„Hér er engin íslensk sveitasæla, heldur erum við stödd í stórborginni Reykjavík. Nóg er af fiskum í sjónum og ef einhver stendur sig ekki er honum samstundis hent aftur út í. Og það er margt við myndina sem öskrar einmitt á núið.“ Svo kemst gagnrýnandi DV að orði um kvikmyndina Webcam í síðustu viku og gefur verkinu um leið þrjár og hálfa störnu.

Webcam var frumsýnd um miðjan mánuð og hefur vakið verðskuldaða athygli en framleiðandi kvikmyndarinnar, Magnús Thoroddsen Ívarsson útskrifaðist úr Kvikmyndaskóla Íslands fyrir ári síðan.

 „Við Toni höfum verið að gera video með Aroni Braga kvikmyndatökumanni í mörg ár. Þegar við svo réðumst saman í þetta kom í minn hlut að vera  yfir-framleiðandi, aðstoðarleikstjóri og stýra hlutverkavali.“

 Toni er Sigurður Anton Friðþjófsson handritshöfundur Webcam en eftir að hann kynnti Magnús hugmyndavinnu ákváðu þeir saman að ráðast í gerð myndarinnar.

„Uppsprettu Webcam má leita í margra ára samstarfi okkar þriggja sem erum bak við myndavélina og Telmu Huld Jóhannesdóttur. Anna Hafþórsdóttir kom síðar inn í verkefnið. Það er þó gaman að segja frá því að hún fór ekki í prufu fyrir þessa mynd enda hafði hún sannfært okkur í prufu fyrir stuttmynd í kvikmyndaskólanum á sínum tíma.“

Magnús hefur fengist við gerð myndbanda síðan hann fékk sína fyrstu myndbandstökuvél fermingargjöf. Það er óhætt að segja að reynsla hans sé þegar mikil á sviði kvikmyndagerðar enda brá hann sér í öll hugsanleg gervi listgreinarinnar við framleiðslu Webcam:  ljósamanns, hljóðmanns eða förðunarmeistara – jafnvel vatnsdrengs. Magnús sinnti þar að auki ýmsu í eftirvinnslunni eins og aðstoð við klippingar, gerð aukaefnis eða vinnu við samfélagsmiðla.

„Eftir að ég fattaði að kvikmyndun væri meira en bara eitthvað geðveikt til að gera langaði mig verða bestur í því, og nám í KVÍ var eini góði möguleikinn til þess hér á landi.“

Magnús er eins og áður kom fram útskrifaður nemandi úr Kvikmyndaskóla Íslands og hefur margt jákvætt að segja um námið.

„Ég hafði á þeim tíma sem ég velti fyrir mér kvikmyndanámi heyrt að skólinn væri að verða virkilega góður og þegar ég frétti að tólf nemum væri hleypt inn í hverja braut þá gerði ég mér grein fyrir að ég myndi hitta fullt af fólki með sömu ástríðu og ég hef.“

Magnús telur dugnað og skipulag skipta miklu í undurbúningi verkefna og segir námið hafa haft gríðarlega þýðingu fyrir sig.

 „Þessir tugir verkefna sem maður var látinn gera kenndi manni að taka ábyrgð, sýna dugnað og að sinna félagslega partinum við kvikmyndagerð.  Sýndi manni vel hvað skipulag skiptir miklu. Þetta nám þjálfar mann verulega í þessu fagi, ekki bara í að svara því hvaða snúra er til hvers, heldur er um nám að ræða sem kennir manni hvernig maður á að gera þetta.“

Í þau tvö ár sem liðin eru frá útskrift Magnúsar segist hann hafa verið í miklu sambandi við skólafélaga sína úr KVÍ.

 „Ég er í miklu sambandi við nánast alla í bekknum mínum og við hjálpumst mikið að, t.d. við gerð Webcam. Þorlákur Bjarki var hljóðmaður í 6 daga hjá okkur, Lovísa Lára framleiddi í 3 daga og sá um aðstoðarleikstjórn í 4 daga og svo færði hún okkur tvo unga nema úr skólanum sem aðstoðuðu. Við myndina starfaði mjög lítið crew, oft á tímum vorum við bara þrír bakvið myndavélina.  Það má því sannarlega segja að þau sem komu þarna inn hafi spilað nokkuð stór hlutverk.“

Magnús er með nokkur verkefni í vinnslu, þar á meðal er hann að klára að endurskrifa eitt handrit.

