Baldvin Kári er einn af framleiðendum hrollvekjunnar sem frumsýnd verður á Íslandi 27. október 2017 en hann er í hópi kennara Kvikmyndaskóla Íslands.

Ég kynntist kvikmyndagerð snemma í gegnum foreldra mína, en þau eru bæði kvikmyndagerðarfólk, framleiðandi og handritshöfundur. Ég var lengi vel óviss hvaða starf myndi henta mér best innan kvikmyndagerðarinnar, en var viss um að mig langaði til útlanda að læra, helst til Bandaríkjanna, enda uppalinn þar að hluta.

Baldvin Kári segist hafa vitað að til þess að komast í mastersnám þyrfti hann einhverskonar BA gráðu og segist nánast af handahófi hafa valið heimspeki og klassísk fræði við Háskóla Íslands.

Það endaði á að vera ágætt val því í heimspekinni kynntist ég fagurfræðinni og m.a.s. alls konar kenningum um fagurfræði kvikmyndaformsins og í klassísku fræðunum las ég forngrískar og rómverskar sögur og frásagnir. Samhliða þessu vann ég sem PA og svo 2nd AD á nokkrum íslenskum myndum og steig þar fyrstu skrefin á kvikmyndasetti.

Þar telur Baldvin Kári víst að hann hafi ánetjast kvikmyndagerð enda viti hann fátt skemmtilegra og meira gefandi en að vinna með með samheldnum hópi skapandi fólks að sameiginlegu markmiði.

Næst lá leiðin til New York, í framhaldsnám í kvikmyndagerð við Columbia University. Ég valdi Columbia aðallega vegna tvennra kosta: námið þar fókuserar nær einvörðungu á frásagnarkvikmyndir, og ég vissi að það var fókus sem ég vildi. Og hitt, að fyrsta árið var sameiginlegt öllum og maður þurfti ekki að velja sér sérsvið (handrit, leikstjórn eða framleiðslu) fyrr en á öðru ári. Ég endaði á að velja leikstjórn, en tók alla kjarnakúrsana í handritsgerð sömuleiðis, og jafnvel valkúrs í framleiðslu líka. En kúrsarnir eru bara hálft námið, mesta vinnan liggur í öllum verkefnunum sem maður tekur þátt í. Ég kom að framleiðslu ótalmargra stuttmynda á einn eða annan hátt, og nýttist þar vel reynsla mín af kvikmyndasettum heima á Íslandi.

Eftir útskrift fluttist Baldvin Kári heim til Íslands og byrjaði að kenna við Kvikmyndaskóla Íslands vorið 2013.

Ég hef mest kennt Myndræna frásögn, sem er leikstjórnarkúrs, og svo inngangskúrs í handritagerð, Lög og reglur. En líka kúrs í ritun og þróun kvikmynda í fullri lengd, Leikin bíómynd. Ég vann jafnframt hjá Zik Zak kvikmyndum á þessum tíma, og fókuseraði snemma á þróun verkefna og handrita, og ýmist vann með handritshöfundum að þeirra verkefnum eða las og gaf punkta.

Aðkoma Baldvins Kára að myndinni Rökkur á sér langan aðdraganda enda hefur hann lengi þekkt handritshöfundinn og leikstjórann.

Við Erlingur Thoroddsen, sem er leikstjóri og handritshöfundur Rökkurs, höfum þekkst frá því við vorum unglingsstrákar að leika okkur að taka upp stuttmyndir á sumrin. Þannig að þegar hann bað mig að vera einn af framleiðendum myndarinnar samþykkti ég það auðvitað strax. Hann er bæði sérstaklega hæfileikaríkur leikstjóri og við vinnum afskaplega vel saman enda verið vinir í hartnær 20 ár. Sjálfur hef ég aldrei laðast sérstaklega að hrollvekjum, þótt Erlingur hafi vissulega opnað augu mín fyrir möguleikum þessarar tegundar kvikmynda í gegnum tíðina, en það sem laðaði mig að Rökkri var saga þessa pars, Gunnars og Einars, og hvernig myndin kryfur þeirra fyrrum ástarsamband. Það var eitthvað sem mér fannst ég ekki hafa séð áður, hvað þá milli tveggja karla.

