru kennarar sem maður hafði eru á þeim stað í dag vegna þess að þau voru tilbúin að leggja á sig vinnuna. Og það er líklega það sem að situr hvað mest eftir hjá mér.

Hvað varð til þess að Emil sótti um þátttöku á Cinemaiubit?

Hún Sigrún Gylfadóttir verkefnastjóri Kvikmyndaskólans er algjörlega með puttann á púlsinum í þessum efnum og sendi mér línu um þessa hátíð. Gaman að vita af því að þó svo að maður sér útskrifaður þá sé enn hugsað til manns og ég mæli með því að þið gefið henni háa fimmu ef þið rekist á hana hún er algjör topp manneskja.

Og hvað ber framtíðin í skauti sér fyrir verðlaunaðan handritshöfund?

Mér hlotnaðist sá heiður að kvikmyndatökumaðurinn Óttar Ingi sem að skaut Þrír Menn bað mig um að koma sér í lið fyrir útskriftarmyndina sína sem verður tekin upp í mars sennilega og erum við saman að þróa þá mynd eins og er.
Annars hef ég aldrei verið kannski mesti planarinn þannig séð. Einu plönin mín eru bara að halda áfram að æfa mig og reyna að bæta mig eins mikið og ég get. Ef að maður leggur inn vinnuna þá gæti eitthvað gott gerst, þannig lít ég á það allavega

Við að sjálfsögðu óskum Emil innilega til hamingju með þennan flotta árangur og hlökkum til að fylgjast með honum í framtíðinni

Útskriftarmynd Emils Alfreðs Emilssonar hlaut verðlaun fyrir besta handritið

Magnús Ingvar Bjarnason er útskrifaður úr Skapandi tækni hjá Kvikmyndaskólanum og útskriftarmynd hans, „Skuggsjá“ var nýlega valin til þátttöku á Nordisk Panorama stutt-og heimildarmynda hátíðinni. Við fengum aðeins að forvitnast um hvaðan áhugi hans á kvikmyndum kom, um stuttmyndina og hans ferli í framleiðslunni.

Ég var rosalegt vídeóspólu-barn og sat heilu dagana fyrir framan sjónvarpið. Uppáhalds spólan mín var Moonwalker með Michael Jackson og Joe Pesci. Myndin var samanofin úr nokkrum tónlistarmyndböndum með Michael Jackson og þau voru svo tengd saman í söguþráð. Eins og allir ættu að vita þá voru tónlistarmyndbönd Jacksons oftast mjög súrrealísk og einstök og það heillaði mig svo mikið að spólan fór varla úr tækinu og mátti þola örugglega mörg hundruð áhorf.
Það er einmitt það sem heillar mig við kvikmyndagerð, hvernig við getum upplifað nýja og spennandi heima og víddir sem eru ólíkir raunveruleikanum, eitthvað sem að kitlar heilann og situr með manni eftir áhorf. Svo þegar ég varð aðeins eldri þá komu DVD diskarnir og á þeim voru oftast ‘’behind the scenes’’ og þá gat maður loksins fengið smjörþefinn af því hvernig myndir voru gerðar og ég hafði oft meiri áhuga á því heldur en myndunum sjálfum. Svo í grunnskóla bauðst mér að fara á stuttmynda námskeið hjá Baldvini Z, og þá var ekki aftur snúið.

Upphaf hverrar hugmyndar er mismunandi og Magnús finnur sig greinilega vel i samstarfi við aðra

Í upphafi var ég bara með svona ‘’concept’’ hugmynd en vantaði sjálfa söguna á bakvið hugmyndina. Þar sem ég hef lítinn áhuga á eða þolinmæði við að setjast niður og skrifa, en hef nú samt sem áður mjög gaman af því að kasta á milli hugmyndum, þá leitaði ég til samnemanda míns, Eyþórs Jóvinssonar og við unnum náið saman með handritið auk leiðbeinanda míns sem var Óskar Þór Axelsson.

Oft getur verið flókið að koma hugmynd í framkvæmd, en ferlið reyndist Magnúsi þægilegt

Þetta gekk bara skuggalega vel, ég hafði það að markmiði frá upphafi að hanna handritið þannig að ég þyrfti sem fæsta leikara, tökulið og tökustaði og reyna þá frekar að gera handritið áhugavert. Ég fékk Eyþór líka til að leikstýra þar sem ég var fastur á bakvið myndavélina og sem betur fer erum við báðir mjög skipulagðir og höfðum mjög góða heildarsýn á verkefninu svo að tökurnar gengu eins og í sögu.

