Brú inní bransann er nýr og  spennandi samstarfssamningur sem Kvikmyndaskóli Íslands hefur gert við helstu framleiðslufyrirtæki landsins.

Nafnið er ekki úr lausu lofti gripið því samstarfið er hugsað sem leið  fyrir útskrifaða nemendur KVÍ að launuðu starfi til lengri eða skemmri tíma og er gert ráð fyrir að sá tími verði á bilinu þrír til tólf mánuðir.

Þegar er búið að gera starfsþjálfunarsamning við fyrirtækin ogen einnig er samningur við á lokastigi. Þau störf sem eru í boði eru breytileg og í samræmi við verkefnin sem fyrirtækin fást við hverju sinni. Stöðurnar verða auglýstar í lok hverrar annar og er stefnt að því að senda úrvalsnemendur í þessa starfsþjálfun.

Samningurinn getur nýst vel sem kraftmikið afl inní kvikmyndafyrirtækin og sjónvarpsstöðvarnar en ekki síður sem brú inní bransann fyrir nýútskrifaða  nemendur KVÍ.

Sigrún Gylfadóttir, tengslafulltrúi nemenda leiðir verkefnið af hálfu KVÍ og munu nokkrar stöður verða í boði nú strax eftir áramót.

Brú inní bransann – nýr spennandi samstarfssamningur

Rúnar Guðbrandsson er deildarstjóri leiklistardeildar Kvikmyndaskólans en hér er að finna ávarp hans úr lokahefti haustannar skólans.

Kvikmyndaskóli Íslands býður upp á tveggja ára nám fyrir leikara með sérstaka áherslu á kvikmyndaleik. Grunnurinn er lagður með kraftmikilli þjálfun í tækni leikarans, – sjálfu handverkinu; líkamsþjálfun sem eflir styrk, sveigjanleika og skerpir líkamsmeðvitund, – raddþjálfun, hjóðmótun og söng. Síðan færist áherslan yfir á leiktúlkun og sköpun.

Sérstaða námsins er þó sú áhersla sem lögð er á kvikmyndaleik.

Nemendur fá mikla og góða innsýn í heim kvikmyndagerðar, list hennar og tækni, enda hæg heimatökin í skólanum. Námið er verkefna og framleiðslutengt og nemendur hljóta víðtæka þjálfun í að leika í kvikmyndum og öðrum myndmiðlum í hópvinnu með öðrum deildum skólans. Auk þjálfunar í kvikmyndaleik kynnast nemendur handritsgerð, framleiðslu, kvikmyndatöku, hljóðvinnslu, klipp og eftirvinnslu.

Nemendur fá tækifæri til að blómstra og dafna í skapandi og ögrandi umhverfi sem jafnframt veitir þeim öryggi, aukið sjálfstraust og sterkari sjálfsmynd á sviði listgreinarinnar.

List leikarans felst í því að gera hið ósýnilega sýnilegt, – að holdgera hugsanir og tilfinningar og gefa þeim sýnilegt form, – meitla þær í tíma og rými.  Að blása lífi í orð af blaði og gefa þeim hljóm. Að miðla skáldskap sem á einn eða annan hátt sýnir okkur líf og hlutskipti mannsins á jörðinni. Viðfangsefni leikarans eru mannleg tilvera í öllu sínu veldi:  innra og ytra líf manneskjunnar, samskipti við aðra menn og samfélag. Leikarinn leiðir okkur inn í hugsanir og tilfinningar manneskjunnar og birtir okkur hegðun hennar. Það er sérhæfð list leikarans sem skapar töfrana sem hrífa okkur, hvort heldur er á leiksviði eða í kvikmyndum.

Til þess að leikarinn geti tekist á við þessi flóknu viðfangsefni þarfnast hann þjálfunar, þar sem hæfileikar hans og persónuleiki eru í aðalhlutverki en líkami og rödd aðalverkfærin.

Til að tryggja að nemendur fái sem besta þjálfun sækir skólinn kennara úr röðum sérfræðinga á hverju sviði fyrir sig sem allir eru virkir í samfélagi listanna. Þeir koma úr röðum leikara, leikstjóra, söngvara, dansara, handritshöfunda og kvikmyndagerðarmanna. Saman vinna þeir að því að undirbúa nemendur til þátttöku í listgreininni að námi loknu eða fyrir framhaldsnám á einhverju sviði listgreinarinnar.