Við munum að sjálfsögðu fylgjast vel með kynningu á kvikmyndinni Rökkur en Erlingur Thoroddsen sem er handritshöfundur og leikstjóri myndarinnar er einnig í kennarahópi Kvikmyndaskóla Íslands.

Fátt skemmtilegra og meira gefandi – Baldvin Kári er meðframleiðandi Rökkurs

Magnús Thoroddsen Ívarsson útskrifaðist úr Kvikmyndaskóla Íslands vorið 2014 og hefur verið iðinn við kolann síðan.  Nýlega var frumsýnd önnur kvikmyndin í fullri lengd sem hann er framleiðandi af, en fyrri myndin var Webcam sem sem var frumsýnd vorið 2015.

Snjór og Salóme varð til þannig að Toni leikstjóri  (Sigurður Anton Friðþjófsson) skrifaði handrit í c.a. 5 mánuði út frá hugmynd sem hann hafði verið með síðan frá Webcam. Frá þeim tímapunkti varð myndin frekar fljótt til.

Magnús segir að það sé erfitt að koma orðum að því hvernig hinn frumlegi titill myndarinnar varð til, fólk verði einfaldlega að fá skýringuna með því að fara á myndina.

Efnið er nokkuð margslungið. Ung kona í klemmu? Hvað á maður að gera þegar allt fer í vaskinn? Öll plön sem maður hefur haft geta breyst, og þarna kemur það fyrir hana á svipstundu. Vinnan, kærastinn, húsnæðið.  Salóme þarf bara að redda sér.

Magnús segir að vinnan að Snjó og Salóme hafi þó verið aðeins lengur að komast í gang en þegar hópurinn gerði Webcam og þrátt fyrir að þau hefðu þá búið að reynslunnni sem fyrri myndin gaf þeim hafi nýja myndin alls ekki verið létt í framleiðslu.

Við reynum að halda því “cool” í sambandi við væntingar en gera samt allt sem við getum til að koma myndinni á framfæri . Vonandi gengur það upp. Það eina sem við getum í rauninni gert er að reyna að gera góða mynd, og það er það sem við gerðum.  Þessi mynd var meira umfang og er “Stærri” en hinar. Dreifingaaðlinn Sena var sáttur með okkur.

Eins og áður segir var það sama kjarnateymið sem stóð að gerð Snjór og Salóme.

Aron Bragi Baldursson, tökumaður, Sigurður Anton leikjstóri og framleiðandi, og ég framleiðandi og aðstoðaleikjstóri. Telma Huld Jóhannesdóttir leikkona kom líka inn sem framleiðandi. Inn kom hljóðmaður, Magnús Hrafn Hafliðason og Haukur Karlsson sá um grip. Einnig var mikil hjálp frá Kvikmyndaskólanum þar sem Birta Rán Björgvinsdóttir, Tjörvi Lederer og Ísak Þór Ragnarson komu inn sem P.A./interns þegar mest var að gera.

Einnig léku tveir útskrifaðir leikarar úr Kvikmyndaskólanum aðahlutverk í myndinni, Anna Hafþórsdóttir og Guðmundur Snorri Sigurðarsson en hvað er svo framundan hjá hópnum, verður strax ráðist í að undirbúa næstu mynd.

Það komu upp, á ákveðnum tíma miklar pælingar um næsta verkefni en það fór á hold þar sem Snjór og Salóme er ennþá algjörlega að fylla fangið okkrar allra. Væri mjög til í að geta sagt eitthvað en eins og er væri það bara einhver vitleysa, eina sem ég veit er að við elskum þetta öll og viljum halda áfram að búa til gæða efni og bæta okkur.

Og þegar spurt er hvað fólk eigi að taka sér fyrir hendur yfir páskahátíðina er svar Magnúsar einfalt?

Skella sér í bíó og að sjá Snjór og Salóme!

