Sjafnar Björgvinsson útskrifaðist af Leiklistardeild með mynd sína “Kafteinn Kambur og Tryggvi blaðamaður”. Við fengum Sjafnar til að deila með okkur reynslu sinni

Það sem fékk mig til að sækja um í Kvikmyndaskólanum var nokkurn veginn köllun til að nýta hæfileika mína í annars konar lærdóm. Ég hafði stundað nám í Háskóla Íslands í eitt ár og komst að því að akademískt og bóklegt nám var ekki mitt viðfangsefni. Námið var í grunninn mjög erfitt og því vantaði meiri hreyfingu á minn lærdóm. Ég sló til eftir stutta umhugsun og ákvað að sækja um í Kvikmyndaskólanum. Ég hreinlega varð að fá einhverja tilbreytingu í námið og hreyfing og annars konar aktívar greinar voru kjörnar fyrir mig. Sú deild sem varð fyrir valinu var hiklaust Leiklist því að þá grein þekkti ég best til. Ég hafði áður í grunnskóla og framhaldsskóla stundað leiklist og hún virtist alltaf eiga vel við mig, heldur en annars konar nám. Leiklist hefur líka í langa tíð verið mjög hjartnæmt áhugamál og hvers vegna ekki að dýpka skilning sinn á viðfangsefninu? Líka að ef maður hefur áhuga á sínu námsefni er mun auðveldara að læra það og þá verður líka vinnan mun skemmtilegri

Ef ég vil fjalla aðeins um lokaverkefnið mitt þá gerði ég í stuttu máli flókna stuttmynd. Hún er ekki einföld því söguþráður hennar er óvenjulegur fyrir stuttmynd að vera, því handritið hentar betur fyrir kvikmynd í fullri lengd. Söguþráðurinn er þannig að blaðamann vantar frétt til að skrifa um og fær því leiðsögn frá frænda sínum sem er hausaveiðari til að fá fréttagrein. Frændi hans dregur hann með sér í fjársjóðsleit til að hafa upp á verðmætum grip og þurfa þeir í sameiningu að kljást við glæpamenn, lífshættulegar aðstæður og annað sem á vegi þeirra verða. Myndin er því með verulega marga vinkla því hún sækir innblástur í mörg mismunandi þemu og kvikmynda element. Hún er hrærigrautur af kvikmyndum eins og 50´s Noir, Gangster, Punk og Industrial Sci-Fi. Þess vegna varð undirbúningur að vera góður til að framkvæma þetta. Handritið fór því oft í gegnum mörg dröft til að það myndi vera gerilegt fyrir stuttan tökutíma og allt crew og fólk var ráðið eins og fljótt varð. Það var upprunalega pælingin en allt frá skrif handrits virðist allt hafa gengið brösulega til að framkvæma. Erfiðlega gekk að fá fáanlega leikara og hinir og þessir hlutir virkuðu alltaf seint. Það virtist svo ganga vel á endanum þegar við þurftum að fara beint í tökur. Náttúrulega mun eitthvað fara úrskeiðis á tökustað en því var reddað eins snöggt og hægt var svo allt myndi ganga upp. Það voru mörg location sem þurfti að tækla en þetta gekk allt saman upp þrátt fyrir alla þá erfiðleika sem gengu á í gegnum þessa stuttmynd. Þrátt fyrir allt sem gekk yfir þá játa ég það að ég mun halda áfram að gera svona tegund af vinnu í framtíðinni

Eftir útskrift ætla ég að kanna frekari vinkla í þessum bransa og halda áfram að skapa eigin verk eins og myndbönd og önnur hljóðefni. Einnig að þjálfa frekar leiklistarhæfileika mína. Þetta er erfið vinna en eins og lokaverkefnið hefur sýnt munu alltaf verða erfiðleikar við að gera svona. Það er enginn bransi eins og skemmtanabransinn og það er svo ánægjulegt hvað hægt er að gera í honum, og margt eftirminnilegt sem ég man eftir að hafa verið í þessum skóla. Þau eru mörg „moment“ sem urðu í náminu eins og að setja upp sitt eigið leikrit fyrir fullum áhorfenda sal og semja eigin söngleik og syngja á sviði fyrir framan fólk. Ef ég vil segja frá einhverju ánægjulegu augnabliki þá er það þegar ég og krakkarnir í mínum leiklistarbekk vorum saman komin á seinasta kennsludegi og við áttum nokkra klukkkutíma eftir af deginum. Við settum á smá tónlist, og við fórum að dansa. Bara dansa. Bjuggum til okkar eigin söngleik bara á no-time, ég fann fyrir svo mikilli ánægju tilfinningu að vera staddur inn í venjulegri kennslustofu og bara dansa af svo mikilli ást fyrir listina. Verulega ljóðrænar lýsingar en það er leikhús fyrir mér. Þegar við losum okkur við hömlunar sem við höfum á okkur og sleppum okkur í sköpunarferlinu. Það er svo fallegt.
Kvikmyndaskólinn er orðinn mikilvægur og eftirminnilegur partur af lífi mínu og ég er mjög þakklátur að geta fengið tækifæri að fá að vera þáttakandi í honum á þessum árum sem ég var nemandi í honum