Myndin hefur bæði fengið verðskuldaða athygli og hlotið verðlaun á kvikmyndahátíðum

Skuggsjá vann svo tvær innlendar stuttmyndahátíðir, bæði Gullmolann í stuttmyndahátið Kópavogs, og svo Frostbiter horror film festival sem haldin var í fyrsta skipti á Akranesi í fyrra. Svo var hún nýlega tilnefnd sem besta stuttmyndin á Nordisk Panorama sem verður haldi í Málmey í Svíþjóð í september

Og hvert er svo stefnunni heitið í kjölfar þessa?

Eftir útskrift ákvað ég að festa mig ekki í vinnu utan kvikmyndaiðnaðarins, því að ég vissi að það var það sem ég vildi vinna við. Sumarið og haustið tók ég þátt í sem flestum verkefnum sem mér bauðst, flest ólaunað þó, bara til að afla mér reynslu, þekkingar og sambanda. Sem betur fer átti ég smá afgang af námslánunum. Í dag þegar liðið er rúmlega ár frá útskrift þá er ég að vinna hjá framleiðslufyrirtækinu Tjarnargatan sem tökumaður og klippari, en nýlega hef ég líka unnið að nokkrum stuttmyndum. Ég hef aldrei verið mikið fyrir það að skipuleggja framtíðina, ég flýt bara einhvernveginn með straumnum. En draumurinn er nú samt að leikstýra annari stuttmynd og að fá að skjóta mynd í fullri lengd, en sá draumur gæti hugsanlega ræst í náinni framtíð.

Stuttmyndin „Skuggsjá“ eftir Magnús Ingvar Bjarnason hefur vakið verðskuldaða athygli

Gamanmyndahátíð Flateyrar verður haldin í þriðja sinn, dagana 13-16 september á Flateyri.

Á Gamanmyndahátíð Flateyrar er gleðin og húmorinn við völd, þar sem sýndar eru bæði gamlar og nýjar íslenskar gamanmyndir. Á hátíðinni eru sýndar yfir 20 íslenskar gamansamar stuttmyndir, þá mætir heiðursgestur með gamla klassíska gamanmynd, auk þess sem boðið verður upp á gamansama leiksýningu ásamt lokahófi og geggjuðu sveitaballi.

Hátíðin hefur verið vel sótt undanfarin ár en tæplega 700 manns mættu á viðburði hátíðarinnar í fyrra. Keppt er um fyndnustu mynd hátíðarinnar með áhorfendakosningu og hefur kvikmyndaskólamyndum iðulega gengið vel í þeirri kosningu, enda margar frábærar gamanmyndir komið í gegnum skólann undanfarin ár og ekki verður breyting á því í ár.

Enn er hægt að sækja um, með því að senda link á myndina ásamt nafni leikstjóra og framleiðsluári á netfangi ej@glama.is

Útskriftarbæklings  Kvikmyndaskóla Íslands á vorönn er jafnan beðið með mikilli eftirvæntingu af öllum þeim sem fylgjast með starfsemi hans.

Nú er hægt að nálgast hann stafrænt hér á heimasíðu skólans og stutt í að prentuð útgáfa verði einnig  tilbúin.

Ritið gefur góða mynd af því efni sem nemendur skila af sér við útskrift auk annarra verkefna sem nemendur hafa skilað af sér á önninni. Þá skrifa deildarforsetar greinar til kynningar á deildum sínum  en annars er sjón sögu ríkari.

Útskriftarbæklingur á vorönn kominn á vefinn

Frostbiter er íslensk hryllingsmyndahátíð sem haldin verður á Akranesi 10-12.nóvember næstkomandi og meðal mynda sem sýndar verða eru verk eftir nemendur Kvikmyndaskólans.

“DONOR”

Eftir að ung kona vaknar á óhugnanlegum spítala verður henni ljóst að eithvað skelfilegt hefur átt sér stað. Aðeins eitt er ljóst: Hún verður að komast út

Myndin er eftir Guðna Líndal Benediktsson sem er útskrifaður frá deild Handrita og leikstjórnar hjá Kvikmyndaskólanum. Guðni bæði skrifar handritið og leikstýrir og var myndin tekin upp í sumar í Edinborg með dyggum stuðningi fleiri nemenda frá skólanum.