“Allir í bíó á Snjó og Salóme!” – Magnús Thoroddsen Ívarsson um nýjustu afurðina

Lovísa Lára Halldórsdóttir hefur haft í mörg horn að líta frá útskrift sinni úr deildinni Handrit/leikstjórn í vorið 2014.

Fyrir utan að hafa verið athafnasöm við kvikmyndagerðina sjálfa hefur hún verið potturinn og pannan í kvikmyndahátíðinni Frostbiter ásamt eiginmanni sínum Ársæli Rafni Erlingssyni en hátið var haldin í fyrsta sinn á Akranesi í fyrrahaust. Nýlega fékk hátíðin veglegan styrk frá Uppbyggingarsjóði Vesturlands. Við fengum Lovísu Láru til að segja okkur frá þýðingu þessa stuðnings við hátíðina.

Styrkurinn hefur mikla þýðingu fyrir hátíðina og sérstaklega fyrir mig. Í fyrra hlutum við einnig styrk frá Uppbyggingasjóði og Kvikmyndamiðstöð Íslands en það voru mikið lægri upphæðir og greiddist því mikið af kostnaði úr mínum eigin vasa. Var því ekki hægt að framkvæma allt sem okkur langaði til.Ég hugsa að meiri hlutinn af styrknum fari í auglýsingar og sýningargjöld. En með hærri styrknum er auðveldara fyrir okkur að kaupa sýningarrétt á gæðahrollvekjum sem hafa verið að gera það gott á hátíðum út um allan heim sem hafa ekki verið sýndar hérlendis.

Lára Lovísa segir að búið sé að opna  fyrir innsendingar á stuttmyndum fyrir hátíðina í haust.

Hægt verður að senda inn myndir til 16. september. Núna erum við, Ársæll Rafn eiginmaður minn bara að horfa á fjöldan allan af hrollvekjum og reyna að velja myndir til þess að sýna á hátíðinni.Við erum einnig að plana ýmsa viðburði eins og fyrirlestra, masterclass, sérstakar sýningar og auðvitað eftirpartýin.

Hjónin hvetja nemendur Kvikmyndaskóla Íslands að senda inn myndir á hátíðina en í fyrra komu nemar skólans að gerð allra myndanna sem valdar voru á hátíðina.

Það er frítt að senda inn íslenskar myndir og það verða veitt verðlaun fyrir þrjár bestu myndirnar.

Hægt er að senda inn í gegn um FilmFreeway en einnig er mögulegt að senda hlekk á myndina ásamt stillramma og úrdrætti á netfangið frostbiterfestival@gmail.com

En hvað er annað að gerast hjá Lovísu Láru þessa dagana?

Ég er að vinna hörðum höndum að eftirvinnslu á fyrstu bíómynd minni í fullri lengd, Týndu Stelpurnar, svo að ég get komið henni í bíó.

Einnig er ég að vinna að því að sækja um styrki til þess að fjármagna næstu bíómynd mína. En sú mynd er spennutryllir um þrjár konur á mismunandi aldri og bakgrunni sem að eiga það allar sameiginlegt að vera ofsóttar af mismunandi tegundum af eltihrellum og ákveða að taka málin í sínar eigin hendur.Einnig er ég að vinna í heimildarmynd um Aukaleikara á Íslandi. En er eins og er að sanka að mér upplýsingum og efni.

Kvikmyndaskóli Íslands óskar þeim hjónum til hamingju með styrkinn og góðs gengis við undirbúning hátíðarinnar og annarra verkefna sinna.

Auðveldara að fá sýningarrétt á gæðahrollvekjum – Lovísa Lára fær veglegan styrk fyrir Frostbiter

Anna Hafþórsdóttir leikur eitt af aðalhlutverkum kvikmyndarinnar Snjór og Salóme sem frumsýnd verður um helgina. Anna  útskrifaðist úr leiklistardeild  Kvikmyndaskóla Íslands vorið 2011 en meðal annars sem hún hefur gert frá útskrift er aðalhlutverkið í myndinni Webcam sem frumsýnd var sumarið 2015.

Myndin gerist á mjög erfiðum tíma í lífi Salóme. Bæði er persónulega líf hennar og atvinna á viðkvæmum stað og hlutirnir virðast ekki ætla að fara eins og hún hefði viljað.

