Klapptré greinir frá því að þessa dagana séu 27 íslenskar kvikmyndir sýndar  í borgunum Gdansk, Poznan og Varsjá í Póllandi.

Sýningar íslensku kvikmyndanna eru hluti af samvinnuverkefni Póllands og Íslands sem hlotið hefur heitið Ultima Thule – At the End of the World og vekur það athygli þegar listinn er skoðaður að margar þeirra eru eftir kennara Kvikmyndaskóla Íslands. Verkefnið hófst  í nóvember með sýningum pólskra kvikmynda hér á landi en nú  er um að ræða eftirfararndi íslenskar myndir og kvikmyndagerðarmenn:

Sódóma Reykjavík eftir Óskar Jónasson

Íslenski Draumurin og Maður Eins og Ég eftir Róbert Douglas

Kaldaljós eftir Hilmar Oddson, rektor Kvikmyndaskóla Íslands

Brim, þar sem Ottó Geir Borg var einn þriggja handritshöfunda

Á Annan Veg eftir Hafsteinn Gunnar Sigurðsson

Borgríki og Blóð Hraustra Manna en Hrafnkell Stefánsson (deildarforseti Handrit/Leikstjórn) var annar handritshöfunda

Fleiri kennarar skólans hafa einnig komið að þessum myndum en þar má nefna að Hlín Jóhannesdóttir (deildarforseti Leikstjórn/Framleiðsla) og Birgitta Björnsdóttir komu að gerð kvikmyndanna Brim og Eldfjalli.

Kvikmyndaskóli Íslands óskar umræddum kvikmyndagerðarmönnum til hamingju með sýningarnar í Póllandi.

Myndir eftir kennara Kvikmyndaskólans áberandi á hátíð í Póllandi

Táknmálsmyndband við lagið „I promised you then“ úr söngvakeppni sjónvarpsins hefur síðustu daga vakið verðskuldaða athygli en núverandi nemendur Kvikmyndaskólans, þau Sólveig Kanthi Engilbertsdóttir og Leszek Daszkowski tóku þátt í verkefninu ásamt Kolbrúnu Vökudóttur sem útskrifaðist úr leiklistardeild hans vorið 2015 tóku þátt í gerð myndbandsins.

Sólveig Kanthi Engilbertsdóttir sem er nemandi í leikstjórn/framleiðslu á 2. önn var meðframleiðandi og aðstoðarleikstjóri verkefnisins en Leszek Daszkowski á 2. önn var tökumaður. Kolbrún Völkudóttir þýddi lagið yfir á táknmál og saman klipptu Leszek og Kolbrún myndbandið.

Við Þórunn Erna erum búnar að vera vinkonur í nokkur ár og hef ég fengið að fylgjast með henni leika, syngja og leikstýra í gegnum árin þar sem ég hef lengi haft áhuga á leikstjórn, kvikmyndum og leikhúsi. Ég hitti Ernu Hrönn og Hjört fyrst í janúar þegar þau voru að taka upp myndböndin við lagið, „Hugur minn er“ eða „I Promised You Then“ eins og það heitir á ensku. Síðan þá hef ég fengið að fylgjast með nokkrum æfingum og aðstoðað við það sem ég get. Algjörlega ómetanleg reynsla og dýrmætt tækifæri.

Segir Sólveig sem stundar nám í framleiðslu og leikstjórn í Kvikmyndaskólanum eins og áður segir.

Ég hafði lengi haft auga á námi við skólann, en fór fyrst í Háskóla Íslands þar sem ég lærði faggreinakennslu grunnskóla og ætlaði mér að vera leiklistarkennari. Ég fór í skiptinám eina önn til Bandaríkjanna og tók þar meðal annars áfanga í handritagerð og leiklist og eftir það var ekki aftur snúið. Ári eftir útskrift frá HÍ hóf ég nám hér. Það er ákvörðun sem ég sé ekki eftir.

