Vegir kvikmyndaskólanema geta verið órannsakanlegir og þræðirnir geta legið víða að útskrift lokinni. Kristín Margrét Kristmannsdóttir, útskrifaðist úr leiklistarnámi Kvikmyndaskólans árið 2010.

Í byrjun árs 2015 landaði Kristín Margrét Kristmannsdóttir útgáfusamningi fyrir barnabók og þessa dagana eru hún önnum kafin við kynningu verksins sem kom út fyrir skemmstu undir nafninu Vikkala Sól. Bókin hefur gengið vel og prýddi m.a. nýlega annað sæti metsölulista barnabóka hjá Eymundsson.

Áhuginn fyrir því að skrifa hefur alltaf verið til staðar. Þetta er eitthvað sem ég þarf að gera, á meðan sumir finna þörf hjá sér t.d til að syngja af hjartans list eða mála, þá skrifa ég, af því ég þarf þess. Á erfitt með að fá fólk með mér í búðir, því ég enda yfirleitt ráfandi um bókabúðir eins og smákrakki í nammibúð og þá helst í barnabókadeildinni. Mér finnst heillandi að nýta ýmindunaraflið í skrif, heimur barnabókanna er eitthvað svo frjáls og án takmarkana.

Þetta er fyrsta bók Kristínar Margrétar og hún segir það sannkölluð forréttindi að fá tækifæri til að sjá drauma sína rætast og fylgja þeim eftir.

Ég geri mér fulla grein fyrir þessu og hef alveg þurft að klípa mig til að átta mig á því að þetta í rauninni að gerast! Að baki þessu stendur þó hörku vinna sem ég hef þurft að leggja allt mitt í.

Kristín Margrét nýtur þess að skapa og sinna listsköpun í fjölbreyttu formi og fæ útrás fyrir hana á ýmsa vegu. Leiklistarbakgrunnur nýtist henni á ýmsa vegu þó þessa stundina sé það sköpun við bókaskrif sem á hug hennar og hjarta.

Allar upplifanir hafa áhrif á skrifin, lífið hefur áhrif á skrifin. Leiklistarnámið hjálpar mér við þætti tengda starfinu, klárlega. Upplestrarnir sem fylgja þessu verða t.d áhrifameiri og skilmerkari og þar nýtist vel það sem ég hef lært.

Eftir útskrift segist Kristín Margrét hafa verið lánsöm varðandi verkefni. Hún fékk tækifæri til þess að spreita sig við flest störf innan kvikmyndageirans, bæði sem leikari, við framleiðslu, leikstjórn og við gervahönnun,

Ég lék í auglýsingum, stuttmyndum og á leiksviði. Leikverkið Völuspá sem sýnt var í Norræna húsinu stendur þar upp úr, en þar steig ég á svið ásamt fjölda hæfileikaríkra leikara og á meðal þeirra voru útskrifaðar leikkonur úr Kvikmyndaskóla Íslands. Undanfarið hef ég fengið tækifæri til þess að spreyta mig sem blaðamaður sem ég hef ansi gaman af. Á milli þess sem ég starfa sem yogakennari sem á hug minn og hjarta og hefur vissulega hjálpað mér að halda fókus þegar maður er með marga bolta á lofti.

Kristín Margrét segist njóta sín best í fjölbreyttu og skapandi starfsumhverfi og því leitast hún eftir að starfa við slík verkefni.

Ég reyni samt að spá ekkert of mikið í hvað verður. Heldur geri mitt besta í því sem ég tekst á við hverju sinni og sé svo hvert það leiðir mig. Það eru spennandi verkefni á vinnuborðinu sem bíða eftir að komast í farveg. En ég reyni eftir bestu getu að doka við og njóta þessa ævintýris sem ég er stödd í núna.

Kvikmyndaskóli Íslands óskar Kristínu Margréti til hamingju með bókina nýju og óskar henni alls góðs í framtíðarverkefnum sínum.

Lífið hefur áhrif á skrifin – Kristín Margrét Kristmannsdóttir útskrifuð úr leiklist gefur út barnabók

Það voru fagnaðarfundir þegar kollegarnir, skólastjórarnir og leikstjórarnir, Gísli Snær Erlingsson frá (LCA) í Singapore og Hilmar Oddsson frá KVÍ hittust á vinnuráðstefnu Cilect í München í vikunni.