Segir Anna um hlutverk sitt í Snjór og Salóme.

Hún upplifir sig oft á tíðum eina, það er að segja, hún á erfitt með að mynda tengingu við aðra og er umkringd undarlegum karakterum. Þannig að hún virðist stundum sú eina manneskjan með viti. Einning virðist fólk stundum eiga erfitt með að skilja hana og tilfinningar hennar, hún er mjög tilfinningarík og viðkvæm en reynir eftir bestu getu að sýna það ekki.

Það er mikið tækifæri að leika aðalhlutverk í kvikmynd fyrir unga leikkonu og forvitnilegt að vita hvað standi upp úr eftir vinnslu þessara tveggja kvikmynda.

Vinnan við Webcam skilaði mér fyrst og fremst reynslu sem er dýrmæt, það sama má segja um vinnuna við Snjór og Salóme. Ég reyni að gera ekki of miklar væntingar en það væri auðvitað mjög gaman ef þetta leiðir til þess að leikstjórar verði duglegri að fá mig í prufur.

Anna hefur nýtt tímann vel frá útskrift til að víkka sjóndeildarhringinn með námi samhliða störfum sínum í leiklistinni.

Sem stendur stunda ég nám í ritlist við Háskóla Íslands og hef ég verið að leika í stuttmyndum meðfram því. Svo tók ég grunn- og framhaldsnámskeið í talsetningu. Mér finnst talsetning ótrúlega skemmtileg og væri til í að fara eitthvað lengra með það.

Og hvað tekur við að frumsýningu lokinni?

Ég mun halda áfram í ritlistinni, svo er ég að fara að leika í mynd núna í júní eftir ungan og upprenandi leikstjóra sem lærði kvikmyndagerð í Prag.

“Dýrmæt reynsla að leika í “Webcam” og “Snjór og Salóme”” –  Anna Hafþórs

Guðmundur Snorri Sigurðarson stundar leiklistarnám í Kvikmyndaskóla Íslands en um næstu helgi verður frumsýnd kvikmyndin Snjór og Salóme þar sem hann leikur eitt af aðahlutverkum.

Ég leik Hans, sem er einn vinsælasti rappari Íslands. Hann er einstaklega vitlaus og barnalegur karakter – virðist drifinn áfram af löngun sinni til að sofa hjá öllu sem hreyfist. Svo er það þegar Salóme byrjar að vinna að heimildarmynd um hann að veröld hans hristist upp því hún hefur ekki minnsta áhuga á að sofa hjá honum – og það vekur upp margar óvelkomnar tilfinningar í honum.

Guðmundur Snorri hefur lengi gengið með kvikmyndanámið í maganum.

Ég hef stefnt að kvikmyndagerð síðan ég var 13 ára. 14 ára keypti ég mér vídjókameru og fór að taka upp eiginlega bara allt sem ég gat – gerði sketsa með vinum mínum og tók upp og klippti myndband fyrir árshátíðina í 10 bekk, sem var mjög skemmtilegt. Svo fór ég í Borgarholtsskóla en þar stefndi ég á handritagerð og leikstjórn, mér datt aldrei í hug að verða leikari.

Guðmundur segist hafa valið sér leiklistaráfanga  í Borgarholtsskóla af því hann taldi það vera einfaldar einingar.

En eftir nokkra áfanga, og þá sérstaklega eftir að vinur minn, Sigurður Anton, útskrifaðist og fór að gera allsskonar verkefni upp á eigin spýtur og fá mig til að leika í þeim þá fann ég mig algjörlega í leiklistinni og ákvað að slá til og sækja um í Kvikmyndaskólanum.

Væntingum Guðmundar Snorra til námsins í Kvikmyndaskólanum hefur verið fullnægt að nánast öllu leyti.

Kennararnir eru frábærir og það er eiginlega fáránlegt hvað það er skemmtilegt að eyða hverjum einasta degi í ekkert nema leiklist. Ég mun sakna þess mikið þegar ég útskrifast. Ég er orðinn hálfstressaður.