Sólveig segir kennarna í skólanum vera  fagmenn fram í fingurgóma og hún segist vita að hún sé á réttum stað til að komast inn í fagið en hvert hefur hún hugsað sér að stefna að námi loknu?

Eftir útskrift er að sjálfsögðu draumurinn að vinna við þetta, þetta er svo ótrúlega skemmtilegt og það er virkilega gefandi að sjá hugmynd verða að veruleika.

Nemendur Kvikmyndaskólans unnu að gerð táknmálsmyndbands

Í vikunni voru tilkynntar tilnefningar til Eddunnar og vakti það mikla athygli að venju.

Það gladdi starfsfólk Kvikmyndaskólans að sjá þann fjölda verkefna sem nemendur skólans hafa átt þátt í að skapa meðal útnefndra og sendir skólinn þeim sínar innilegustu hamingjuóskir sem og öðru útnefndu kvikmyndargerðarfólki til Eddunnar í ár.

Við höfum reynt eftir fremsta megni að taka saman þennan föngulega hóp en listinn er áræðanlega langt frá því að vera tæmandi.

Fjöldi útskrifaðra nemenda í verkefnum tilnefndum til Eddunnar

Í síðustu viku völdu hlustendur FM957 myndband Tjarnargötunnar við lag hljómsveitarinnar Agent Fresco, See Hell sem myndband ársins. Við fengum Frey Árnason til að segja okkur aðeins frá vinnunni að þessu verkefni en hann er meðal nokkurra útskrifaðra nemenda Kvikmyndaskólans sem unnu að því .

Það var mjög gaman og krefjandi að vinna með Agent Fresco. Þeir leggja mikla vinnu í tónlistina sína og ætlast til hins sama af þeim sem þeir vinna með. Þeir setjast ekki bara niður og spila það fyrsta sem þeim dettur í hug heldur þetta er allt útpælt svo myndbandið gat ekki verið bara eitthvað út í loftið.

Freyr segir að því hafi verið farið í  marga hringi í hugmyndavinnunni en að endingu hafi tekist að finna góða lendingu.

Ég og Gísli Thors sem leikstýrðum myndbandinu fengum svo Viggó Hansson sem var með mér í Kvikmyndaskólanum til að skjóta. Hann er ógeðslega fær tökumaður, fáir sem hafa jafn gott auga fyrir detailum og hann. Með okkur var líka Haukur Karlsson sem er partur af Tjarnargötufamilíunni. Hann var mættur á long boardinu sínu fyrir sólarupprás með AC töskuna.

Hann bætir við að Sigríður Björk úr KVÍ hafi verið í starfsþjálfun á Tjarnargötunni þegar vinnsla myndbandsins fór fram.

 Ekki er heldur hægt að sleppa í upptalningunni Tinnu sem var sminka. Hún er líklegast yndislegasta manneskja sem hefur gengið þessa jörð og án hennar snilligáfu hefði Arnar Dan, aðalleikari,  líklegast litið út eins og misheppnað blackface

Freyr segir að það sé alltaf gaman að fá viðurkenningar fyrir vinnu sína.

Þetta er í fyrsta skiptið sem við fáum verðlaun fyrir eitthvað annað en auglýsingar svo það var virkilega gaman. Öll myndböndin sem voru tilnefnd voru líka fáránlega góð svo þetta kom virkilega virkilega á óvart.

Kvikmyndaskóli Íslands óskar þeim á Tjarnargötunni til hamingju með heiðurinn og munum við fylgjast grannt með Íslensku tónlistarverðlaunum 4. mars næstkomandi.

Myndband Tjarnargötunnar valið myndband ársins á FM957

Ingvar E. Sigurðsson og Benedikt Erlingsson heimsóttu Kvikmyndaskóla Íslands og sátu fyrir svörum hjá nemendum  á  2. önn í vikunni.