Við óskum Sjafnari innilega til lukku með útskriftina og fylgjumst spennt með áframhaldinu

Sjafnar Björgvinsson útskrifaðist frá Leiklistardeild núna um helgina

Emil Alfreð Emilsson, sem er útskrifaður frá Handrit og Leikstjórn hjá Kvikmyndaskólanum, hlaut nýverið verðlaun fyrir besta handritið fyrir útskriftarmynd sína “Þrír menn” .
Kvikmyndahátíðin Festival Cinemaiubit er alþjóðleg nemenda hátíð, vottuð af CILECT, alþjóðlegum samtökum kvikmyndaskóla og er ekki annað hægt að segja en að Emil sé vel að verðlaununum kominn.

Við náðum tali af Emil of fengum að forvitnast eilítið um ferlið frá byrjun náms

Það var aldrei spurning hvaða braut yrði fyrir valinu. Handrit og Leikstjórn eru þær tvær hliðar sem að hafa ávallt heillað mig hvað mest. Gæðin í kennslu, þá tala auðvitað út frá minni braut, voru frábær, maður fær að sitja tíma í tvö ár með öllu því færasta fólki sem að Ísland hefur alið af sér. Ég meina það. Og fyrir mér er mikilvægasta lexían ekkert sérstakt trix í sjálfu sér. Allir þessir frábæru kennarar sem maður hafði eru á þeim stað í dag vegna þess að þau voru tilbúin að leggja á sig vinnuna. Og það er líklega það sem að situr hvað mest eftir hjá mér.

Hvað varð til þess að Emil sótti um þátttöku á Cinemaiubit?

Hún Sigrún Gylfadóttir verkefnastjóri Kvikmyndaskólans er algjörlega með puttann á púlsinum í þessum efnum og sendi mér línu um þessa hátíð. Gaman að vita af því að þó svo að maður sér útskrifaður þá sé enn hugsað til manns og ég mæli með því að þið gefið henni háa fimmu ef þið rekist á hana hún er algjör topp manneskja.

Og hvað ber framtíðin í skauti sér fyrir verðlaunaðan handritshöfund?

Mér hlotnaðist sá heiður að kvikmyndatökumaðurinn Óttar Ingi sem að skaut Þrír Menn bað mig um að koma sér í lið fyrir útskriftarmyndina sína sem verður tekin upp í mars sennilega og erum við saman að þróa þá mynd eins og er.
Annars hef ég aldrei verið kannski mesti planarinn þannig séð. Einu plönin mín eru bara að halda áfram að æfa mig og reyna að bæta mig eins mikið og ég get. Ef að maður leggur inn vinnuna þá gæti eitthvað gott gerst, þannig lít ég á það allavega

Við að sjálfsögðu óskum Emil innilega til hamingju með þennan flotta árangur og hlökkum til að fylgjast með honum í framtíðinni

Útskriftarmynd Emils Alfreðs Emilssonar hlaut verðlaun fyrir besta handritið

Stjórn og rektor vilja byrja á því að rekja viðbrögð Kvikmyndaskóla Íslands vegna MeToo hreyfingarinnar og frásagna af kynferðisbrotum innan kvikmyndaiðnaðarins þar á meðal hjá Kvikmyndaskólanum.