Leiklistardeild Kvikmyndaskóla Íslands er því ákjósanlegur valkostur fyrir ungt og hæfileikaríkt fólk sem hefur áhuga á skapandi og krefjandi námi á sviði leiklistar og kvikmyndagerðar.

Leiklistardeildin er krefjandi tveggja ára nám og markmiðið er að nemendur fái að blómstra og dafna í skapandi og öruggu umhverfi.

Áherslan á kvikmyndaleik – Rúnar Guðbrandsson, deildarstjóri leiklistardeildar

Kvikmyndaskóli býður til sérstakrar hátíðardagskrár á Facebook og öðrum samskiptamiðlum til áramóta en þá verða sýndar tíu sérvaldar myndir nemenda.

Fyrsta myndin sem birtist í dag kl. 18 er Anima eftir Björgvin Sigurðsson en hugmyndin er að hafa viðburðinn árlegan héðan í frá.  Að auki Anima eru það eftirfarandi níu myndir sem hafa orðið fyrir valinu:

Ólöf Birna Torfadóttir – Síðasta sumar – vor 2016 – Handrit/Leikstjórn

Óli Jón Gunnarsson – Gunna – vor 2012 – Leiklist

Björgvin Sigurðarson – Anima – vor 2012 – Skapandi Tækni

Logi Ingimarsson – Limbo – vor 2014 – Skapandi Tækni

Þórður K. Páls – Harður heimur – haust 2011 – Leikstjórn/Framleiðsla

Bryndís Haraldsóttir – Upstage – vor 2016 – Leiklist

Lovísa Lára Halldórsdóttir , Margrét Ósk Buhl Björnsdóttir, Nanna Höjgaard Grettisdóttir – Smástirni – vor 2014 Leikstjórn/Framleiðsla , Skapanditækni , Handrit/Leikstjorn

Rebekka Atladóttir – Ibiza – vor 2013 – Leiklist

Jón Már – Stanislaf – haust 2010 – Skapandi tækni

Kristín Lea, Anna Hafþórs – Takk fyrir mig – vor 2011 – Leiklist

Ný mynd í hátíðardagskránni mun svo birtast daglega til áramóta. Allar myndirnar eru útskriftarmyndir en stutt spjall kvikmyndagerðarfólksins um verkin birtist í upphafi sýningar hverrar myndar. Kvikmyndaskóli Íslands vonar að þið njótið þessa framtaks og óskar öllum gleðilegrar hátíðar.

Hátíðardagskrá Kvikmyndaskólans til áramóta

Hrafnkell Stefánsson er deildarstjóri Handrita- og leikstjórnardeildar Kvikmyndaskóla Íslands og segir okkur frá náminu þar í ávarpi sínu í lokahefti haustannar skólans.

Þetta eru hugtök sem við könnumst öll við. Án þeirra er manneskjan ófær um að segja sögur. Það mætti segja að þessi þau eru hluti af okkar DNA. Því kemur ekki á óvart að þessi hugtök eru grunnur verkfærakistu hvers höfundar.

Hver og einn höfundur á sína eigin verkfærakistu. Hún er uppfull af tólum og tækjum, sem hann notar sér við að móta, þróa og þroska hugmyndir svo úr verði heildstætt verk.

Hugmyndir koma til okkar úr öllum áttum. Þær koma úr draumum, umhverfinu og persónulegri reynslu. Að fá hugmynd er auðvelt, en þegar kemur að því að vinna úr henni þá kemur vel útbúin verkfærakista sannarlega að notum.

Í Handrita – og Leikstjórnardeild Kvikmyndaskóla Íslands viljum við hjálpa nemendum að útbúa sína eigin persónulegu verkfærakistu.

Í byrjun hverrar annar kemur saman hópur af ólíku fólki úr ólíkum áttum. Sumir mæta með reynslu af kvikmyndargerð í kistunni sinni. Aðrir hafa aldrei spreytt sig í listum áður, en hafa lífsreynslu í sinni kistu. En öll eiga þau það sameiginlegt – að þau stukku út í djúpu laugina, hættu að bara horfa og ákváðu að byrja að skapa.