„Toni er einnig byrjaður á nýju handriti. En allt gengur frekar hægt útaf þessari bévítans Webcam.“ segir Magnús hlæjandi.

„En við erum auðvitað í skýjunum yfir góðum viðtökum fólks við Webcam, við fórum úr því að sýna verkin okkar á Youtube yfir í almenna dreifingu hjá Senu“ en Magnús bætir við að vonandi verði hægt að byrja tökur á nýju efni í haust.

„En annars er ég að fara að taka upp rapptónleika hjá GKR vini mínum í kvöld í Gamla bíó og er mjög spenntur fyrir því.“

Í skýjunum yfir viðtökum Webcam – viðtal við Magnús Thoroddsen Ívarsson

Dagana 4.-18. ágúst verður WIFT á Íslandi í samstarfi við Kvikmyndaskóla Íslands og RIFF með sumarnámskeið í stuttmyndagerð fyrir stelpur á framhaldsskólaaldri. Þátttakendum verður skipt í tvo aldurshópa, 15-17 ára  og 18-20 ára en námskeiðið er haldið til að bregðast  við skýrslu menntamálaráðherra, úttekt á stöðu kynja og þátttöku í félagslífi framhaldsskólanema.

„Þar kom m.a. fram að myndbandaklúbbar framhaldsskólanna eru í langflestum tilvikum fullskipaðir strákum sem framleiða myndbönd sem eru oftar en ekki mjög karllæg.“ segja þær Ása Helga Hjörleifsdóttir og Dögg Mósesdóttir hjá WIFT og bæta við:

„Við hjá WIFT teljum að þetta sé undirrót þess mikla kynjahalla sem hefur ríkt í íslenskri kvikmyndagerð og höfum þess vegna ákveðið að leggja sérstaka áherslu á stelpur í þessum aldurshóp.“

Hægt er að skrá sig fram að fyrsta degi námskeiðsins og enn eru nokkur pláss laus. Þátttakendum verður skipt í tvo aldurshópa eins og áður segir, stelpur fæddar 1998-2000 annarsvegar og hinsvegar þær sem fæddar eru 1995-1997.

„Á námskeiðinu eru kennd undirstöðuatriði kvikmyndagerðar og því lýkur með gerð stuttmyndar“

Þannig munu  allir þáttakendur í lok námskeiðsins hafa tekið þátt í að skrifa, framleiða, leikstýra, skjóta og klippa eina stuttmynd.  Myndirnar verða svo sýndar við hátíðlega athöfn á RIFF í haust en RIFF verður með sambærilegt námskeið á hátíðinni fyrir stelpur á grunnskólaaldri. Sumarnámskeiðið verður haldið í húsakynnum Kvikmyndaskóla Íslands að Grensásvegi 1 og eru kennarar kvikmyndagerðarkonurnar Ása Helga Hjörleifsdóttir og Dögg Mósesdóttir.

Námskeiðið skiptist í eftirfarandi kennslustundir/daga:

ágúst: Handritsgerð og myndræn frásögn

ágúst: Kennsla á myndavélar / tæknilegur undirbúningur fyrir tökur

11.12., og 13. ágúst:      Tökur á stuttmyndum

14., 17. og 18. ágúst:     Klipping og önnur eftirvinnsla

Yngri hópurinn er fyrir hádegi og eldri hópurinn er eftir hádegi en námskeiðið kostar 20.000 krónur.

Stuttmyndagerð fyrir stelpur á framhaldsskólaaldri. 4-18. ágúst

Kvikmyndin Albatross sem frumsýnd var fyrr í sumar hefur vakið mikla athygli og hlotið jákvæð viðbrögð gagnrýnenda. Snævar Sölvi Sölvason er útskrifaður nemandi úr Handrita- og leikstjórnardeild Kvikmyndaskóla Íslands en óhætt er að segja að hann sé maðurinn á bak við Albatross.

„Ég þurfti að komast í umhverfi þar sem ég gæti eytt tíma með skapandi fólki með brjálaðan áhuga á kvikmyndum.“ segir Snævar en hann segist þegar hafa verið með nokkrar hugmyndir af bíómyndum í skúffunni þegar námið hófst.

„En í ljósi þess að maður gerir ekki neitt einn í þessari listgrein lá beinast við að sækja sér tengslanet í kvikmyndanámi og varð KVÍ fyrir valinu þar sem ég hafði heyrt góða hluti.“
Snævar segir að það sem hafi gagnast sér mest var stöðug  gagnrýni á hugmyndir og þau handrit sem hann var að vinna í hverju sinni, bæði frá kennurum og samnemendum.