Mánudaginn 27. nóvember birtust frásagnirnar opinberlega. Samdægurs var hafin vinna við að koma á viðbragðsteymi. Unnið var í samráði við stjórn nemendafélagsins um skipan. Tilkynning um nýstofnað viðbragðsteymi var tilkynnt nemendum miðvikudaginn 29. nóvember. Opinber viðbrögð skólans voru síðan  birt með fréttatilkynningum 1. og 4. desember. Ráðinn hefur verið utanaðkomandi fagaðili, hjúkrunafræðingur með reynslu og réttindi í málaflokknum, til að vera teyminu innan handar og fyrsti fundur hefur verið boðaður næstkomandi þriðjudag. Í framhaldinu verða kynntir verkferlar þar sem markmiðið er að uppræta allt sem getur flokkast undir kynferðisofbeldi í starfsemi skólans. Viðbragðsteymið mun einnig þurfa að meta hvernig farið skuli með eldri mál og í framhaldinu senda út tilkynningu, væntanlega í lok næstu viku.

Á því tímabili sem frásagnir ná yfir hafa verið á sjötta hundrað nemendur í skólanum og kennarar/leiðbeinendur um 160. Á þessu tímabili hafa komið upp margvísleg vandamál eins og gerist í skólastarfi og viðbragðsteymi, bæði vegna eineltis- og ofbeldismála hafa verið virkjuð, til að leiða mál til úrlausnar.

Þau mál sem fjallað er um í Stundinni hafa aldrei farið í formlega afgreiðslu innan skólans. Kvartanir sem bárust fyrir sjö árum virðast ekki hafa verið meðhöndlaðar með eðlilegum hætti. Stjórn skólans og rektor er mjög brugðið yfir lýsingum sem fram komu í greininni, þar sem eftir lýsingum að dæma var um algjörlega óviðeigandi framkomu að ræða hjá leiðbeinanda. Full ástæða er til að biðjast afsökunar á því að skólinn skyldi ekki bregðast við með fullnægjandi hætti þegar kvörtun barst. Þess verður að geta að viðkomandi leiðbeinandi starfar ekki lengur við skólann. Þetta mál verður hins vegar sérstaklega skoðað útfrá því hvað má af því læra.

Metoo boðskapurinn eru hörð skilaboð um að víða sé pottur brotinn í framkomu gagnvart konum í kvikmyndagerð. Stjórn Kvikmyndaskóla Íslands og rektor eru meðvituð um þá ábyrgð sem hvílir á skólanum við að innleiða nýja og betri menningu. Kvikmyndaskólinn á að vera til fyrirmyndar enda uppeldisstofnun starfsfólks fyrir greinina. Skólinn tekur þessa gagnrýni mjög nærri sér og hyggst bregðast við henni með ákveðnum hætti. Tilkynnt verður um framgang málsins á næstu dögum og vikum. Nemendur á vorönn munu verða varir við breytt vinnubrögð.

Stjórn og rektor Kvikmyndaskóla Íslands

Vegna umfjöllunar Stundarinnar um Kvikmyndaskóla Íslands

Undanfarna daga hafa rektor, stjórnendur og starfsfólk Kvikmyndaskólans, verið harmi slegin af sögum kvenna í sviðslistum, kvikmyndagerð, og hjá menntastofnunum, þar á meðal okkar eigin.

Að sjálfsögðu var ljóst að við þyrftum að bregðast við, líta inn á við og sjá hvað má betur fara og hvernig við getum sýnt vilja í verki til uppræta kynferðislega áreitni og mismunun í allri sinni mynd innan skólans.

Sem fyrst skref í þessu ferli, fórum við yfir verkferla um hvernig skal bregðast við áreitni af öllu tagi. Myndað var viðbragðsteymi innan skólans og nemendum send tilkynning þess efnis fyrr í vikunni, í samráði við nemendaráð (deilt hér neðan)

Það fer ekkert á milli mála að það styttist óðum í útskriftir hjá tilvonandi útskriftarnemum, sem flestir hverjir eru á fullu að klára útskriftar myndir sínar.


Við fengum smá forsmekk að einni mynd, “Fyrirgefðu”, sem Ingunn Mía, nemi í Leiklist, er að klára. Handritshöfundur og leikstjóri er Lovísa Lára Halldórsdóttir, fyrrum nemi við Kvikmyndaskólann, en hún vann handritið eftir hugmynd Ingunnar Míu.
Hér eru nokkrar stillur úr “Fyrirgefðu”




Við ákváðum að ná tali af nokkrum útskriftar nemendum og fá smá innsýn í feril þeirra í Kvikmyndaskólanum.
Við byrjum á Ingu Óskarsdóttur, sem mun senn ljúka námi á deild Handrita og Leikstjórnar

Hvers vegna sóttir þú um að nema við Kvikmyndaskólann og hvers vegna varð þessi deild fyrir valinu ?