Og frumsýningarhelgina sem framundan er segir Guðmundur Snorri leggjast afskaplega vel í sig.

Það var ótrúlega gaman þegar Webcam var frumsýnd – að horfa yfir fullan bíósal af fólki, og sjá myndina í fyrsta sinn í gegnum þau, einhvernveginn. Það er ekki til betri tilfinning en að uppskera hlátur, finnst mér persónulega (því ég legg mikið upp úr gamanleik), þannig ef að ég er á skjánnum að reyna að vera fyndinn og fólk hlær, þá hlýnar mér um hjartarætur.

Ég útskrifast núna 20 maí, og eftir það tekur bara alvaran við. Það eru mörg járn í eldinum hvað varðar fleiri kvikmyndir og verkefni, en mig langar mikið að fara að vinna einhversstaðar við margmiðlun.

Guðmundur Snorri bætir við að hann hafi mikinn áhuga á að vinna við klippingar, textun og annað þess háttar.

Þannig að fá vinnu hjá einhverri sjónvarpsstöð við eitthvað svoleiðis væri bara draumur. En ég hef engar áhyggjur af því út af fyrir sig – lífið fer bara nákvæmlega eins og það fer og ég get ekkert gert nema upplifa það.

“Ekki til betri tilfinning en uppskera hlátur” – Guðmundur Snorri með aðalhlutverk í Snjór og Salóme

Haustið 2014 útskrifaðist Grétar Maggi Tarnús Jr. úr Kvikmyndaskóla Íslands, Leikstjórn framleiðslu.

Útskriftarmynd Grétars Magga, Sjúkdómarinn (Dr. Judge Sicko) var valin á Stockfish film festilval 2016 (Sprettfiskinn) ásamt nokkrum öðrum stuttmyndum og á næstunni verður myndin sýnd vestanhafs.

Í framhaldi af Stockfish 2016 fer Sjúkdómarinn á næstunni í sýningar í Boston, Chicago, New York, Seattle og Toronto. Ég fer til New York að fylgjast með hátíðinni, til að athuga hvort þeir sýni myndina rétt og svona en ekki aftur á bak hahaha…

Hátíðin sem Sjúkdómarinn verður sýnd á  kallast Taste of Iceland en í fyrra var það myndin Hross í oss sem var framlag Íslands.

Þegar ég skrifaði handritið þá ímyndaði ég mér að Bjarni Benediktsson (sem var þá fjármálaráðherra) væri alkóhólisti og myndi missa allt í lífinu vegna drykkjuskapar, en tæki sig svo á og færi í meðferð. Hann fengi þó ekki gömlu vinnuna sína aftur heldur vinnu sem öryggisvörður í Glæsibæ og væri alltaf í stöðugri afneitun um fortíð sína. Þar lendir hann í aðstæðum sem gera honum lífið leitt. Þetta er grínmynd með boðskap. Aðalhlutverk leika Halldór Gylfason, Júlíana Sara Gunnarsdóttir og Júlía Hannam.

Grétar Maggi hefur verið í ýmsum verkefnum frá útskrift og er með eitt og annað í gangi þessa dagana.

Eftir að ég útskrifaðist frá Kvikmyndaskóla Íslands gerði ég heimildarmynd um föður minn og kúluhúsið sem hann byggði og bjó í í mörg ár en þurfti svo að rífa húsið og selja lóðina. Myndin heitir “Meistari Tarnús og Hús” og var hún sýnd á kvikmyndahátíðinni Skjaldborg 2015 og Sunnlenskum kvikmyndadögum.Í dag er ég að vinna að heimildarmynd ásamt Hafsteini Gunnari Hafsteinssyni en það er leyniverkefni eins og er.  Svo var ég í hugmyndavinnu og undirbúningi í sjónvarpsþáttargerð en það er í biðstöðu vegna fjársskorts, málið er bara að halda áfram. Ég er að skrifa  dáldið og svo detta inn stundum lítil verkefni.

Þar að auki er Grétar Maggi tónlistarmaður og starfar sem slíkur undir nafninu Tarnús Jr.