“HEL”

Á gömlum og niðurníddum spítala hleypur Baldur á undan óttanum í gegnum svakalega atburðarás sem byrjar þegar einn hjúkrunarfræðingur hverfur af næturvaktinni

Myndin er eftir Ásþór Aron Þorgrímsson sem er útskrifaður úr deild Leikstjórnar og framleiðslu.

Við hvetjum ykkur eindregið til að missa ekki af þessari spennandi hátíð !

Frostbiter, það “versta” úr íslenskri kvikmynda flóru

Í dag hefjast sýningar á verkefnum nemenda Kvikmyndaskóla Íslands og er dagskrána næstu daga að finna hér fyrir neðan.

Allir eru velkomnir á sýningarnar og er frítt inn. Sýningarnar eru í Bíó Paradís.
FRÍTT INN OG ALLIR VELKOMNIR

Miðvikudaginn 18 maí -Leikstjórn/Framleiðsla & Skapandi Tækni
Kl: 13:00 – AUG 103 -Auglýsingar – 1.önn deild 1
Kl: 13:05 – TÓN 103 -Tónlistarmyndbönd – 1.önn deild 1
Kl: 13:15 – STU 106 -Stuttmynd – 3.önn deild 1
Kl: 13:30 – HEM 104 -Heimildarmyndir – 4.önn deild 1

Kl: 15:15 – PILOT / 2. og 3.önn deild 2 / 2.önn deild 1 / 3.önn deild 4
Kl: 16:00 – KVM 204 / KLM 204 -Myndir án orða – 2.önn
Kl: 17:00 – KVM 304 / KLM 304 –Heimildarmyndir- 3.önn
Kl: 17:45 – MYN 104 – Endurgerðar senur út bíómyndum 3.önn allar deildir

Fimmtudaginn 19 maí -Handrit/Leikstjórn
Kl: 13:00 – LOH 206 – 2.önn heimildarmyndir
Kl: 14:45 – LOH 306 – 3.önn stuttmyndir

Kl: 20:00 -23:00 Útskriftarverkefni
Leikstjórn/Framleiðsla – Skapandi Tækni -Handrit/Leikstjórn

Föstudaginn 20 maí – Kjarni
1.önn og kjarni
Kl: 13:00 – TÆK 106 – Mínútumyndir 1.önn allar deildir
Kl: 14:00 – LOK 106 – Lokaverkefni hjá 1.önn allar deildir
Kl :15:00 – TÆK 206 –Kynningarmyndir 2.önn allar deildir

Kl: 20:00 -23:00 Útskriftarverkefni
Leiklist

Útskrift verður laugardaginn 21.maí. Kl 13:00 í Bíó Paradís

Þann 23. febrúar fengum til okkar fyrirlesara, hana Valdísi Ösp Ívarsdóttur fíknifræðing sem hefur undanfarið verið með fyrirlestra og umræður í tengslum við #metoo byltinguna.  Inntak þessa fyrirlesturs var “Hvar mörkin liggja” á milli valdníðslu, áreitis og kynferðisofbeldis í samskiptum í kvikmyndaumhverfinu, í skólastarfi og í kvikmynda iðnaðinum. Við viljum gera kvikmyndir um öll málefni í samfélagi okkar og líka viðkvæm efni og þess vegna er mikilvægt að mörkin séu skýr hjá öllum innan kvikmyndageirans. Mikilvægt er að bera virðingu fyrir hvert öðru, hvort sem um ræðir kennara, leikstjóra, leikara eða kvikmyndagerðarfólk og að virða mörkin í starfsumhverfi okkar svo traust sé til staðar.  Við viljum öruggt starfsumhverfi til framtíðar.

Mikilvægt er að minna á að innan skólans er viðbragðsteymi, sem tekur á eineltis-, ofbeldis- og áreittnis málum. Teymið skipa Hlín Jóhannesdóttir, Friðrik Þór Friðriksson, Hrafnkell Stefánsson og Inga Rut Sigurðardóttir og geta þau kallað til og vísað málum til óháðs sérfræðiaðila. Einnig er hægt að hafa samband við nemendafélagið um milligöngu, Öldu Rós Hafsteinsdóttir og Elfar Þór Guðbjartsson.