Leikarana tvo þarf ekki að kynna en Benedikt leikstýrði kvikmyndinni Hross í oss með frábærum árangri þar sem Ingvar var í lykilhlutverki. Leikararnir voru einmitt gestir í  leikstjórnaráfanga LST 205  þar sem lögð er áhersla á vinnu leikstjórans með leikaranum.  Þá vinna leikstjórnarnemar með leikaranemum og atvinnuleikurum. Í áfanganum  heimsækja  reyndir leikstjórar og leikarar deildina sem  unnið hafa mikið saman og ræða sitt samstarf .  Nemunum gefst einnig kostur að leggja spurningar fyrir gestina í formi „Q and A“ eftir. Í síðustu viku voru gestir deildarinnar Ragnar Bragason og Nína Dögg Filippusdóttir en kennari í þessum áfanga er Þorsteinn Gunnar Bjarnason.

Ingvar E. Sigurðs og Benedikt Erlings sátu fyrir svörum hjá nemendum

Af þeim sex stuttmyndum sem keppa um Sprettfiskinn, verðlaun stuttmynda á Stockfish Festival í ár eiga nemendur Kvikmyndaskóla Íslands þrjár.

Eitt Skref heitir mynd í leikstjórn Arons Þórs Leifssoar en framleiðendur ásamt honum eru Bjarni Svanur Friðsteinsson, Sturla Óskarsson og Þorsteinn Pétur Mannfreðsson

Önnur myndin í keppninni er Sjúkdómarinn í leikstjórn Grétars Magnúsar Grétarssonar en hann er sjálfur framleiðandi og Svart hvitar fjaðrir í leikstjórn Sigrðar Bjarkar Sigurðardóttur sem framleidd er af henni sjálfir og Guðnýju  Rós Þórhallsdóttur er þriðja myndin.

Stockfish festival stendur í 10 daga og hefst 18. Febrúar og óskum við nemendum til hamingju með árangurinn og góðs gengis með myndir sínar.

Þrjár stuttmyndir af sex sem keppa um Sprettfiskinn úr Kvikmyndaskólanum

Anna Sæunn Ólafsdóttir útskrifaðist úr leiklistarbraut Kvikmyndaskóla Íslands árið 2012 af en hún leikstýrir þessa dagana heimildarþáttum um sýrlenska flóttamenn sem nýlega komu til Íslands.  Einnig eru hún handritshöfundur ásamt framleiðanda þáttanna, Árna Gunnarssyni.

 Ég geri ráð fyrir að þáverandi kerfi sé enn við lýði en þrátt fyrir að vera á leiklistarbraut var á hverri önn ákveðin áhersla á kvikmyndagerð þar sem við gerðum okkar eigin myndir og lærðum ákveðin grunnatriði kvikmyndagerðarinnar.

Anna Sæunn segir að þó hún hafi fengist lítillega við  við kvikmyndagerð sem unglingur megi segja að áhuginn hafi kviknað fyrir alvöru í Kvikmyndaskólanum.

Þetta hófst alveg óvart! Það er eitthvað við þetta form og miðlun á sögu og andrúmslofti sem heillar mig alveg sjúklega mikið. Etir útskrift tók ég því rólega því ég eignaðist mitt fyrsta barn stuttu seinna. Í janúar 2014 byrjaði ég í námi í Þjóðfræði við Háskóla Íslands þar sem ég fékk ákveðna útrás fyrir rannsóknarþörfina í mér, en einhvernveginn blundaði alltaf miklu sterkar í mér að gera myndir um verkefnið sem við áttum að gera ritgerðir um.

Næsta vor var Önnu Sæunni boðin vinna við leiknu myndina sem var tekin upp í heimasveit hennar fyrir norðan, Bárðardal.