Þessi ákvörðun er byrjunin á þeirra sögu, og er þau hefja nám erum þau komin á miðju. Nú fara hlutirnir að gerast. Undir leiðsögn helsta fagfólks úr kvikmyndabransanum bæta nemendur við sig verkfærum í kistuna sína. Verkfærum eins, vinnuferlum leikstjóra og handritshöfunda, reynslu í því að skrifa og leikstýra sínum eigin kvikmyndaverkum. Þekkingu á helstu undirstöðuatriðum kvikmyndagerðar, þ.á.m. framleiðslu og myndrænni frásögn, fá auk þess skilning á tækni og tækjanotkun.

Tveimur árum síðar kemur loks að endinum.

Náminu við Handrita- og leikstjórnardeild er lokið, verkfærakistan er troðin af öllu sem höfundur þarf á að halda. Í kistunni má nú finna, aga til að sitja löngum við handritskrif, þekkingu til að leiða verkefni sem listrænn stjórnandi, reynslu í að hafa fylgt hugmynd eftir frá byrjun til enda sem leikstjóri og tengslanet sem mun nýtast um ókominn ár.

Með hverjum endi er nýtt upphaf. Ný byrjun.

Hver sem hún verður, hafa nemendur nú fulla verkfærakistu og eru tilbúnir að takast á við þær spennandi áskoranir sem bíða í ört vaxandi kvikmyndiðnaði hér á landi, hvort sem það er við gerð sinna eigin verkefna, störf innan veggja hina fjölmörgu framleiðslufyrirtækja landsins eða áframhaldandi nám á erlendri grund.

Hrafnkell Stefánsson
Deildarforseti Handrita- og leikstjórnardeildar

Byrjun. Miðja. Endir. – Hrafnkell Stefánsson er deildarstjóri Handrita- og leikstjórnardeildar

Jörundur Rafn Arnarson, deildarforseti í Skapandi tækni á næstur orðið en ávarpið er úr lokahefti haustannar í Kvikmyndaskóla Íslands.

Nám við Kvikmyndaskóla Íslands er tveggja ára nám. Námið er góður undirbúningur fyrir þann starfsvettvang sem nemendur velja sér svo innan kvikmyndagerðarinnar. Kvikmyndagerð byggist á samstarfi ólíkra einstaklinga. Markmiðið er að skapa upplifun þar sem áhorfendur gleyma stund og stað. Til að þetta takist þarf tæknifólk sem hefur öðlast færni og skilning til þess að skapa þessa sannfærandi veröld.Skapandi tækni er framsækin deild með áherslu á upptökutækni og notkun nýjustu eftirvinnsluforrita sem völ er á. Deildin hentar jafnt konum sem körlum sem hafa áhuga á að vinna á skapandi hátt. Námið getur einnig verið sniðug leið fyrir leikstjóra framtíðarinnar sem auka vilja þekkingu sína á þessu sviði. Kennarar í deildinni eru reynslumikið fagfólk og verða oft mikilvæg tenging nemenda inn í kvikmyndageirann eftir námið.Deildin er byggð upp í kringum fjögur grunnfög; kvikmyndatöku, klippingu, hljóð og myndbreytingar (grafík, brellur og litvinnsla). Nemendur við deildina stunda einnig nám í ýmsum stoðáföngum s.s. leikmyndagerð, listasögu, handritagerð og ljósmyndun. Einnig eru sameiginleg kjarnafög með öðrum deildum skólans, eins og kvikmyndasaga og myndræn frásögn.Nemendur vinna fjöldann allan af verkefnum innan deildarinnar; heimildarmyndir, kynningarmyndir, stutttmyndir, endurgerðir á senum, ljóðrænar myndir án orða, og „pilot“ í samstarfi við fagfólk. Útskriftarmyndin er svo í formi stuttmyndar sem hægt er að nota til að koma sér á framfæri eða til sýninga á stuttmyndahátíðum hérlendis og/eða erlendis. Það er því óhætt að segja að nemendur fari í gegnum fjölbreytt nám. Sé áhugi, kraftur og dugnaður til staðar býður námið upp á mikla möguleika til framtíðar.Leiðir að loknu tækninámi eru fjölbreyttar. Margir hefja störf innan íslenska kvikmynda- og sjónvarpsiðnaðarins, sumir hefja sinn eiginn rekstur en aðrir halda utan í framhaldsnám. Reynslan hefur sýnt að mikil eftirspurn hefur verið eftir fólki með góðan tæknibakgrunn á vinnumarkaðinum. Það má því segja að þeir sem útskrifast frá Kvikmyndaskóla Íslands hafi unnið sér inn verðmæta gráðu. Nálgist nemandi námið af metnaði og samviskusemi uppsker hann ríkulega.Jörundur Rafn Arnarson
Deildarforseti Skapandi tækni  