Mjög vel var mætt á fyrirlesturinn og mikilvæg mál rædd og skoðuð og við þökkum Valdísi kærlega fyrir

Sigríður Bára Steinþórsdóttir, útskrifaðist frá Leiklist vorið 2018 og hér má njóta hennar “showreel”

Við óskum henni innilega til hamingju og fylgjumst spennt með framtíðinni

Sigríður Bára Steinþórsdóttir, útskrifuð frá Leiklist

Í vikunni heimsóttu nemendur úr Listaháskóla Íslands Hilmar Oddsson, rektor Kvikmyndaskóla Íslands hér í skólanum en þau eru nemendur á námskeiði á meistarastigi Listaháskóla Íslands sem heitir Rannsóknir á íslenskri tónlist.

Nemendurnir á áðurnefndu námskeiði stunda nám í tónsmíðum við LHÍ og eru rannóknir og rannsóknarvinna hluti af því námi. Hjálmar H. Ragnarsson, fyrrverandi rektor LHÍ en hann kennir þann hluta námskeiðsins þar sem tónlist Jóns Leifs er í brennidepli og er lögð áhersla á greiningu á verkum hans og áhrif þjóðlagahefðarinnar. Hjálmar segir þátttakendur á námskeiðinu kynna sér ýmis gögn varðandi rannsóknir á lífi og störfum Jóns, og hafi þau m.a. heimsótt handritadeild Lansbókasafns – Háskólabókasafns, kynnt sér mismunandi rannsóknaraðferðir og hvernig rannsóknir geta orðið kveikja að öðrum verkum því tengd.  Í þetta sinn heimsótti hópurinn Kvikmyndaskólann og rektor hans  í sama tilgangi en  kvikmynd Hilmars um tónskáldið, „ Tár úr steini“ flokkast undir rannsóknir á ævi Jóns Leifs.

Nemendurnir sem komu í Kvikmyndaskólann síðasta  mánudag  heita Adam Buffington, Birgit Djupedal, Sohjung Park, Tom Tukker og Vera Arnardóttir.

Nemendur LHÍ heimsækja rektor Kvikmyndaskólans

Velgengni Hrúta, kvikmyndar Gríms Hákonarsonar, hefur ekki farið fram hjá neinum kvikmyndaáhugamanni. Það er einstaklega ánægjulegt að geta þess að 12 fyrrverandi nemendur Kvikmyndaskóla Íslands unnu ýmis störf við gerð myndarinnar. Þannig áttum við fulltrúa meðal leikara, í leikstjóradeild, framleiðsludeild, myndatökudeild og leikmyndadeild. Við óskum Þorsteini Gunnari Bjarnasyni, Önnu Sæunni Ólafsdóttur, Vigfúsi Gunnarssyni, Antoni Smára Gunnarssyni, Guðjóni Hrafni Guðmundssyni, Margreti Völu Guðmundsdóttur, Jóni Þór Jónssyni, Karli Pálssyni, Alexander Erlendssyni, Jóni Gauta Jónssyni, Helgu Björg Gylfadóttur og Valgerði Sigurðardóttur hjartanlega til hamingju með vel unnin störf. Já, og til hamingju, Grímur og Grímar með Hrúta og gott starfsfólk.

Velgengni Hrúta: Fjöldi nemenda kom að gerð myndarinnar

Stuttmynd, var nýlega valin til sýninga á International Open Film Festival í Bangladesh úr fjögur þúsund innsendum myndum. Lovísa Lára útskrifaðist úr deildinni Handrit/Leikstjórn hjá Kvikmyndaskóla Íslands vorið 2014.

Mynd Lovísu Láru var valin flokk mynda ungra kvikmyndagerðarmanna,  Young Filmmaker.

Hátíðin hefur verið að fá rosa mikla athygli vegna þess að hún var með 338 dómara sem fóru yfir myndirnar frá öllum heimshornum. Hún er á lista yfir 100 bestu hátíðirnar á FilmFreeway en það val er gert af  kvikmyndagerðarmönnum.
Allir sem sendu inn mynd fengu að keppa um titilinn Country Best hvort sem að myndin var tekin inn á hátíðina eða ekki. Mín mynd var valin á hátíðina og hlaut einnig titilinn Country Best.

Lovísa Lára hefur  ekki enn fengið upplýsingar um hversu margar íslenskar myndir voru sendar inn en segist í öllu falli mjög ánægð að hljóta verðlaunin og að hafa fengið mynd sína sýnda á hátíðinni.

Ég tók upp myndina í maí í fyrra og hún hefur farið ágætan festival rúnt um heim allan. Myndin fjallar um unga konu sem fær send Snapchat skilaboð af sjálfri sér sofandi og uppgötvar sér til skelfingar að einhver er að sitja um hana.Ég skrifaði handrit út frá handriti í fullri lengd sem ég var að vinna í. Sú mynd er um þrjár konur sem að eru að kljást við eltihrella.