Það var skemmtileg og frábær reynsla, ekki síst vegna gríðarlegrar velgengni myndarinnar á heimsvísu. Eftir það var ekki aftur snúið en árið á eftir vann ég hjá Evu Sigurðardóttur í Askja Films þar sem ég gekk í gegnum ákveðna eldskírn í kvikmyndagerðinni, en Eva er ótrúlega fær og öflug kvikmyndagerðarkona sem ég hef lært mikið af.

Fyrir Askja Films framleiðslustýrði Anna Sæunn tveimur myndum.  Regnbogapartý, sem var valin besta íslenska stuttmyndin á RIFF 2015 og heimildastuttmyndinni Heiti Potturinn eftir Hörpu Fönn Sigurjónsdóttur.

Einnig vann ég að undirbúningi myndar í fullri lengd, Tryggðarpantur eftir Ásthildi Kjartansdóttur og er meðframleiðandi að stuttmynd í framleiðslu Askja Films sem fer í tökur á þessu ári, Frelsun, eftir Þóru Hilmarsdóttur og Snjólaugu Lúðvíksdóttur. Fyrir það verkefni vann ég í pitch keppni í Cannes á síðasta ári. Í sumar tók ég að mér nokkur verkefni í casting fyrir Iceland Casting, en þ.á.m.var stór Icelandair auglýsing, Velkomin heim sem frumsýnd var á leik Íslands og Hollands í sumar.

Í haust ákvað Anna Sæunn að flytja norður til Akureyrar, nær heimahögunum, með það í huga að byggja upp enn sterkara kvikmyndaumhverfi á Norðurlandi og því ber vel í veiði koma sýrlensku flóttamennina til Akureyrar og þáttagerðin um þá.

Þættirnir hafa hlotið vinnuheitið “Amma” og verða í framleiðslu Árna Gunnarssonar hjá Skotta Film á Sauðárkróki. Einnig er ég að þróa heimildamynd um frjálsíþróttakonuna Hafdísi Sigurðardóttur ásamt Skotta Films og framleiða stuttmynd eftir fyrrum kvikmyndaskólanema, Jasmin Rexhepi, en við erum þegar komin vel á veg með fjármögnun á henna. Svo eru auðvitað milljón hugmyndir í þróun, en ég vinn að stofnun eigin kvikmyndaframleiðslufyrirtækis um þessar mundir og stunda einnig  nám í söng við Tónlistarskóla Akureyrar og kenni leiklist í Leik- og Dansstúdíó Alice.

Ætlunin er að gera tvo 45-50 mínútna þætti til sýningar í sjónvarpi í fræðslutilgangi.

Síðan er planið að klippa heimildamynd með þéttara efni, 60-70 mínútur og meira narratíva sögu þar sem við tökum fyrir ákveðnar sögupersónur í hópi flóttamannanna og aðlögunarferlið hér. Aðalmarkmiðið er að endurspegla ferlið sem þau ganga í gegnum með því að koma hingað, svo fjarri heimslóðunum, og hvernig þeim reiðir af í íslensku samfélagi.

Anna Sæunn segir að einnig verði móttökum samfélagsins gefinn gaumur og inn í frásögnina fléttað upplýsingum um ástandinu almennt í Líbanon, þaðan sem þau koma.

Eins og margir vita er ástandið hroðalegt og veruleikinn sem blasir við svo mörgum verri en við gætum ímyndað okkur. Til að mynda eru í Líbanon milli 4-500.000 börn flóttamanna á grunnskólaaldri. Fleiri börn en telja íbúafjölda Íslands fá ekki skólagöngu og eru tilneydd til að vinna jafnvel frá unga aldri.

Anna Sæunn segir að í þáttunum verði farið vel yfir ýmsar staðreyndir til skýringar á málefnum flóttafólksins en einnig er leitast við að skoða ferlið frá þeirra eigin sjónarhóli.  Því er farin sú leið að sjá viðburðina með augum ömmu sem er í hópi flóttafólksins.