Þema ráðstefnunnar var “Working with actors” og þar skiptust kvikmyndaskólafólk, alls staðar að úr heiminum, á skoðunum á því mikilvæga atriði hvernig best væri að haga kennslu í leikstjórn, með sérstakri áherslu á samstarfið við leikara. Ráðstefnan var haldin í Hochschule für Fernsehen und Film, en það er einmitt skólinn þar sem okkar maður lærði sitt fag, fyrir allnokkru síðan.

Fagnaðarfundir í München – Rektor Kvikmyndaskólans á ráðstefnu Cilect

Þó nemendur Kvikmyndaskóla Íslands stundi enn nám sitt við skólann  fá þeir oft tækifæri til að koma að spennandi verkefnum utan hans. Music Reach myndbönd höfðu samband við einn af kennurum Kvikmyndaskólans  fyrir nokkru í leit að fólki til að taka upp Airwaves 2015 og varð það kveikjan að skemmtilegu samstarfi.

Ég kom þeim í samband við hóp af nemendum skólans og þau stukku á tækifærið. Þetta voru þau Stefán Mekkinósson, Vigdís Eva Steinþórdóttir, Arnar Freyr Tómasson, Valgerður Árnadóttir (Öll á 1. önn deild 2) og Bjarni Friðsteinsson á 3.önn deild 2.

segir Stefán Loftsson kennari við Kvikmyndaskóla Íslands og bætir við að RÚV hafi sent upptökur nemendanna beint.

Þetta var einnig sent beint á netinu í gegnum Oz appið og þar gat fólk út í heimi horft á tónleikana. Krakkarnir stóðu sig frábærlega og ég veit að þau eiga eftir að fá fleiri svona verkefni í framtíðinni eftir þessa glæsilegu frammistöðu.

Upptökur nemendanna finnið þið hér. 

Nemendur Kvikmyndaskólans unnu að upptökum fyrir Airwaves

Framleiðendur og leikstjórar sem einbeita sér að barnaefni eru ekki ýkja margir á Íslandi og líklegt að þar séu tækifæri sem vert er að skoða nánar fyrir kvikmyndagerðarfólk. Afþreyingarefni fyrir börn og unglinga er í stöðugri þróun og tækninýjungar kalla á fleiri áskoranir fyrir þá sem vilja framleiða barnaefni. Kennsluefni og gagnlegar upplýsingareru í auknu mæli að færast yfir á myndrænt form og mikið verið að vinna með samspil myndefnis, samtala, ritmáls og verklegra tilrauna.

Í alþjóðlegu samhengi eru tækifærin mörg til samframleiðslu og dreifingarmöguleika, fjöldi styrkja eru í boði fyrir þá sem vilja gera myndefni fyrir börn og helstu kvikmyndasjóðir hafa yfirlýsta stefnu um að barnaefni fái sérstaka athygli og mögulega forgang.

Deildarstjóri leikstjórnar og framleiðslu fór á dögunum á kvikmyndahátíðina CINEKID sem haldin er í Amsterdam ár hvert. CINEKID er einnig vettvangur fyrir framleiðendur frá löndum heims, dreifingaraðila og sölu fyrirtækja til að bera saman bækur og kynna verkefni sín. Einnig er á CINEKID handritsvinnustofa þar sem nokkrir valdir handritshöfundar vinna í handritum sem ætluð eru börnum. Þarna var líka viðamikil ráðstefna þar sem fjallað var um framtíð kvikmyndagerðar fyrir börn í víðu samhengi og þar bar margt á góma og allt var það mjög áhugavert og upplýsandi.

Rætt var um áhorfendur framtíðarinnar og hversu mikilvægt er að skilja að börn nútímans lifa og hrærast í heimi afþreyingar og fjölmiðla. Mörg hver eru orðin flugfær á spjaldtölvur á þriðja aldursári og það er gríðarleg áskorun að halda í við þessar upprennandi kynslóðir og nýta tækifærin sem þessi nýja vídd býður og jafnframt átta sig á og gæta sín á hættunum sem þessu fylgja.

Innreið Youtube í afþreyingarheim barna virðist rétt að byrja og nokkur erindi komu inn á Youtube, kosti, galla og hvert stefndi. Mikið var fjallað um tengingu milli myndefnis, tölvuefnis og gagnvirks efnis og heill fyrirlestur var um hinn vinsæla leik Minecraft. Einnig var farið nokkuð vel í stöðu sýndarveruleika og helstu þróunar í þeim geiranum.