„Smátt og smátt náði maður betur tökum á forminu og það sparar manni óneitanlega tíma og gerir mann almennt að betri kvikmyndagerðarmanni.“

Í huganum segist Snævar löngu hafa verið orðinn kvikmyndagerðarmaður áður en námið hófst.

„En á meðan maður er ekki búinn að gera neitt þá er maður það ekki. Í stað þess að fá mér enn eitt skiptið sumarvinnu síðasta sumar ákvað ég því að gera frekar bíómynd. Ég vissi að ef ég ætlaði að gera myndina vel, þyrfti ég að einskorða mig við einfalda umgjörð enda peningar af skornum skammti fyrir unga og reynslulitla kvikmyndagerðamenn.“

Heimabær hins unga og stórhuga kvikmyndagerðarmanns, Bolungarvík, varð því strax fyrir valinu sem sögusvið.

„Þar vissi ég að ég gæti fengið „location“, mat og gistingu fyrir slikk. Mér var líka kunnugt að auðveldara er að láta ódýra mynd „lúkka“ vel ef hún gerist utandyra og sérstaklega ef náttúran er falleg. Fyrr en varði var ég byrjaður að skrifa sögu um golfvallarstarfsmenn í Bolungarvík sem þrá að elta drauma sína.“

Snævar er ekki í nokkrum vafa að útskriftarnemendur úr KVÍ standi saman og segir að sambandið milli nemenda að námi loknu sé gott.

„Minn árgangur er allavega mjög samheldinn og leitum við til hvors annars óspart. Það á eftir að sjást margt meira frá árgangnum sem hóf nám haustið 2012.“

Næsta verkefni Snævars er þegar komið í vinnslu.

„Sagan fékk styrk hjá Kvikmyndasjóð Íslands og er ég að leggja lokahönd á handritið. Svo byrjar boltinn að rúlla almennilega eftir það.“

Stuttmynd  Elsu G. Björnsdóttir, „Sagan endalausa“ vann til verðlauna á  listhátíðinni Clin d´Oeil  í Reims í Frakklandi um síðustu helgi.

Hátíðin er haldið á tveggja  ára fresti  og hittist þar heyrnarskert listafólk úr öllum greinum til að kynna verk sín.

„Döff listamenn um allan heim sækja um að komast á þessa sýningu með sín verk því þarna er hægt að búa til ótrúlega gott tengslanet, kynnast og sjá aðra performera.“ Segir Elsa.

„Ég sendi mína stuttmynd auðvitað út enda er það mikið tækifæri að komast út á hátíð af þessu tagi.“

Í  ár voru 5000 manns samankomnir í borginni í tengslum við hátíðina. Þátttakendur sjálfir  fá allan kostnað greiddan  en Elsa er himinlifandi að auk þess að  vera boðið á hátíðina hafi hún unnið til veglegra verðlauna.

Elsa  útskrifaðist úr leiklistardeild Kvikmyndaskóla Íslands  árið 2010 og hefur síðan fengist við gerð eigin mynda. Hún segir að stuttmynd  sín fjalli um upplífun „döff“  barna sem voru uppi á þeim tíma sem táknmál var bannað um allan heim, 1880 til 1980, eða  í 100 ár.

„Ætlast var til að heyrnarskertir skildu allt með því að lesa af vörum og var þeim bannað að tjá sig á táknmáli. Þau ættu einnig að sýna nú fólki sem heyrir hvað þau  er nú dugleg að tala. Myndin er köld upprifjun frá þessu timabili. “

Mynd Elsu  er hljóðlaus en þá leið valdi hún i þeim tilgangi  upplifun áhorfandans yrði sem líkust upplífun barnanna sem fjallað er um.  Þannig er áhorfandanum ekki gert auðvelt að skilja það sem fram fer.   Stuttmyndina kallar Elsa “Söguna endalausu” (The Endless Story) af þeirri einföldu ástæðu að enn glíma heyrnarskertir við að svipuðum aðferðum sé beitt  og þekktust á þessum árum.