Konur og börn eru okkur sérstaklega hugleikin þegar kemur að flóttamannavandanum þar sem þau fá síður menntun og vinnu. Stúlkur eru sérstaklega í slíkum aðstæðum. Hins vegar tíðkast það í mörgum samfélögum í löndum á Arabíuskaga að elsta manneskjan í fjölskyldunni er sú æðsta, þá amman þegar afans nýtur ekki lengur við. Amman í hópnum hér á Akureyri er líka ákaflega litríkur og skemmtilegur karakter og börnin hennar 9 eru dreifð um mörg lönd, einni dóttur hefur hún ekki heyrt frá í þrjú ár.

Dóttirin er stödd í Raqqa í Sýrlandi en enn hafa aðal söguhetjur myndarinnar ekki verið fastsettar.

Ætlunin er að fylgjast með öllum fjölskyldunum, en ljóst er að ákveðnir karakterar munu fá meira vægi og mun það skýrast betur eftir því sem líður á og veran á Íslandi fer að móta líf þeirra. Við höfum einnig verið í góðu samstarfi við Rauða Krossinn og Akureyrarbæ þegar kemur að tökunum og að sjálfsögðu höfum við samþykki fjölskyldnanna fyrir tökunum.

En hvenær hófst ferlið að gerð þáttanna og myndarinnar og hvar er gert ráð fyrir að hægt verði að fylgjast með afrakstri vinnunnar?

Árni hafði samband við mig rétt fyrir jól þegar hann var að fara af stað með undirbúning á tökum en þá hafði hann fengið dálítið fjármagn til að gera honum kleift að fara út til Beirut í Líbanon og taka upp fjölskyldurnar þar og einnig hjálparstarf á svæðinu. Ég var ekki lengi að hugsa mig um að stökkva á verkefnið því málefnið er mér sérstaklega hugleikið og þegar kom til tals að taka upp aðstæður á svæðinu í Beirut og Líbanon stóð ekki á mér.

Svo vill til að mannréttindamál standa Önnu Sæunni nærri og hún segist strax hafa fundið fyrir sterkri löngun til að læra meira og fá að miðla boðskapnum.

Alveg eins og aðrir á Fróni á maður líka til að blindast af okkar eigin tilbúnu vandamálum og sjá ekki ljósið jafnvel þótt við stöndum á því, ég er jafnsek um það og margir á Vesturlöndum. Þá á ég sérstaklega við að bera saman okkar vandamál,jafnvel þeirra sem búa við verstu aðstæðurnar hér heima við þær aðstæður og vanda sem til dæmis sýrlenskir flóttamenn búa við. Það á að mínu mati ekki við nein rök að styðjast, sérstaklega eftir veruna og upplifanirnar úti í Líbanon.

Í janúar vörðu aðstandendur myndarinnar viku við tökur í Sýrlandi og náðu þar miklu af verðmætu efni sem mun vonir þeirra standa til að gefi góða mynd af ástandinu.

 Veran úti gerði mér ennþá betur ljóst hvað við erum líka blind á þann auð sem við búum langflest við hér heima; að hafa húsaskjól og vera laus við pólitísk stríðsátök. En það er jú vissulega eitt af markmiðum myndarinnar, að sýna að hér hefur áður tekist vel að aðlaga flóttamenn íslensku samfélagi og það starf megi einnig taka til fyrirmyndar í öðrum löndum.

Tökur munu fara fram út árið en í árslok er vonast til að hægt verði að sýna afraksturinn.

Viðræður eru hafnar við RÚV þar sem samstarfsgrundvöllur er talinn fyrir hendi og okkar von er að þættirnir verði sýndir þar. Stefnan er svo að heimildamyndin sjálf fari á hátíðir á Íslandi og á heimsvísu á næsta ári.