Á CINEKID eru kvikmyndir fyrir börn sýndar daginn út og inn í nokkrum kvikmyndasölum, svæðið er afmarkað og er eins og pínulítið þorp, göngugata liggur þar í gegn og þar eru sölutjöld og básar, matarilminn leggur um og börnin fá ýmistækifæri til að leika sér og sprella. Mikið er um manninn og greinilegt að hátíðin er vinsæl. Eitt af því mest spennandi á svæðinu er hið svo kallaða MEDIALAB, sem er fjölbreytt tilraunastöð í stóru opnu húsnæði þar sem börn geta prófað að “animera” leikstýra, kvikmynda og klippa, prófa sýndarveruleika, farið í gagnvirka tölvuleiki fyrir framan risatjald og svo mætti lengi telja. Sannkallaður ævintýraheimur sem öll börn ættu að geta notið sín í.

Þarna er vettvangur sem sannarlega er þess virði að skoða.

Tækifærin í framleiðslu barnaefnis – Hlín Jóhannesdóttir segir frá CINEKID hátíðinni

Leszek Daszkowski er pólskur nemandi á fyrstu önn Skapandi tækni en auk þess að vera ekki íslenskumælandi glímir hann við heyrnarleysi.
Verkefnin í Skapandi greinum eru ólík en í einu þeirra ætti verkefnaskilin að fela í sér mínútu hljóðskrá þar sem viðfangsefnið er annahvort tilfinning eða atburður. Verkefninu skyldi fylgja viðeigandi ljósmynd og valdi Leszek þemað „snjóflóð“.
Við fengum með aðstoð túlks Leszek til að spjalla við hann um verkefnið og hvernig honum gekk að leysa úr því.

Ég er á tæknideild en markmiðið mitt var aðalega að læra kvikmyndatöku og klipp. Þessi kúrs snýst aðeins um að læra hljóð og mér leist ekkert á það til þess að byrja með. En svo ræddi Óli Fannar deildarforseti tæknideildar við mig og Gísli starfmaður KVÍ sem hefur sérhæft sig í hljóði og í sameiningu ákváðum við að prófa þetta. Ég settist niður með Gísla og hann kenndi mér á þetta allt saman og sýndi mér hvernig forritið virkaði. Ég er líka ánægður að hafa fengið aðstoð túlks því ef ég var eitthvað óöruggur þá spurði ég túlkinn og gat stuðst við hennar tilfinningu fyrir hljóðinu.

Eðlilega fannst Leszek erfiðast við úrlausn verkefnisins að heyra ekki hvað hann var að gera.

En ef það hljómar bassi þá finn ég hann miklu frekar heldur en til dæmis ef um er að ræða samtal tveggja persóna. Við slíkar aðstæður næ ég mjög illa að meta hljóð. Öllum hávaða og miklum bassatón finn ég fyrir. Ég gat líka lagt hendurnar á hátalarann og fundið þannig titringinn.

Leszek segir góðar innihaldslýsingar á hverju hljóði fyrir sig í hljóðsafni skólans hafa nýst vel við vinnslu verkefnisins.

Notkun lýsinganna gerði mér kleyft að velja þau hljóð sem hentuðu mér best við verkefnið og litu vel út á hljóðstyrksmælinum. En aðeins þar sem eitthvað var skráð við hljóðin gat ég ekki nýtt mér þau.

Segir Leszek og bætir við að svo framarlega ekki er um að ræða hljóðvinnslu samtala gæti vel komið til þess að hann vinni slík verkefni aftur.

Ef það eru drunur eða sprengingar þá get ég alveg unnið með það. Ég játa að þegar ég mætti fyrst í fyrsta tímann þá fannst mér þetta ekkert sérlega skemmtilegt. En eftir að Gísli fór að kenna mér á þetta þá byrjaði mér að finnast þetta mjög skemmtilegt.

Gísli fylgdist vel með mér og kom annaðslagið og leiðbeinti mér. Þess á milli vann ég sjálfstætt.
Verkefnið vann Leszek við í heila viku og það er sannarlega magnað að hlusta á afraksturinn hér.

Finn fyrir hávaða og miklum bassatón – Leszek Daszkowski lætur ekkert stöðva sig í úrvinnslu verkefna

Skapandi tækni er sú deild sem notið hefur hvað mestra vinsælda í Kvikmyndaskóla Íslands. Í henni finna margir sinn vettvang enda um ákvafleg fjölbreytt og skemmtilegt nám að ræða sem gefið hefur útskrifuðum nemendum tækifæri frábær tækifæri til að starfa í kvikmyndagerð.
En hverjir eiga erindi í skapandi tækni? Við fengum Ólaf Fannar Vigfússon til að segja okkur frá deildinni.