Ég hef gefið út tvær plötur. Ég samdi lag í fyrra World War III og gerði tónlistarmyndband við það. Það fjallar um ástandið í  Sýrlandi, allar hörmungarnar þar. Myndbandið er frekar blóðugt en sýnir svo sannarlega ástandið þar.

Útskriftarmynd Grétars Magga Tarnús Jr. sýnd vestanhafs

Gunnar B. Guðbjörnsson útskrifaðist úr Kvikmyndaskóla Íslands haustið 2008 og hefur hann síðan starfað í fjölda spennandi verkafna. Fyrr í þessum mánuði steig  hann á verðlaunapall Eddunnar fyrir skemmstu sem tökumaður þáttanna Með okkar augu sem var valinn menningarþáttur ársins 2016.

Ef ég man rétt, þá var það á þriðju önn þar sem við vorum sendir í starfskynningu og 3 úr okkur bekk fengum að fara á sett á sjónvarps þættinum “Ríkið” sem var framleiddur af Sagafilm og Silja Hauks leikstýrði.

Ég var fljótlega kominn í leikmunadeild Rúv og sumarið eftir fékk ég vinnu við gerð þáttarins “Dagvaktin”, einnig í leikmuna deild.  Þetta var nánast sama crew en annar leikstjóri en á og annar tökumaður en sami kjarni á bakvið verkefnið.Eftir útskrift gerðum við fyrstu seríu af Ástríði og ég náði að ljúga mig inn í aðstoðartökumanns stöðuna. Núna 7-8 árum seinna er ég enn að vinna hjá Sagafilm, en er titlaður klippari og tæknimaður.

Gussi segir að Kvikmyndaskólinn hafi fært sér sjálfstraust til að búa til verkefni til að leikstýra sjálfur.

Þau verkefni eru aðalega tónlistarmyndbönd en ég leikstýri líka minni þáttum og auglýsingum innan Sagafilm. Áður en ég fór í skólann vann ég sem klippari og multimedia hönnuður hjá auglýsingastofunni Pipar. Þegar ég hætti þar ætlaði ég aldrei að vinna aftur í “bransanum” en einhvern veginn viltist inn í kvikmyndaskólann samt…

Gussi vann í ár að þriðju þáttaröðinni af Með Okkar Augum.

Elín Sveinsdóttir framleiðandi kom með þáttinn til okkar í Sagafilm, við Ella höfðum þá verið ný búinn að gera saman Biggest Loser 1, þar sem ég var Story Editor og hún Story Producer. Hún vildi fá mig til að skjóta og klippa næstu þáttaröð og eftir að hafa verið læstur inni í klippiherbergi í næstum 6 mánuði að gera mjög stíft raunveruleika sjónvarpsformat þá hljómaði það eins og draumur að fá að komast út í smá tökur.

Þá segir Gussi að komið í ljós að tökustörfin yrðu ekki það eina sem hann hefði á sinni könnu því hann varð klippari þáttanna auk þess að vera ljósa- og hljóðmaður.

Við höfum svo hægt og rólega stækkað crewið okkar en saman erum við Ella núna búin að gera 3. seríur af Með Okkar Augum og loksins tókst okkur að næla okkur í Eddu.

Hjá Sagafilm hef ég náttúrulega komið að heilum helling af verkefnum, stærst líklega að nefna Biggest Loser 1-2 og 3, Voice 1 og 2, og Réttur 3 (Case á Netflix) sem Baldvin Z leikstýrði.Starf mitt er það fjölbreytt að eina vikuna get ég verið 2-3 daga á setti í auglýsingu, 1-2 daga í klippi í kjölfarið, farið svo í beina útsendingu um helgina,þar á eftir farið út á land að skjóta eithvað fyrir erlenda sjónvarpstöð. En ég alltaf enda ég í klippinu, þar sem ég kann best við mig.Í þessum töluðu orðum er ég að læsa klippi af seinni helming sjónvarsmyndarinnar Líf Eftir Dauðan sem Vera Sölvadóttir leikstýrir, myndin verður sýnd um páskana en framundan er svo ýmislegt. Þar ber helst að nefna Stellu Blómkvist sem er leikin sjónvarpssería sem Óskar Þór Axelsson leikstýrir, Guðni Halldórsson og ég erum að klippa en við klipptum saman Rétt 3 til dæmis og ýmislegt fleirra.