Anna Sæunn leikstýrir mynd um sýrlenska flóttamenn á Íslandi

Mynd  Lovísu Láru Halldórsdóttir  hefur verið valin til sýningar á Winter Film Awards, FEAR horror competition . Við fengum við kvikmyndagerðarkonuna ungu sem útskrifaðist úr deildinni Handrit/Leikstjórn í Kvikmyndaskóla íslands árið 2014, til að segja okkur lítillega frá verkinu og hátíðinni sem stendur yfir dagana 18.-27. Febrúar.

Hátíðin er mjög spennandi, „up and coming“  enda vann hún nýlega Best of Manhattan award .  Hrellir var ein af 10 hrollvekjum sem voru valdar til sýningar fyrir FEAR horror competition.

Lovísa Lara segir mynd sína vera hrollvekju og leikur Ágústa Evu Erlendsdóttur aðalhlutverkið.

Hrellir, eða Creep eins og hún kallast  fjallar um konu sem vaknar einn morguninn og uppgötvar sér til skelfingar snapchat skilaboð sent til hennar af henni sofandi. Eftir það byrjar hún að taka eftir undalegum hlutum á heimili sínu og finna fyrir óþægilegri nærveru. Í raun er myndin  um heimilisofbeldi og máttleysið sem því fylgir.  Kvikmyndin Hrellir  var partur af skærumynda-prógrammi Klapp kvikmyndagerðar.

Nokkur verkefni voru valin og var þátttakendum í hátíðinni  útveguð tæki  til þess að gera stuttmyndina og veittur stuðningur.

 Mig langaði mikið til þess að gera hrollvekju, þar sem að ég varð fyrst ástfanginn af kvikmyndagerð horfandi á lélegar hryllingsmyndir með systkinum mínum.

Við óskum Lovísu Láru góðs gengis í New York í næsta mánuði og fylgjumst með framahaldinu.

Fjórar myndir voru tilnefndar til verðlaunanna af þeim tíu sem sýndar voru á hátíðinni og var Hrellir ein þeirra. The Bridge Partner eftir Gabriel Olson hlaut verðlaunin en við óskum Lovísu Láru til hamingju með frábæran árangur.

Hrellir eftir Lovísu Láru sýndur á Winter film awards í New York

Þórunn Guðlaugs og Natan Jónsson hafa í nógu að snúast þessa dagana en á fimmtudag frumsýna þau verkið Samfarir Hamfarir í Tjarnarbíói.

Þetta verk er búið að vera í hausnum á mér síðan fyrir þremur árum en Natan Jónsson kom inn í þetta ári seinna og erum við búin að vera að þróa hugmyndina og handritið saman hægt og rólega í tvö ár.

Þórunn segir að þeim hafi boðist residensía í Tjarnarbíói og það hefur orðið þeim mikil hvatning.

Þar er farið með okkur eins og gull! Hópurinn hefur  stækkað ört síðustu mánuði og við erum núna með frábært fólk með okkur í þessu.

Þórunn útskrifaðist úr leiklistarbraut frá Kvikmyndaskóla Íslands árið 2010 en Natan Jónsson útskrifaðist úr skólanum tveimur árum síðar úr deildinni Leikstjórn/framleiðslu.

Við erum bæði höfundar verksins og eigendur Leikfélagsins Hamfarir, ásamt Dóru Lenu Christians, sem er að setja upp verkið.

Með Þórunni leikur Aðalsteinn Oddsson (Alli Odds) í Samförum Hamförum, útskriftarnemi leiklistardeildar KVÍ árið 2012.

Fyrir utan okkur sem komum úr skólanum þá er her af fólki í þessu, þar með talinn þriðji leikarinn, Ársæll Níelsson sem hefur leikið í fjölmörgum myndum tengdum skólanum.

Sýningarnar á verki Þórunnar og Natans verða fjórar í Tjarnarbíói; 21., 24., 29. og 31. janúar (kl.20.30). Aðgangsmiðinn er aðeins á 2.900 kr.

Útskrifaðir nemar úr KVÍ frumsýna eigið verk í Tjarnarbíói

Fréttir Í fréttum var það helst