Þessi deild er fyrir alla þá sem elska að nota tækni í kvikmyndagerð. Við leggjum áherslu á fjórar megin námslínur; Kvikmyndatöku, klippingu, hljóð og myndbreytingar. Myndbreytingar er samnefnari okkar fyrir tæknibrellur, grafík og litaleiðréttingu.
Þeir sem hafa áhuga á að sérhæfa sig í einhverju af þessu, eða öllu, ættu að sækja um nám í Skapandi tækni. Þessi deild hentar líka fyrir þá sem stefna á að verða leikstjórar en hafa auk þess áhuga á að kynna sér alla tæknivinnu og geta þannig verið meira sjálfbjarga í sínum verkefnum.

Segir Ólafur nemendur læra mun fleira um kvikmyndagerð en það sem einvörðungu snýr að tækninni.

Nemendur í Skapandi tækni læra líka handritagerð, leikmyndagerð, listasögu, ljósmyndun og svo fá þau náttúrlega tækifæri til að gera eigin stuttmyndir og heimildarmyndir.

En eins og Ólafur tók fram í upphafi viðtalsins skal ekki gera lítið úr því að námið í Skapandi tækni er mjög bundið við allt sem lýtur að notkun tækja og leiðir það hugann að aðgengi nemenda að tækjabúnaði skólans.

Við vorum að fá tvær nýjar vélar frá Black Magic Design, Ursa 4K og þær eru að skila ótrúlega flottu myndefni. Nemendur hafa verið að nota þær í útskriftarverkefni sín og einnig notuðum við þær í upptökur á Pilot sem við gerðum um daginn. Pilotinn er okkar stærsta samvinnuverkefni í skólanum þar sem allar deildir skólans koma að. Námið hérer mjög verklegt og byggir reyndar að miklu leyti á að nemendur vinna í samstarfi og það er einn af kostunum við námið hér tel ég, þannig myndast stemning og nemendur byrja að byggja upp tengslanet.Einnignotum við mikiðCanon vélar í hin og þessi verkefni. Eins höfum við góðan aðgang á að leigja upptökuvélar á góðu verði.

Ólafur bætir við að öllum nemendum standi til boða afnot af iMac-tölvum.

Við vorum t.d. að kaupa núna nokkrar nýjar 5K iMac-tölvur til að geta eftirunnið 4K efni frá a-ö. En að sjálfsögðu mega nemendur nota sínar eigin tölvur ef þeir vilja frekar. Við erum sífellt að bæta tækjakostinn og leggjum upp úr því að vera í takt við tímann í þeim efnum.

Eftirvinnsluforrit gegna stöðugt mikilvægara hlutverki í kvikmyndagerð nútímans en hvert er aðgengi nemenda að námsefni þeim tengdum?

Þar erum við mjög sterk og leggjum áherslu á að vera með það nýjasta í dag, ekki síst það sem bransinn notar. Við notumst við öll forritin frá Adobe; Premiere Pro CC, Photoshop og After Effects. Eins erum við líka með Final Cut fyrir þá sem vilja. Í hljóðvinnslunni notum við Pro Tools.

Myndbreytingalínan vekur forvitni spyrjanda en Ólafur segir hana vera nýja og hannaða til að nútímavæða skólann enn frekar.

Það má segja að þarna séum við að kenna alla tækni sem breytir myndefni á einhvern hátt. Á 1. og 2. önn erum við að kenna á After Effects og Photoshop en á 3.önn læra nemendur grunnatriði í myndbrelluforritinu Nuke. Að lokum leggjum við töluverða áherslu á að nemendur á 3. og 4. önn læri á litvinnsluforrið DaVinci Resolve. Í því ferli fá nemendur að litaleiðrétta efni, jafna lit og contrast og setja ákveðið “look” á myndefnið.

Ólafur segist aðspurður vera hæstánægður með úrval kennara í deildinni Skapandi tækni.
Við höfum á að skipa toppfólki í hverri stöðu. Kennararnir eru reynt fólk úr bransanum með mikla kennsluhæfileika. Hér eru og hafa verið kennarar á borð við Óskar Þór Axelsson, Gunnar Árnason, Kjartan Kjartansson, Valdísi Óskarsdóttur, Elísabetu Ronaldsdóttur, Jörund Rafn Arnarson, Baldvin Z og Besta.
Hann bætir við að auðvitað hafi mun fleiri kennarar komið að kennslu í deildinni en að nefna þá alla yrði endalaus upptalning.