„Ég er auðvitað upp með mér, algerlega sveif upp á bleikt ský við að vinna bestu myndina. Aðeins sex verðlaun eru veitt þarna og þau eru fyrir bestu  “youth2 myndina, bestu “animation” myndina, bestu leikkonuna, leikarann og  leiksstjórann og svo besta myndin overall… og já í þetta sinn ákvað frönsk sjónvarpsstöð að styrkja vinningshafann fyrir bestu myndina um 1000 evrur!“

Hún bætir við að hún hafi því  fengið fyrstu fjármunina  til að framkvæma næsta verkefni  enda skorti sig ekki hugmyndirnar, miklu frekar fjármunina í þessari dýru grein.

„Þetta kemst næst því að vinna óskarinn fyrir mig. Verðlaununum  fylgir að fólk tekur eftir verkefnunum mínum, sækist eftir að sjá verkið og auðveldara verður að koma myndinni á fleirri hátíðir. Að sjálfsögðu vita núna allir í döffheimnum um allan heim hver ég er og ég get ekki sagt annað en að þetta var það besta sem hægt er að koma fyrir döff listamann eins og mig á eyju lengst út í  Atlantshafi. Hverjar eru eiginlega líkurnar á að svona gerist?“

Stuttmynd Elsu G. Björnsdóttur vinnur aðalverðlaun í Reims

Myndin Albatross var frumsýnd í síðasta mánuði en eins og fram hefur komið á Facebook-síðu okkar er Snævar Sölvi Sölvason, höfundur myndarinnar, útskrifaður nemandi úr Handrita- og leikstjórnardeild Kvikmyndaskóla Íslands.

Sölvi Snær leikstýrði myndinni og skrifaði handritið en fleiri nemendur Kvikmyndaskólans eiga þó sinn skerf  í kvikmyndinni Albatross. Logi Ingimarsson, Erla Hrund Halldórsdóttir og Jónína Guðbjörg Guðbjartsdóttir eru útskrifuð eru úr Skapandi tækni en Jónína er raunar einnig útskrifuð úr Leiklist, eins Gunnar Kristinsson en hann leikur burðarhlutverk í Albatross.

Það er ekki heiglum hent að fjármagna gerð kvikmyndar í fullri lengd en framleiðendur Albatross leituðu á náðir velviljaðra gegnum Karolina Fund og náðu settu takmarki til að framleiðslan gæti átt sér stað. Raunar hafa sömu framleiðendur sagt frá því að einnig megi þakka Bolvíkingum fyrir sitt rausnarlega framlag til gerðar Albatross en þar var myndin tekin upp í fyrrasumar.  Framlag þeirra mun m.a. hafa verið í formi gistingar fyrir þá sem störfuðu í tökum fyrir vestan en þar hafa nú sýningar hennar slegið ærlega í gegn og aukasýningum bætt við.

Albatross hefur fengið jákvæða gagnrýni en bæði Morgunblaðið og Poppland á Rás 2  gáfu myndinni 3 1/2 stjörnu. Gagnrýnandi Morgublaðsins, Hjördís Stefánsdóttir sagði í lokaorðum sínum um kvikmyndina:  „Það er mikil kúnst að fá þéttsetinn bíósal til að hlæja í kór en Albatross teyminu tekst það og sannar þar með að flest er hægt með eldmóðsins vilja að vopni.“

Albatross slær í gegn með KVÍ teymi í sínum röðum

Nokkrir útskrifaðir nemendur Kvikmyndaskóla Íslands starfa hjá fyrirtækinu Tjarnargötunni en þeir leiddu nýlega saman gerð nýrrar Hámarks-auglýsingar.

Við sögðum nýlega frá störfum Freys Árnasonar, útskrifuðum nemanda úr Handritum/leikstjórn hjá Kvikmyndaskóla Íslands við tónlistarmyndbönd en nú er komið nýtt efni frá honum, áður nefnd auglýsing þar sem hann vinnur með Tómasi Inga Doddasyni, einnig útskrifuðum nemanda KVÍ, úr leiklistardeild.

„Tjarnargatan er svona lifandi framleiðslufyrirtæki. Við tökum oft verkefni og útfærum og í öðrum tilvikum eins og þessu byrjum við bara með tómt blað og tökum verkefnin frá A-Ö„ segir Freyr í samtali við vef KVÍ en þess má geta að Freyr og Tómas Ingi höfðu auglýsinguna gagnvirka og gefa áhorfandanum skemmtilega valmöguleika við áhorfið.

Hámarks auglýsingarnar í gegnum tíðina hafa alltaf verið mjög skemmtilegar og eftirminnilegar svo við fórum að grínast með það hvað það væri fyndið að sjá einhverjar allt aðrar týpur en þá Arnar og Ívar í þessum aðstæðum.