Verðmætt nám með atvinnutækifærum í Skapandi tækni – Jörundur Rafn, deildarforseti deildarinnar

Við birtum ávarp Jónu Finnsdóttur úr lokahefti haustannara Kvikmyndaskólans en hún gegnir starfi deildarforseta Leikstjórnar/framleiðslu við skólann.

Samvinna, samheldni, samstilling, – og úthald. Það er kvikmyndagerð. Þar sem virðing fyrir viðfangsefninu og samlegð mismunandi starfa og sérhæfðra fagmanna er í fyrirrúmi. Þar sem allir sem að verkinu koma eru sögumenn og stuðla með sérþekkingu sinni að því að úr verði heildstætt kvikmyndaverk. Saga. Upplifun.Í Kvikmyndaskóla Íslands er lögð áhersla á reynslumiðað nám. Skólinn býður uppá “hands on” umhverfi þar sem nemendur fá innsýn í helstu starfssvið kvikmyndagerðar og áhersla er lögð á sérhæfingu, samhjálp og listrænt innsæi við gerð ólíkra kvikmyndaverka. Einnig eru kvikmynda- og listasögunni gerð góð skil.Í leikstjórnar- og framleiðsludeild er áhersla lögð á tvær helstu stoðir kvikmyndagerðar, leikstjórn og framleiðslu. Starf framleiðandans er fjölþætt; hann er oftast sá eini sem fylgir kvikmyndaverki frá upphafi til enda, frá hugmynd upp á tjald eða skjá og út í heim. Hann vinnur með handritshöfundi að þróun verksins og sögunnar, ber ábyrgð á fjármögnun undirbúningi og skipulagi, eftirvinnslu og dreifingu. Hann er driffjöður verksins og starf hans snýst ekki síst um að virkja með sér fólk til að breyta hugmyndum í veruleika.Leikstjórinn ber ábyrgð á efnistökum, áferð og stíl. Kvikmyndin endurspeglar listræna sýn leikstjórans og sem verkstjóri sér hann um að miðla þeirri sýn til samverkafólksins, þannig að allir gangi í takt og geti lagt sitt að mörkum, svo útkoman verði eins og að var stefnt. Samvinna leikstjóra og framleiðanda er afar mikilvæg og því sérstakur ávinningur fyrir nemendur deildarinnar að öðlast skilning á báðum þessum hlutverkum í námi sínu.Eitt helsta aðalsmerki leikstjórnar- og framleiðsludeildar er fjölbreytni, þar sem nemendur spreyta sig á ólíkum tegundum kvikmyndaverka, bæði sem framleiðendur og leikstjórar. Þeir reyna fyrir sér í gerð stuttmynda, heimildarmynda, auglýsinga, tónlistarmyndbanda og sjónvarpsþátta og njóta leiðsagnar helstu fagmanna landsins á sviði kvikmyndalistarinnar. Nemendur deildarinnar fá einnig kennslu í grundvallaratriðum handritsgerðar og dramatískrar uppbyggingar. Með því að leggja sig fram með opnum hug og góðri ástundun öðlast nemendur dýrmæta þekkingu og reynslu sem mun nýtast þeim á fjölbreyttum sviðum kvikmyndagerðar. Námið er í senn krefjandi og gefandi og opnar leið inn á starfsvettvang sem alls staðar er í örum vexti.Jóna Finnsdóttir
Deildarforseti Leikstjórnar- og framleiðsludeildar 

Samvinna, samheldni, samstilling, – og úthald – Ávarp Jónu Finnsdóttur, deildarforseta Leikstjórn/framleiðslu

Til fróðleiks og skemmtunar birtum við næstu daga ávörp rektors og deildarforseta úr lokahefti haustannar og eru það skrif Hilmars Oddsonar sem koma hér fyrst.