Lovísa Lára ákvað að taka eina söguna úr því handriti og gera stuttmynd eftir þeirri sögu, um konu sem var ofsótt af fyrrum sambýlismanni sem beitti hana ofbeldi.

En svo í handritaferlinu ákvað ég að taka út sambýlismannin og bæta við draugi í staðinn. Þannig að konan er í raun  að upplifa ofbelið sem draugagang.  Myndin er með Ágústu Evu Erlendsdóttur í aðal- og eina hlutverkinu en ég fékk mikið af fyrrum kvikmyndaskólanemum með mér í lið við gerð myndarinnar.

Nú þegar hefur Lovísa Lára gert þrjár hryllingsstuttmyndir.

Hrelli,  Það var margt sem myrkrið veit, útskriftamynd Ingu Söndru sem að vann verðlaun sem besta mynd  leiklistadeildar og var einnig valin besta mynd Gullmolans í fyrra en hún gerði einnig myndina  Prómill, sem var útskriftamynd Ársæls Rafns úr leiklist.

Ársæll Rafn er eiginmaður Lovísu Láru og saman eru þau að undirbúa  hryllingsmyndahátíðina Frostbiter í nóvember næstkomandi.

Þegar ég gerði mína fyrstu hrollvekju þá tók ég eftir því að það var enginn vettvangur til að sýna myndina og að lítil hvatning til hryllingsmyndagerðar var til staðar hérlendis.

Það hefur lengi verið draumur minn að sjá hryllingsmyndahátíðir hér á Íslandi og eins og landslagið er þá er algjörlega grundvöllur fyrir því.   Ég hugsaði að það væru örugglega fleiri í sömu sporum, með hryllingsmynd í skúffunni og engan stað til að sýna hana.Markmið okkar er að hvetja íslenska kvikmyndagerðarmenn að nýta íslenska náttúru og okkar óhugnalegu þjóðsögur í hryllingsmyndagerð.

Hátíðin verður haldin á Akranesi og fengu hjónin styrk frá uppbyggingasjóð Vesturlands til þess að halda hana.

Við ætlum að taka inn Íslenskar stuttmyndir þannig að ég vona að sem flestir nemendur eða útskrifaðir nemendur úr skólanum fari að grafa í skúffuna og senda inn myndir.

Við viljum sjá allt, erum jafn spennt fyrir lélegum hrollvekjum og góðum. Enda heitir hátíðin eftir lítið þekktri b-hryllingsmynd sem ber sama nafn.

Heimasíða hátíðarinnar er  í vinnslu og er vonast til að móttaka mynda hefjist í byrjun júlí og standi fram í september.

Enn er því mögulegt að nýta sér frábæru samnemendurna úr Kvikmyndaskólanum, grípa þá og cameru og fara út og gera eitthvað ógnvekjandi.

Stuttmynd Lovísu Láru valin á International Open Film Festival

Niðurstöður leitar

Brúðuleikur verður til í Iðnó – Pilot-verkefni í smíðum hjá nemendum

Stöður 4 deildarforseta

Axlar-Björn, eini fjöldamorðingi Íslands, gengur aftur

Pétur Arnórsson vinnur sem brellumeistari í Kanada

Nýtt fagstjórakerfi tekið upp hjá Kvikmyndaskólanum og frábært fólk komið til starfa

Útskrift haust 2019

Útskriftarmynd Emils Alfreðs Emilssonar hlaut verðlaun fyrir besta handritið

Stuttmyndin „Skuggsjá“ eftir Magnús Ingvar Bjarnason hefur vakið verðskuldaða athygli

Hláturinn lengir lífið

Útskriftarbæklingur á vorönn kominn á vefinn

Frostbiter, það “versta” úr íslenskri kvikmynda flóru

Frumsýningarvika KVÍ hefst í dag

Vel var mætt á fyrirlesturinn

Sigríður Bára Steinþórsdóttir, útskrifuð frá Leiklist

Útskrift Kvikmyndaskólans, vor 2019

Nemendur LHÍ heimsækja rektor Kvikmyndaskólans

Velgengni Hrúta: Fjöldi nemenda kom að gerð myndarinnar

Stuttmynd Lovísu Láru valin á International Open Film Festival

Flýtileiðir