Kennararnir hér eru einna ánægðastir með að ólíkt því sem gerist í öðrum skólum þar sem kennd er tæknivinnsla, þá eru nemendurnir hérna fyrst og fremst í þjálfum til að verða kvikmyndagerðamenn. Auðvitað eru nemendur að sérhæfa sig í hinu og þessu en fyrst og fremst náum við að útskrifa nemendur sem hugsa sem kvikmyndagerðarmenn sem setja sjálfa söguna í fyrsta sæti.

En getur Ólafur gefið gilda ástæðu fyrir því að fólk sæki um í tæknideild KVÍ frekar en annars staðar?

Ég myndi segja að við höfum á löngum tíma náð að byggja upp afar heildstætt tækninám. Við styðjumst við vandaða námskrá og höfum besta fólkið úr bransanum til að kenna. Hér leggjum við áherslu á að nemendur fái tækifæri að vinna með nýjustu myndvinnsluforritin og nú höfum við loks eignast myndavélar sem við getum stolt boðið nemendum til afnota. Það sem mestu máli skiptir er að nemendur sem útskrifast af tæknibraut hafa yfirleitt góða möguleika að fá vinnu eftir nám. Það er alltaf eftisóknarvert fólk sem útskrifast sem kvikmyndagerðarmenn með sérhæfingu á tæknisviði. Þannig að þeir sem standa sig vel í námi eiga góða möguleika á vinnu eftir nám. Rjóminn flýtur alltaf ofan á.

Svo miklu meira en bara tæknin – Ólafur Fannar – deildarforseti Skapandi tækni

Kvikmyndaskóli Íslands opnaði nýlega nýja Twitter-síðu undir heitinu IFS – news. Síðunni er ætlað að vera fréttaveita þar sem komið verður við víða í veröldinni.

Eysteinn Guðni Guðnasson hefur verið fenginn til að ritstýra síðunni og við fengum hann til að segja okkur aðeins frá hugmyndinni bakvið þetta nýja framtak skólans.

Áhugi Kvikmyndaskólans liggur í því að fylgjast með því hvað er að gerast í hinum stóra heimi kvikmyndagerðar í dag. Þá er ég ekki bara að tala um Hollywood og Evrópu, heldur allan heiminn. Okkar markmið er að hafa puttann á púlsinum á því sem er að gerast víða í heiminum og deila því heitasta með þeim sem eru að fylgja okkur á Twitter.

Eysteinn Guðni segir að ekki sé aðeins ætlunin að birta fréttir úr starfi skólans heldur er síðunni ætlað að svara spurningum fólks um það sem er efst á baugi í kvikmyndaheiminum – til dæmis hvaða nýja stjarna er að skjóta upp kollinum í Kóreu eða hvaða mynd er að vinna verðlaun í Brasilíu?

Fylgst verður með öllum heimshornum. Auðvitað koma flestar fréttirnar frá Bandaríkjunum og Indlandi, þar sem flestar myndir eru framleiddar, en það koma líka reglulega fréttir frá minni löndum.

Eysteinn Guðni er 31 árs prestsonur úr Vestur-Húnavatnssýslu og útskrifaðist hann sjálfur úr Kvikmyndaskólanum árið 2005.

Er stoltur að hafa verið í fyrsta árganginum sem útskrifaðist úr tveggja ára námi. Síðan þá hef ég unnið við varðveislu á myndbandsefni hjá Gagnvirkni en síðar vann ég í eitt ár hjá Icelandic Cinema Online. Ásamt nýja starfi mínu hjá Kvikmyndaskólanum er ég líka umsjónamaður unglingahópa fyrir bahá’í samfélagið. Í frítímanum mínum hef ég lengi verið stjórnandi á Kvikmyndir.is og þá sérstaklega haldið utan um íslenskar kvikmyndir.

Þeir sem fylgst hafa með upphafsdögum IFS news hafa ugglaust tekið eftir að Eysteinn leitar fanga víða í efnisöfluninni.

Jú, þetta eru ansi margar síður sem maður er að fylgjast með. Svo les maður í gegnum fullt af fréttum og velur úr það sem er áhugaverðast. En maður gerir þetta af ástríðu og hefur bara gaman af.

Að liggja yfir fréttaefni um kvikmyndir hlýtur að vera einskonar draumastarf fyrir ungan kvikmyndaáhugamann og kvikmyndagerðarmann, eða hvað?