Ég hef alltaf dýrkað bíómyndir og grín. Ætli löngunin að búa til grínmynd hafi ekki fengið mig til þess og í Handrit og Leikstjórn get ég búið til mínar eigin sögur og ráðið hvernig ég vek þær til lífsins, sem mér finnst fullkomið

Getur þú sagt okkur aðeins frá útskriftar verkefninu?

Mitt lokaverkefni er grínmynd (surprise) um mæðgur sem eru á leið í jarðarför, en leiðin þangað gengur þeim ekki í haginn. Þetta er búið að vera sjúklega erfitt en sjúklega skemmtilegt ferli. Myndin heitir ‘Mamma veit verst’ og Ingibjörg Reynisdóttir og Björk Guðmundsdóttir eru í aðalhlutverkum

Undirbúningur hefur gengið upp og niður, eins og yfirleitt. Það koma dagar þar sem allt gengur eins og í sögu og svo getur allt farið í vaskinn næsta dag. En einhvern veginn reddast alltaf allt á endanum

Hver eru framtíðarplönin eftir útskrift ?

Framtíðarplönin mín eru frekari menntun í leikstjórn erlendis og að búa mér til skemmtileg verkefni. Ég er til dæmis að deyja úr spenningi að búa til heimildarmynd helst eins fljótt og ég get

Er eitthvað eftirminnilegt “moment” úr náminu sem þú getur sagt okkur frá?

Á 2. önn var ég runner í mynd hjá einum nemanda og Egill Ólafs var að leika í myndinni. Hlutverk mitt var meðal annars að sækja hann alltaf og skutla honum heim. Við keyrðum saman á Akranes og til baka og hann kallaði mig Skutluna. Við eigum fallegar minningar saman frá þessum örfáu dögum, við Egill minn. Annars þegar Kristján bekkjarbróðir minn kastaði óvart opnum amino-dúnkinum sínum yfir borðið í stofunni okkar og aminoduftið lenti allt á Aðalgeiri bekkjarbróður okkar sem var of upptekinn í mikilvægu símtali til að geta dílað við það. Það var gott móment

Í tilefni af 25 ára afmælisári Kvikmyndaskóla Íslands munum við á næstunni sýna 25 valin verk útskrifaðra nemenda síðustu ára. Nú sýnum við stuttmyndina “Stanislaw” frá haustönn 2010

Stuttmyndin Stanislaw, var útskriftarverkefni Jóns Márs Gunnarssonar sem útskrifaðist úr Skapandi tækni á haustönn 2010

Ég útskrifaðist úr kvikmyndaskólanum árið 2010. Ég hafði áður klárað nám í margmiðlunarskólanum þar sem ég sérhæfði mig í 3D animation en mér fannst eins og það vantaði eitthvað smá í vopnabúrið auk þess að ég fann að mér fannst samsetningar (comp) höfða mikið til mín. Þessvegna tók ég þá ákvörðun að fara í kvikmyndaskólann þar sem ég gerði flest öll verkefni í KVÍ að myndbrelluverkefnum, þó þau ættu ekkert endilega að vera það. Þannig fékk ég góðann stað til að æfa það sem ég hafði stefnt að og fólk til að vera mér til handa. Ég náði mjög fljótt mun betri tökum á listforminu og tækninni auk þess að kynnast fullt af hæfileikafólki sem hjálpaði mér að þróast.
Ég fékk strax töluvert af verkefnum og svo fullt starf hjá Pegasus og svo RGB þar sem ég er ennþá starfandi. Ég var svo heppin að vera hent beint í djúpu laugina og fékk traust til að tækla stór verkefni alveg frá upphafi

Fréttir Í fréttum var það helst

Sjafnar Björgvinsson útskrifaðist frá Leiklistardeild núna um helgina

Útskrift af haustönn 2017

Útskriftarmynd Emils Alfreðs Emilssonar hlaut verðlaun fyrir besta handritið

Útskriftarbæklingur haustannar 2017

Vegna umfjöllunar Stundarinnar um Kvikmyndaskóla Íslands

Tilkynning frá Kvikmyndaskóla Íslands

Nú styttist í útskriftir

Nú styttist í útskriftir

25 ár af kvikmyndagerð

Flýtileiðir