 “Að ver´í sambandi við annað fólk er mér lífsnauðsyn” sungu Stuðmenn eitt sinn. Þetta eru auðvitað alkunn sannindi. Og þetta gildir ekki bara um einstaklinga, einnig fyrirtæki og stofnanir. Kvikmyndaskóli íslands á mjög stóra fjölskyldu, ef svo má að orði komast. Fjölskylda okkar samanstendur af eigendum, starfsfólki, kennurum og nemendum. Þeir síðasttöldu skipta auðvitað mestu, enda eru þeir langstærsta fjölskyldugreinin.Nú er það þannig með fjölskyldur í þær er fólk æviráðið. Við sitjum uppi með fjölskylduna okkar, sama hvort okkur líkar betur eða verr. Við skulum gera ráð fyrir að yfirleitt sé það af hinu góða. Fjölskylda KVÍ telur nokkur hundruð manns. Suma hittum við daglega, aðra reglulega og enn aðra mjög sjaldan. En þeir eru samt í fjölskyldunni og það gleður okkur alltaf jafnmikið að fá af þeim fréttir.Við höfum verið að reyna að koma okkur upp margs konar samskiptakerfi til að viðhalda og rækta gömul og ný sambönd. Það hefur gengið allvel og okkur berast nú reglulega fréttir af sigrum og afrekum gamalla nemenda.Vart er gerð sú kvikmynd eða sá sjónvarpsþáttur á Íslandi að áhöfnin sé ekki að stórum hluta (stundum meirihluta) skipuð fyrrverandi (stundum núverandi) nemendum KVÍ. Þannig hefur það verið um alllangt skeið.Á árinu 2016 komu fyrrum nemendur KVÍ að ótal verkefnum:Á annan tug fyrrum nemenda vann við gerð Ófærðar-þáttanna, sem hafa verið að gera garðinn frægan um víðan völl. Okkar fólk hefur verið að setja upp leiksýningar, vinna verðlaun fyrir myndbandagerð, vinna verðlaun í pitchkeppni, keppa um verðlaun og vinna verðlaun á kvikmyndahátiðum (Sprettfiskurinn á Stockfish, RIFF, Skjaldborg og á ýmsum erlendum stuttmyndahátíðum ), vinna Edduverðlaun, hirða öll verðlaun hjá örvarpinu, framleiða nýjar bíómyndir og leikstýra stuttmyndum, leikstýra vinsælum sjónvarpsseríum, fá styrki til kvikmyndagerðar, átt myndir á Nordisk Panorama og unnið til verðlauna fyrir leik í bíómynd. Þetta er töluvert og þetta skiptir allt máli, fyrir viðkomandi einstaklinga, fyrir gamla skólann þeirra og fyrir samfélagið. KVÍ er þjóðþrifastofnun.Við skulum njóta þess nú í útskriftarviku haustannar 2016 að dást af verkum nemenda sem flestir hafa lagt á sig ómælda vinnu, lagt nótt við nýtan dag í að skapa eitthvað eins vel og þeim er unnt. Þau eru ýmist nýbyrjuð að feta sig í straumhörðum elfinum, stödd í honum miðjum eða eru að ná bakkanum hinum megin, þar sem bíður þeirra lífsbaráttan sjálf, erfið, sæt og óvægin,  – í einhverjum tilfellum glæstur ferill.Lifi KVÍ-fjölskyldan.Hilmar Oddsson
Rektor KVÍ

Að vera í sambandi – Ávarp rektors úr lokahefti haustannar Kvikmyndaskólans

Nýútskrifuðum nemanda úr Kvikmyndaskóla Íslands barst nú skömmu fyrir jól góðar fréttir. Eyþór Jóvinsson landaði sínum fyrsta handritsstyrk frá Kvikmyndasjóði Íslands og við fengum hann til að segja okkur frá sínum fyrstu viðbrögðum við þessum frábæru fréttum.