Draumastarfið liggur í því að gera það sem manni finnst skemmtilegt. Það ættu auðvitað allir að leggja sig fram við að gera áhugamálið sitt að atvinnu, hvort sem það er ástríða fyrir umhverfinu, að vinna með börnum eða tónlist. Það vill bara svo til að áhugamál mín eru meðal annars kvikmyndir og internetið. Það sem gerir þetta hinsvegar að draumastarfi er að fá að deila áhugaverðum fréttum með fólki. Mér finnst fátt skemmtilegra en þegar ég sé að fólk er að uppgvötva eitthvað nýtt af því að ég deildi því. Þessvegna vil ég endilega að sem flestir „fylgi“ Twitter síðunni svo að við getum náð til sem flestra.

Fylgst með öllum heimshornum og deilt á Twitter – Eysteinn Guðni segir frá IFS news

Lesendur kannast ugglaust margir við þættina Málið sem sýndir voru á Skjá einum en í honum var tekist á við mörg samfélagsleg málefni og mein. Þættirnir nutu mikilla vinsælda en alls urðu raðirnar fjórar. Daníel Bjarnason, útskrifaður úr Handrit/framleiðsla er einn af lykilmönnunum á bakvið þættina ásamt Sölva Tryggvasyni en þær hafa nú allar verið gerðar aðgengilegar á Vimeo.

Daníel kom fyrst að gerð þáttanna, m.a. sem leikstjóri, eftir dagskrárstjóraskipti á Skjá einum en í raun má segja að þátturinn hafi sprottið úr eldri þáttagerð Sölva, þá undir heitinu Spjallið.

Nýr dagskrárstjóri á Skjá einum leitaði til mín og spurði hvort ég vildi ekki taka við þættinum. Ég sá mikla möguleika hvert fara mætti með þáttinn og hafði auk þess unnið mikið heimildarefni áður. Þar með hófst samstarf okkar Sölva, og gekk það mjög vel. Ég lagði alltaf mikla áherslu á lúkkið á þáttunum og að hann myndi ekki “feel-a” eins og allt annað sem maður sá í sjónvarpi af heimildarefni.

Daníel fannst heimildar- og fréttaskýringaefni vera ábótavant hér á landi en bætir við að þau í Málinu hafi notið góðs af því að fá ríkulegan tíma til að vinna efnið almennilega.

Til að byrja með fékk ég aðeins ákveðna upphæð til að covera laun fyrir sjálfan mig en með tímanum vældi ég út meiri pening. Ég gat rökstutt með ýmsum ástæðum að mig vantaði meira budget. Þarna voru til dæmis drónar fyrst að koma til sögunnar og vorum við með þeim fyrstu til að nýta okkur drónatökur í íslensku sjónvarpi.

Reynsla komst á áhorf Málsins og þátturinn vakti stöðugt meiri athygli. Þannig batnaði samningsstaða Daníels við það að þátturinn hans var ítrekað í hópi þeirra 10 dagskrárgerða sem mest var horft á.

En samt var ég alltaf kominn framúr sjálfum mér og vildi frekar leggja meiri pening í framleiðsluna heldur en að hækka launin og í 3ju seríu breytti ég format-inu og hóf að segja stakar sögur með leiknu efni. Batasaga var fyrsti þátturinn af þeirri gerð en hann sagði frá konu frá Vestmannaeyjum sem barðist við alkohólisma og son hennar sem eyddi barnæskunni í að vera tekinn ítrekað frá mömmu sinni. Svo tókum við sögu Jóa og Guggu sem hentaði líka vel fyrir leikið efni eins og fleira annað sem gerðum.

Þegar vinnslan hófst við gerð fjórðu seríu urðu aftur dagskrárstjóraskipti á Skjánum. Þó Daníel og honum hafi samist vel var hugur hins nýja yfirmanns annarsstaðar varðandi íslenskt efni og þar með lauk framleiðslu á þáttunum Málið.

En við gengum stoltir frá þáttunum okkar sem fengu þrjár Eddutilnefningar og sátu á topplista skjás eins.

Segir Daníel. En hver er ástæða þess að nú eru þessir þættir aðgengilegir?

Ástæðan er í rauninni bara sú að þetta er orðið gamalt efni og Skjárinn er löngu hættur að sýna það. Við pældum í að gefa þetta út á Dvd, en kostnaðurinn var of hár og ljóst að það borgaði sig engan veginn. Svo hefði ég þurft að skipta út miklu af tónlistinni, en það er kosturinn við að vinna í sjónvarpi, stefgjöldin eru coveruð.