Fjölbreytt starf hjá Sagafilm kom Gussa á verðlaunapall á Eddunni

Um síðustu helgi var hátíð kvikmyndagerðarfólks haldin á Hótel Nordica, Eddan 2017 og var þar að vanda mikið um dýrðir. Fólkið í bransanum sem tengist Kvikmyndaskóla Íslands kom ekki tómhent frá hátíðinni en ber þar helst að nefna hinn raunverulega siguvegara hennar, kvikmyndina Hjartastein.

Fjölmargir útskrifaðir nemendur úr KVÍ komu að gerð myndarinnar sem vann til 9 verðlauna á Edduhátíðinni.  Vigfús Þormar Gunnarsson var fyrsti aðstorðarleikstjóri og Kristín Lea Sigríðardóttir sá um casting og leikþjálfun en bæði eru þau útskrifaðir leikarar úr Kvikmyndaskólanum. Edda Mackenzie úr Leikstjórn/framleiðslu  var framleiðslustjóri, Jón Már Gunnarsson úr Skapandi tækni, starfaði að myndbrellum og Guðjón Hrafn Guðmundsson, einnig úr Skapandi tækni var 2. aðstoðartökumaður.  Jón Þór Jónsson var „key grip“ en útskrifuðu leikararnir Ari Birgir Ágústsson, sá um leikmuni og Rebekka Atla Ragnarsdóttir  var runner. Arnar Benjamín Kristjánsson sem er útskrifaður nemandi úr Leikstjórn/framleiðslu var location scout og Annetta Ragnarsdóttir sem er útskrifuð úr skólanum úr Handritum/leikstjórn vann við framleiðslu og að lokum aðstoðaði Saga Guðjónsdóttir við veitingar.

Guðmundur Arnar Guðmundsson sem vann verðlaun fyrir bæði leikstjórn og handrit ársins, auk þess að eiga veg og vanda að kvikmynd ársins, Hjartasteini, hefur undanfarin ár verið í mikilvægu hlutverki sem kennari við Kvikmyndaskóla Íslands. Auk hans starfaði við myndana deildarforseti Skapandi tækni, Jörundur Rafn Arnarson sem var brellumeistari hennar.

Af öðrum sigurvegurum Kvikmyndaskólans á Edduhátíðinni skal næst nefna þáttinn Ligeglad, sem Arnór Pálmi Arnarsson, útskrifaður úr Leikstjórn/framleiðslu vorið 2009 leikstýrði, en þátturinn vann titilinn Besta leikið sjónvarpsefni ársins 2017. Einnig vann þátturinn Með okkar augum verðaunin Menningarþáttur ársins en tökumaður og klippari þáttarins er Gunnar B. Gudbjörnsson  (Gussi) sem útskrifaðist úr Kvikmyndaskólanum haustið 2008.

Kvikmyndaskólainn sendir öllum tilnefndum sem og verðlaunahöfunum hamingjuóskir með frábæran árangur á Eddunni 2017.

Knútur Haukstein Ólafsson vann vann nýlega verðlaunin Best Experimental Short á WideScreen Film & Music Video Festival í Miami í Bandaríkjunum fyrir útskriftarmynd sína úr Kvikmyndaskóla Íslands, Inferno.

Knútur  útksrifaðist úr skólanum árið 2015 úr leiklistardeild eins og leikstjóri myndar sinnar,  Kristín Ísabella Karlsdóttir.

Satt best að segja er ég ekki voða hrifinn af öllu þessu umstangi í kring um verðlaun. Þetta er í rauninni bara efnislegur hlutur sem er gerður til þess að mata egóið. Ég reyni eins og ég get að losa mig við þetta egó sem við höfum öll og einbeita mér að því að sýna æðruleysi en í þetta skiptið fékk egóið smá næringu og það verður bara að hafa það.