Tæplega 10.000 hafa horft á auglýsingarnar á YouTube og svo virðist sem hugmynd þeirra hafi náð að lyfta brúnum margra. Hér er hægt að skoða hverja þeir félagar fengu til að liðs við sig í verkefninu og sjón er sannarlega sögu ríkari.

Hámarksauglýsingar KVÍ útskrifaðra nemenda vekja kátínu

Við sögðum nýlega frá boði Þórðar Pálssonar á Palm Springs ShortFest en mynd hans Brothers, hefur nú hlotið  Special Mention í flokknum Best Live Action Short over 15 minutes. Það er reyndar fleira um að vera hjá Þórði þessa dagana en hann er önnum kafinn við undirbúning á kynningu verkefna fyrir Nordic Talents 2015.

Ari Kristinsson hjá Kvikmyndamiðstöðinni hafði samband við mig og spurði hvort þau mættu senda lokamyndina mína frá The National Film and Television School í Nordic Talents 2015, því þau væru að leita að Íslendingum til að sækja um.

Skilyrði til þátttöku er raunar að umsækjandi sé í MA námi í einhverjum af þessum stærstu kvikmyndaskólum í Skandinavíu en að sögn Þórðar fá Íslendingar undanþágu og því dugir honum að vera við nám í The National Film and Television School. Tvö hundruð þátttakendur fá að sækja um en aðeins fjörtíu og fimm komst í annað val og er svo fimmtán þátttakendum boðið að kynna.

Ég komst inn með 2 verkefni en þannig ég er með 2 verkefni af þessum 15 og er sá eini sem fæ að kynna fleiri en eitt. Ég mun kynna 6 þátta mini-seriu og kvikmynd í fullri lengd.

Þórður segir að lokum að hann standi einn að kynningu verkefnanna á meðan margir gera þetta í samvinnu við annan aðila.

Þetta er auðvitað mjög mikill heiður að hafa verið valinn og satt best að segja er ég bara mjög hissa á því að hafa komist inn og hvað þá með tvö verkefni. Þar sem samkeppnin er mjög hörð um þessi 15 sæti.

Þórður segir að þarna muni hann hitta marga og kynna fyrir framan þekkt og valdamikið fólk úr skandinavíska kvikmyndaiðnaðinum.

Þetta mun því hjálpa mér mikið með þau áform sem ég hef fyrir sjálfan mig.  Ég er nú þegar byrjaður að hitta og ræða við fólk um að koma þessum verkefnum í framleiðslu.

Þórður Pálsson fær Special mention í Palm Springs Shortfest

Níu nemendur, útskrifaðir úr Kvikmyndaskóla Íslands, tóku þátt í gerð sumarsmellsins í ár, Bakk sem frumsýnd var í maí síðastliðnum.

Bakk hefur fengið frábæra dóma og notið mikilla vinsælda en þar er fjallað um tvo æskuvini sem ákveða að fylgja í fótspor föðurs annars þeirra og bakka hringinn í kringum Ísland til styrktar langveikum börnum.

Nöfn þeirra nemenda úr KVÍ sem komu að gerð myndarinnar eru Logi Ingimarsson, Hrefna Hagalín, Bergþóra Ólöf Björnsdóttir, Heiðar Eldberg Eiríksson, Baldvin Vernharðsson, Gunnar Kristinsson, Bent Kingo Andersen, Gunnar Ingi Gunnarsson og Róbert Orri Pétursson.

Níu útskrifaðir úr KVÍ tóku þátt í Bakk

Vinsældir vefsins Stuck in Iceland hafa aukist jafnt og þétt og áhugafólk um allt það sem Ísland hefur að bjóða fylgjast þar grannt með.

Nemandi Kvikyndaskóla Íslands vakti athygli vefsins nýlega fyrir myndir og myndbönd af íslenskri náttúru og nú hefur mbl.is bæst í hóp áhugasamra um frábæra vinnu Garðars Ólafssonar á þessu sígilda myndefni. Áhugi Garðars á ljósmyndun kviknaði fyrir um sex árum og leiddi hann í skólann og það má með sanni segja að hann sé á réttri hillu.

http://stuckiniceland.com/south/drone-video-icelandic-natural-wonders/

http://www.mbl.is/frettir/innlent/2015/06/09/eldgosid_i_eyjafjallajokli_magnad/

Myndir nemanda í KVÍ af íslenskri náttúru vekja athygli netmiðla

Fréttir Í fréttum var það helst