Daníel segir að málefnin sem urðu fyrir valinu í þáttagerðinni hafi verið þung, alvarleg og mjög tilfinningarík, ef svo má að orði komast.

Þátturinn tók fljótt þá stefnu, enda vorum við að vinna fyrir áskriftarsjónvarp sem þurfti að selja áskriftir og það er einhvernveginn auðveldast að selja drama.

Barnaníðsþættirnir voru það efni sem hafði djúpstæðust áhrif á Daníel. Upprunalega var því málefni ætlaður einn þáttur en þeir urðu heilir þrír.

Ég og Sölvi eyddum báðir þremur mánuðum í að þykjast vera 9-12 ára stelpur á einkamálum. Vinnan við gerð þáttanna opnaði virkilega augu manns við hversu mikill viðbjóður er til. Þegar við gerðum þátt um nauðgunarlyf þá fengum við að heyra mikið af sögum sem maður hreinlega trúði ekki. Sama má segja um vændisþáttinn og spilafíknarþáttinn.

Til að sinna framleiðslunni fyrir Skjá einn stofnaði Daníel framleiðslufyrirtækið Majestic Productions ásamt Erlendi Sveinssyni. Í nafni þess fyrirtækis hafa þeir framleitt Málið og aðrar seríur fyrir Skjáinn.

Á milli fyrstu og annarar seríu af Málinu gerðum við þætti sem hétu Óupplýst, leikna seríu um drauga og andatrú á Íslandi en þessa dagana hef ég aðallega verið að gera auglýsingar ásamt öðrum margvíslegum verkefnum. Þá gerði ég heimildarmynd fyrir Rúv um handboltamennina Guðjón, Björgvin og Aron sem hét Hringfararnir.

Fleiri seríur sem eru á teikniborðinu og er Daníel í sambandi við Skjáinn um framleiðslu þeirra. Auk þess er hann með handrit í fullri lengd í smíðum ásamt nokkrum öðrum heimildarverkefnum.

Fjöldi útskrifaðra nemenda úr Kvikmyndaskóla Íslands voru virkir þáttakendur í verkefninu Málinu.

Erlendur Sveinsson sem stofnaði Majestic Productions með mér og framleiddi og skaut mikið af þáttunum. Snædís Snorradóttir kom inn í 3ju seríu og framleiddi. Dagur de’medici skaut nokkra þætti ásamt Anton Smára Gunnarssyni. Í crewinu voru margir úr skólanum, svo sem Logi Ingimarsson, Ari Birgir Ágústsson, Jónína Guðbjörg, Eyjólfur Jónsson, Haraldur Ari og margir fleiri. Mjög margir leikarar úr skólanum tóku að sér hlutverk en þar má meðal annars nefna Lönu Írisi Dungal, Vivian Ólafsdóttur, Kristínu Leu, Önnu Hafþórs, Bylgju Babylons, Monika Ewa, Tryggva Frey, Jóhönnu Heiðdal og Ottó Gunnars.

Gengum stoltir frá þáttunum með þrjár Eddutilnefningar – Daníel Bjarnason um þættina Málið

Sketsaþátturinn Punkturinn er þessar vikurnar til sýninga á Stöð 3. Þátturinn hefur vakið athygli en röðin á sér talsverða sögu.

Punkturinn var stofnaður af Tomma Rizzo meðan hann var yfir myndbandsnefnd Menntaskólans í Kópavogi. Hópurinn hefur stækkað á  árunum sem liðin eru frá stofnun, breyst og þróast mikið.

Upprunalega var þetta einkahúmor fyrir nemendur en breyttist fljótt í sketsaþætti. Nokkrir úr hópnum hafa stundað nám og útskrifast úr Kvikmyndaskóla Íslands en þar má helst nefna þær Þórunni Guðlaugs og Tönju Björk sem leika aðalhlutverk í þáttunum. Einnig voru tæknimenn eins og Árni Gylfason, Hallgrímur Jóhann Hallgrímsson og Elín Birna Gylfadóttir sem hafa unnið að þættinum. Frábært lið.

segir Sindri Gretars sem leikstýrir þáttunum en hann vinnur að gerð þáttanna ásamt Þór Þorsteinssyni. Sagan á bakvið Punktinn er raunar öll aðgengileg á Facebook-síðu þáttarins, fyrir þá sem hafa áhuga.