Segir Knútur þegar hann er spurður út í mikilvægi slíkra verðlauna.

Það sem þetta á virkilega að snúast um eru sögurnar sem við sem kvikmyndagerðarmenn og listamenn höfum að segja. Hverju við viljum koma á framfæri varðandi mannlega hegðun, lífið og tilveruna? Við viljum ná til fólks og fá það til þess að staldra við og hugsa. Fyrir mér er það sem þetta snýst allt saman um.

Knútur segir kvikmyndir geta breytt hugsunarhætti fólks til hins betra þó þær geti líka haft slæm áhrif.

En við krefjumst þess að fólk staldri aðeins við og fylgist með umhverfi sínu og pæli aðeins í því. Það er mikilvægt að við getum skoðað okkur sjálf og aðra með köldu og hlutlausu sjónarmiði og kvikmyndir geta falið í sér þann mátt. Kvikmyndin Moonlight (2016) er t.d. gott nýlegt dæmi um það. Áhorfendur sátu kjaftstopp í sætunum sínum eftir myndina vegna þess að þeir fengu eitthvað til að hugsa um. Það er rosalega mikið af kjaftæði þarna úti í kvikmyndabransanum. Myndir sem fjalla ekki um neitt raunverulegt eða koma ekkert inn á mannlega hegðun og hugsun. Svona myndir eins og Moonlight fá mann til að vilja halda áfram.En að sjálfsögðu er maður ánægður með árangurinn og þá sérstaklega fyrir hönd leikstjórans og tökuliðsins. Það er gott að vera minnt/ur á að maður sé að gera góða hluti.

En hvernig kom það til að myndin keppti á hátíðinni í Miami?

INFERNO er útskriftarmyndin mín úr Kvikmyndaskólanum frá haustinu 2015. Kristín Ísabella Karlsdóttir, sem er einnig útsrifaður nemandi úr KVÍ, tók að sér að leikstýra myndinni fyrir mig og stóð sig frábærlega að mínu mati. Ég sá auglýsingu á vefsíðunni FilmFreeway hjá hátíð að nafni WideScreen Film and Music Video Festival sem haldin var í Miami.Það sem dró athygli mína að þessari hátíð var þrennt: hversu góðar viðtökur hún fékk hjá öðrum kvikmyndargerðarmönnum, að hún var merkt IMDB og að hún bauð upp á flokk undir nafninu „Experimental“. Ég hafði verið að senda INFERNO á hátíðir undir hefðbundnum stuttmyndaflokki en ég áttaði mig síðar á að myndin tilheyrði þessum Experimental flokki þar sem skilgreiningin á Experimental myndum er að þær nota óhefðbundnar aðferðir til þess að segja sögur. 669 verk voru send á hátíðina en aðeins 130 verk voru valin. Þá var ég tilnefndur í flokknum „Best Experimental Short“ ásamt fjórum öðrum myndum. Síðan vildi svo skemmtilega til að við unnum í þeim flokki fyrir bestu mynd.

Áhuga sinn og rannsóknir á mannlegu eðli hefur Knútur nú tekið upp á næsta stig með því að setjast aftur á skólabekk.

Í augnablikinu er ég að læra sálfræði við Háskóla Íslands en á sama tíma er ég að undirbúa mögulegt tónlistarmyndband með félögum mínum í Flying Bus Films. Við erum að hittast og ræða saman mögulegar hugmyndir. Stundum deyja svona samræður út og stundum ekki. Samstarfið verður vonandi að veruleika í þetta skiptið. Þá er ég komin með ný tengsl við kvikmyndagerðarmenn víðsvegar um heiminn og markmiðið er að sjálfsögðu að reyna að nýta sér það. Það er aldrei að vita nema maður fari að vinna með einhverjum erlendis. Ef handritið er gott og leikstjórinn hefur eitthvað að segja sem hann/hún vill koma á framfæri þá er ég alltaf til.

Gott að vera minntur á að maður sé að gera góða hluti – Knútur Haukstein vann til verðlauna í Miami

Fréttir Í fréttum var það helst