Fyrstu viðbrögð eru bara mjög góð. Maður er búinn að leggja mikla vinnu í þennan karakter og söguna um hann, og það hefur gengið vel með hann í skólanum. Þannig að það er gott að fá staðfestingu á því frá einhverjum öðrum að maður sé á réttri braut með verkefnið.

Umræddur karakter er Arnbjörn sem samnefnd útskriftarmynd Eyþórs fjallar um en hann hefur unnið að handriti að kvikmynd í fullri lengd úr þeirri hugmyndavinnu og er það verkefnið sem hann hefur nú náð í handritsstyrk sinn fyrir.

Næstu skref eru bara að halda áfram að vinna í handritinu og koma því í fullklárað kvikmyndarhandrit. Þessi styrkur gefur manni rými og tíma til að einbeita sér að skrifunum, frekar en að þurfa að þvinga sér í aðra vinnu til að eiga fyrir salti í grautinn. Eftir áramót hefst svo vinna við að leita sér að framleiðanda fyrir myndina, sem getur stutt mig enn frekar í skrifunum og byrjað að finna fjármagn og fjárfesta í væntanlega kvikmynd. Þá mun ég á árinu einnig fylgja eftir útskriftarmyndinni minni, sem er um sama karakter, Arnbjörn.

Umsögn ráðgjafa Kvikmyndamiðstöðvar Íslands sem fyldi með tilkynningunni um styrkinn til Eyþórs var vægast sagt mjög góð. Þar stóð m.a:

Persóna Arnbjörns er ein sú allra skemmtilegasta sem hefur verið kynnt í íslenskri kvikmyndagerð. Hann stígur ljóslifandi fram á nokkrum blaðsíðum.Sagan er algjör perla og verður mjög gaman að sjá hana uppá tjaldi. Það er augljóst að höfundurinn er lærður arkítekt, sem kann að gera góðan strúktur.

Það eru því spennandi tímar framundan hjá Eyþóri en sjálfur tekur hann þessum jákvæðu orðum með ró.

Það er gríðalega skemmtilegt og setur enn meiri pressu á mig að vanda til verka svo að lokahandritið standi undir þeim væntinum sem nú þegar eru gerðar til þess.

Nýútskrifaður Eyþór Jóvinsson fær handritsstyrk frá Kvikmyndasjóði

Teitur Magnússon útskrifast nú í desember úr deildinni Handrit/leikstjórn úr  Kvikmyndaskóla Íslands og gerði sér lítið fyrir og fékk verðlaun fyrir frammúrskarandi námsárangur og ástundun.

Hann segir ástæðu þess að hann sótti um á sínum tíma í skólanum hafa verið hvatningu frá starfsfélaga sínum Óla.

Ég var að vinna á lager hjá ÁTVR og það var akkurat ekkert að frétta í byrjun janúar. Þannig að ég var að búa til einhver myndbönd á glænýja Iphone-inn sem ég hafði fjárfest í stuttu fyrir jól. Óli sagði ,,Afhverju sækirðu ekki um í KVÍ?,, Ég tók því full bókstaflega og sótti um.

Og það varð úr og nú tveimur árum síðar er hann á þeim tímamótum sem útskriftin er.

Þetta er eiginlega búið að vera of fljótt að líða. En ánægjulegt.

Þegar Teitur er inntur eftir efni útskriftarmyndar sinnar svarar hann um hæl:

Í fangelsi afneitunar reynir ung stúlka að endurheimta það sem hún hefur misst.

Teitur segir þetta þó ekki vera eina umfjöllunarefnið sem hann  brennur fyrir því hann er með verkefni á prjónunum eftir útskrift.

Ég er nú þegar byrjaður í hugmynda vinnu fyrir stuttmynd sem mig langar að gera á næsta ári. Ætli maður fari ekki að vinna eitthvað og reyna að safna sér einhverjum benjamins.

Myndin er tekin af Birtu Rán Björgvinsdóttur

Sér ekki eftir að taka áskorun Óla – Teitur Magnússon útskrifast úr KVÍ

Fréttir Í fréttum var það helst