Ég kom ekki í hópinn fyrr en 2008 og tók hægt og hægt við af öllum helstu stöðum framleiðslunnar. Frá 2008-2010 sá ég bókstaflega um allt tæknilegt sjálfur. Framleiðslan var þó ekki alltaf í gangi, til dæmis var 2009 algert frí ár fyrir Punktinn. Svo byrjaði þetta alltaf aftur með ákveðinn “reboot” fíling. Viljinn okkar í kjarnahópnum var ávallt að koma þessu eins langt og við getum og ég held að þessi sería endurspegli það.
Sindri segir það hafa verið lykilatriðið við þróun vinnunnar að búa að góðu fólki en þannig hafi framkvæmdastjórinn og aðalframleiðandinn Egill Viðarsson í hópinn árið 2012.

Án hans hefði serían einfaldlega aldrei orðið að veruleika. Þökk sé honum náðum við að kreista óeðlilega miklum framleiðslugæðum út úr litlu fjármagni. Þór Þorsteinsson aðstoðarleikstjóri og yfirmaður eftirvinnslunnar á sömu orð skilið og þeirra þáttaka hefur reynst ómetanleg. Svo eru aðrir eins og Viktor Aleksander Bogdanski sem hefur verið aðaltökumaðurinn í hópnum síðan 2010 og margir aðrir sem hafa sett sinn svip á efnið og útlit þáttanna.

Samvinnu kjarnahópsins í hugmyndavinnunni segir Sindri vera lykilatriði.

Við hendum hugmyndum á milli okkar á fundum og þróum þær saman. Við erum mjög dómhörð á efni hvors annars og ef eitthvað er ekki fyndið þá er því hent í ruslið. Að minnsta kosti helmingurinn af hugmyndum mínum er hent út strax svo það er enginn heilagur í þessu ferli. Ég held þó að fyrirmyndir okkar séu almargar og ég á erfitt með að svara fyrir alla í hópnum. Þegar að húmor kemur þá er ég mikið fyrir South Park, 90’s Simpsons, Futurama, Rick & Morty og svo framvegis. Ég horfi ekki mikið til Íslands í sketsa eða grínmálum, Fóstbræður voru bestu sketsaþættirnir að mínu mati. Eina regla sem ég held í er að gelda ekki húmorinn í þágu þess að sýna pólitíska rétthugsun eða til að vera barnavæn.

Eins og áður segir er stór hluti teymisins úr Kvikmyndaskóla Íslands. Viðkoman í skólanum var ekki á sama tíma hjá þeim öllum en tengslin við skólann eru mikilvæg.

Það sem kvikmyndaskólar færa oft eru tengslanet, maður kynnist mörgum og þaðan fær maður fleiri sambönd og ef þú sannar þig í bransanum og stendur þig vel þá geturðu gert ýmislegt með þannig sambönd. Alveg eins og í hefðbundnu starfi – þú kynnist fólki og það metur þig eftir hæfni og persónutöfrum. Það sem skóli getur gert einnig er að opna vissar dyr, hvort sem að nýjum hugmyndum, hugmyndafræðum og jafnvel tæknilegum hlutum en það er auðvitað uppi manni sjálfum komið að nýta það.

Lykilmennirnir og aðal aðstandendur Punktsins, Sindri , Egill og Þór hafa sannarlega hug á að halda honum áfram.

En framhaldið fer eftir því hvernig þessi sería gengur. Hvort af því verður eða ekki er enn óljóst en að lokinni að seríunni  mun það án efa skýrast fljótt.

Sindri hefur nokkur ár unnið sem lausamaður í bransanum hér og þar.

Það vildi þannig til að þegar við fengum samning um að gera seríu hjá 365 þá var ég nýlega kominn í fullt starf hjá Silent Company. Ég tók þá erfiðu ákvörðun að hætta starfinu til að helga tíma mínum í seríuna. Annars tek ég að mér verkefni í myndatökum og stundum klippingu einnig. Þetta er í fyrsta skipti sem ég hef eytt svona miklum tíma, orðið heilt ár núna í eitt verkefni og þar sem ég er lykilhluti af framleiðslunni á öllum deildum þá hefur verið erfitt fyrir mig að taka pásu en ég ætla mér svo sannarlega að gera það eftir að serían er alveg búin.

Samvinna kjarnahópsins lykilatriði – Sindri Gretars ræðir um Punktinn

Fréttir Í fréttum var það helst